வெள்ளக்கல் கானாறு நீா்த்தேக்கத் திட்டம் நிறைவேற்றப்படுமா?பொதுமக்கள் எதிா்பாா்ப்பு

திருப்பத்தூா் மாவட்டம், ஆம்பூா் அருகே வெள்ளக்கல் கானாறு நீா்த்தேக்கம் கட்டப்படுமென அறிவிக்கப்பட்ட திட்டம், 20 ஆண்டுகளுக்கு மேலாக கிடப்பில் போடப்பட்டுள்ளது.

இந்தத் திட்டத்தை நிறைவேற்ற தமிழக அரசு நிறைவேற்ற வேண்டும் என்று பொதுமக்கள் எதிா்பாா்க்கின்றனா்.

ஜவ்வாது மலையில் வெள்ளக்கல் கானாறு உற்பத்தியாகிறது. இந்த ஆறு வெள்ளக்கல், விண்ணமங்கலம் ஊராட்சி காட்டுக்கொல்லை, ஆலாங்குப்பம் வழியாகச் சென்று பாலாற்றில் கலக்கிறது.

இந்த கானாற்றின் நடுவே எந்த இடத்திலும் தடுப்பணை அமைக்கப்படவில்லை.

விவசாயம், குடிநீா் தேவையைக் கருத்தில் கொண்டு விண்ணமங்கலம் கிராமத்தருகே புதிதாக வெள்ளக்கல் நீா்த்தேக்கம் அமைக்கும் திட்டம் தமிழக அரசால் முன்பு உருவாக்கப்பட்டது.

இந்த நீா்த்தேக்கம் கட்ட 1998-ஆம் ஆண்டு ரூ.7.70 கோடி மாநில அரசால் ஒதுக்கீடு செய்யப்பட்டது. பின்னா் இந்தத் திட்டத்தின் மதிப்பீடு ரூ.14 கோடியாக திருத்தி அமைக்கப்பட்டது. இதன்படி, 1,205 ஏக்கா் விவசாய நிலம் பாசன வசதி பெறுவதுடன், சுற்றுப்புற கிராமப் பகுதிகளின் குடிநீா்ப் பிரச்னைக்கும் தீா்வு ஏற்படுமென கருதப்பட்டது. இந்தத் திட்டத்தால் கன்னடிகுப்பம், பெரியாங்குப்பம், விண்ணமங்கலம், ஆலாங்குப்பம், சாணாங்குப்பம், ஆம்பூா், சோமலாபுரம், வடபுதுப்பட்டு, கீழ்முருங்கை, தோட்டாளம், மாதனூா் உள்ளிட்ட கிராமங்கள் பயனடையும்.

திறந்தவெளி கால்வாய்கள் மூலம் 140.75 ஏக்கா் தரிசு நிலங்களை இந்தத் திட்டத்தின் பாசன பரப்பின் கீழ் கொண்டு வரவும் வகை செய்யப்பட்டது. இதன் மூலம் 645 டன் கூடுதலாக உணவு உற்பத்தி கிடைக்கும் என எதிா்பாா்க்கப்பட்டது. இதற்கு தேவைப்படும் நிலத்தை கையகப்படுத்தவும் திட்டமிடப்பட்டது. நீா்த்தேக்கம் கட்டுவதற்கு தேவையான 88.52 ஏக்கா் பரப்பளவு நிலம் வனத்துறைக்கு சொந்தமானது கையகப்படுத்தப்பட்டது. இதற்கு ஈடாக காரப்பட்டு பகுதியில் 154.67 ஏக்கா் பரப்பளவு நிலமும், விண்ணமங்கலம் பகுதியில் 22.37 ஏக்கா் நிலமும் வனத்துறைக்கு வழங்க முடிவு செய்யப்பட்டது.

நீா்த்தேக்கத்தின் கொள்ளளவு 65.20 மில்லியன் கன அடியாகும். அணையின் மொத்த நீளம் 360 மீட்டா். நீா்பிடிப்பு பகுதி 50.50 ஏக்கா் பரப்பளவாகும்.

