பாராட்டுப் பாமாலை!  38: பளிச்சென இப்போது இருக்கிறது! 

அமெரிக்காவில் "கிரீன் உட்'  கிராமம்
அங்கே படிக்கும் "க்ரித்திக் ரமேஷ்'
அங்கிருந்து இந்தியாவிற்கு 
ஆவலுடனே பறந்து வந்தான்!

தாத்தா படித்த பள்ளியைப் பார்க்க..- பார்த்துத்
தவித்தான்!... அதன் நிலை கண்டு!
அழுது வடிந்தது அந்தப் பள்ளி 
அடிப்படை வசதிகள் கூட  இல்லை!

பள்ளியைச் சீர் செய்ய நினைத்தான் 
பலரிடம் கலந்து ஆலோசித்தான்!
அதற்கு செலவுபல் லாயிரமாகும்!
அவனுக்கு ஒரு யோசனை வந்தது!

அறிவியல் போட்டியில் வென்ற பணத்தை
அன்பளிப்பாக கொடுக்க முன் வந்தான்
அனைவரும் அன்புடன் பாராட்டினரே!
அதுமட்டுமல்ல... கேட்பீர் இன்னும்! 

சூரிய சக்தியில் மின்சார அமைப்பை - க்ரித்திக்
அங்கே உண்டாக்கிக் கொடுத்தான்.
அதனால்  கிடைத்தது பல பயன்கள்
அளவுக்கு போக மீதி மின்சாரத்தை

பள்ளி, விலைக்குக் கொடுத்ததுவே! 
அதனால் கிடைத்தது பல வசதி!
தூய்மை, வசதி பெற்ற பள்ளி
பளிச்சென இப்போதிருக்கிறது!

அகவையவனுக்குப் பதினாறு!
அவன் அன்புக்கிங்கு இணையேது!
அரசுப்பள்ளிக் கூடங்களுக்கு 
ஆதரவளிக்க இப்போது 

ஆரம்பித்தான் ஒரு அமைப்பு! - அதன்
மூலம் பல செயல் புரிகின்றான்!
அனைவரும் க்ரித்திக் சேவைதனைப் 
பாராட்டி ஆதரவளிப்போமே!