நீதியைத் தேடி: -பெருமழை விஜய்,

நல்லாயிருந்த நாட்டு முதல்வர்
நள்ளிரவில் மருத்துவமனை போகிறார்!
75 நாட்கள் நிபுணர்கள் சிகிச்சை!
இருந்தும் இறுதியில் இறந்து போகிறார்!
நடந்தது என்ன?

மன்னார்குடி மாபியா ஒன்று
சென்னையில் உலாவுவதாகச் செய்தி!
மந்திரிகளும் அதிகாரிகளும் 
மாபியாக் கும்பலுடன் ஒட்டுறவாம்!
நடப்பது என்ன?

இறந்த அம்மாவுக்கு இவர்
இரத்த பந்த உறவாம்!
எனவே இவரே இனிய தமிழகத்திற்குத்
தலைமை ஏற்க வேண்டுமாம்!
இதுதான் மக்களாட்சியா?

ஒரே இரவில் பெருமதிப்பு நோட்டுகள்
செல்லாத தாகிப் போக...சிரமத்தில் ஏழைகள்!
சேகர் வீட்டில் மட்டும் 34 கோடி புது நோட்டுகள்!
வந்தது எப்படியென்று தெரிய வேண்டாமா?
அரசாங்கம் என்ன செய்கிறது?

மணலையும் மதுவையும் விற்பனை செய்து
கோடிக்கணக்கில் அரசு சேர்த்தது!
நூற்றுக்கும் மேலாய் விவசாயிகள் சாவு!
ரெட்டி...ராவ்கள் வீடுகளில் புதையல்!
இதற்குப் பெயர்தான் ஜனநாயகமா?

ஏறு தழுவுதல் இளைஞரின் அடையாளம்!
ஐயாயிரம் ஆண்டின் பாரம்பரியம்!
அரசும் கோர்ட்டும் அதில் தலையிட
உண்மையாய்ப் பார்த்தால் உரிமையேயில்லை!
இதன் பெயர்தான் ஜனநாயகப் படுகொலையோ?!

இரவிலும் பனியிலும் இளைஞர்கள் சாலைகளில்!
எந்த இடத்திலும் இல்லை அத்துமீறல்!
காக்கிச் சட்டைகள் கம்பு சுழற்றி... காலொடித்தது 
அத்துமீறலின் ஆவேச வேட்டை!அமர்ந்திருப்போரை 
அடிப்பதா வீரம்?!

நீதியைத் தேடியே கோர்ட்டை  அணுகினால்..
அங்கும் அரசியல்!அதீத தாமதம்!தாமதப்படும் நீதி அநீதியே!
தீர்ப்புகள் வழங்க கால நிர்ணயம் நிச்சயம் வேண்டும்!
அப்பொழுதாவது அநீதி இழைப்போர் ஒடுங்க வாய்ப்புண்டு!
இதற்கெல்லாம் விடிவு எப்போது?!

எம்.எல்.ஏ.,க்கள்,எம்.பி.,க்கள் தேர்ந்தெடுக்கப் பட்டது...
மக்கள் நலம் காக்கவா?மாபியாக்களுடன் கை கோர்த்து...
கல்லூரி, பள்ளிகள் நடத்திக் கொள்ளை அடிக்கவா?
வெட்கத்தை உதிர்த்த இந்தக் கல்வி வேந்தர்கள்
வேட்டி கட்டவும் தடை செய்யலாமோ?!

இளைஞர்களே உங்கள் எழுச்சி ஓங்குக!
இதுவே உங்கள் ஆரம்பமாக இருக்கட்டும்!
ந தி நீர் இணைப்பிலும் நல்லது நடக்கவும் 
தொடர்ந்து நீங்கள் இணைந்து போராட வேண்டும்!
ஆதரவுக்கு நாங்கள் இருக்கிறோம்!

மேலே சொன்ன அத்தனை அநீதியும் இங்கு 
ஆழமாய் நன்கு வேரூன்றி யுள்ளது!


நீதியைத் தேடி இளைஞர் அனைவரும்
கோதாவில் மொத்தமாய்
குதித்தே தொடர்ந்து போராடியும் வருகின்றனர்!
கிடைக்கணும் நல் நீதி!