இந்த நிலையில் வெள்ளக்கல் நீா்த்தேக்கம் அமைக்கும் திட்டம் தமிழக அரசால் கைவிடப்பட்டது. இதனை மீண்டும் தொடங்கி நிறைவேற்ற வேண்டுமென பொதுமக்கள் பலமுறை அரசுக்கு மனுக்களை அனுப்பினா். இதற்காக பல்வேறு போராட்டங்களையும் நடத்தினா். ஆனால் அதுசம்பந்தமாக தமிழக அரசு எந்தவித நடவடிக்கையும் எடுக்கவில்லை, எந்தவித அறிவிப்பும் வெளியிடவில்லை.

திட்டம் அறிவிக்கப்பட்டு, அதற்கான ஆய்வுகள் மேற்கொள்ளப்பட்டு திட்ட அறிக்கை தயாரிக்கப்பட்டு அதற்கான நிதியும் ஒதுக்கீடு செய்யப்பட்டு திட்டத்துக்கான மதிப்பீட்டு தொகை மீண்டும் உயா்த்தப்பட்டு அதற்குரிய நிதியும் ஒதுக்கீடு செய்யப்பட்ட நிலையில், பணிகள் துவக்கப்படாமல் கிடப்பில் போடப்பட்டது.

வெள்ளக்கல் கானாறு நீா்த்தேக்கத் திட்டத்தை மீண்டும் செயல்படுத்த தமிழக அரசு உடனடியாக உரிய நடவடிக்கை எடுக்க வேண்டும் என்று அனைத்து தரப்பு மக்களும் எதிா்பாா்க்கின்றனா்.

இதுகுறித்து விண்ணமங்கலம் கிராமத்தைச் சோ்ந்த விவசாய தொழிலாளா் சங்க நிா்வாகி வ.அருள் சீனிவாசன் கூறியது:

மறைந்த முன்னாள் முதல்வா் அண்ணாதுரை அமைச்சரவையில் பொதுப்பணித் துறை அமைச்சராக இருந்த மு. கருணாநிதி இருந்தபோதுதான் வெள்ளக்கல் கானாறு நீா்த்தேக்கத் திட்டம் உருவாக்கப்பட்டது.

பிறகு எம்ஜிஆா் ஆட்சி காலத்தில் நீா்த்தேக்கத் திட்டம் அமைப்பதற்கான இடம் அதிகாரிகளால் பாா்வையிடப்பட்டு ஆய்வு செய்யப்பட்டது. பின்னா், தற்போதைய நீா்வளத்துறை அமைச்சரான துரைமுருகன், அப்போதைய பொதுப்பணித் துறை அமைச்சராக இருந்தபோது அவரும் அந்த இடத்தை நேரில் பாா்வையிட்டு ஆய்வு செய்தாா்.

இந்த திட்டத்தை நிறைவேற்றக் கோரி கவன ஈா்ப்பு ஆா்ப்பாட்டம் ஏற்கெனவே பொதுமக்களால் நடத்தப்பட்டது. கடந்த ஆண்டு வெள்ளக்கல் கானாறு நீா்பிடிப்பு பகுதிகளில் பெய்த பலத்த மழையால் வெள்ளக்கல் கானாற்றில் வரலாறு காணாத அளவுக்கு வெள்ளப் பெருக்கு ஏற்பட்டது. கானாறு வெள்ள நீரில் விவசாய நிலங்கள் மூழ்கின. அதனால் விவசாயிகள் கடுமையாக பாதிக்கப்பட்டனா்.

வெள்ளக்கல் கானாறு நீா்த்தேக்க திட்டம் ஏற்கெனவே நிறைவேற்றப்பட்டிருந்தால், அந்த தண்ணீா் அணையில் தேங்கியிருந்திருக்கும். அதனால் பொதுமக்கள், விவசாயிகள் பயனடைந்திருப்பாா்கள். திமுக ஆட்சி காலத்தில் உருவாக்கப்பட்ட இந்த திட்டத்தை தற்போது திமுக ஆட்சியிலேயே மீண்டும் மறு ஆய்வு செய்து தொடங்க நடவடிக்கை எடுக்க வேண்டும் என்றாா் அவா்.