உணவு விநியோக சேவை நிறுவனங்கள்: அதிகரிக்கும் ஆதிக்கம்; அச்சத்தில் உணவகங்கள்

உணவு விநியோக சேவைகளில் ஈடுபட்டு வரும் ஸ்விகி, உபோ் ஈட்ஸ், ஸொமாட்டோ உள்ளிட்ட நிறுவனங்களால் வாழ்வாதாரத்தை இழக்கும் சூழல் ஏற்பட்டுள்ளதாக ஹோட்டல் உரிமையாளா்கள் குற்றம்சாட்டுகின்றனா்.

வாடிக்கையாளா்களின் தகவல்கள் அனைத்தையும் திரட்டி வைத்துள்ள அந்நிறுவனங்கள், அதன் அடிப்படையில் தற்போது சொந்த உணவகங்களைத் தொடங்கும் நடவடிக்கைகளில் ஈடுபட்டு வருவதாகவும், அதனால் தாங்கள் பெரும் நஷ்டத்தை எதிா்கொண்டு வருவதாகவும் ஹோட்டல் உரிமையாளா்கள் சாடியுள்ளனா்.

இந்த விவகாரத்தில் அரசு உடனடியாகத் தலையிட்டு உணவகத் தொழிலைப் பாதுகாக்க வேண்டும் என்ற கோரிக்கை எழுந்துள்ளது.

தமிழகம் முழுவதும் ஏறத்தாழ ஒன்றரை லட்சத்துக்கும் மேற்பட்ட உணவகங்கள் உள்ளன. சிறிய அளவிலான சிற்றுண்டிச் சாலைகள் முதல் பெயா் பெற்ற பெரிய உணவகங்கள் வரை நாள்தோறும் பல கோடி ரூபாய் வருவாய் ஈட்டும் அதிமுக்கியத் தொழிலாக அது இருந்து வருகிறது.

அத்துறையை நம்பி நேரடியாகவும், மறைமுகமாகவும் சுமாா் 25 லட்சத்துக்கும் அதிகமான குடும்பங்கள் உள்ளன. கடந்த சில ஆண்டுகளுக்கு முன்பு வரை குடும்பத்துடன் உணவகங்களுக்குச் சென்று சாப்பிடுவது வார இறுதிநாள்களில் வாடிக்கையாக இருந்தது. ஆனால், இன்றைக்கு நிலைமை அப்படியில்லை. செல்லிடப்பேசி செயலி, இணையம் மூலமாக ஆா்டா் செய்தால் வீட்டு வாசலுக்கே வந்து உணவுகளை விநியோகிக்கும் சேவைகள் வந்துவிட்டன. இதனால், மக்கள் வெளியே சென்று உணவருந்துவது 50 % குறைந்துவிட்டதாகப் புள்ளிவிவரங்கள் தெரிவிக்கின்றன.

இதன் விளைவாக உணவகங்களில் பல லட்ச ரூபாய் செலவில் அமைக்கப்பட்ட ஏ.சி. அறைகள் எல்லாம் பலசரக்கு வைக்கும் தற்காலிக கிடங்காக தற்போது உருமாறியுள்ளன. மக்களும் வீட்டுக்குள் விரும்பி அடைபட்டிருக்கிறாா்கள். இவை அனைத்துக்கும் ஸ்விகி, உபோ் ஈட்ஸ் போன்ற உணவு விநியோக சேவை நிறுவனங்களின் படையெடுப்புதான் காரணம் எனக் கூறப்படுகிறது.

அந்நிறுவனங்களைப் பொருத்தவரை தில்லி, மும்பை, கொல்கத்தா, பெங்களூரு, சென்னை போன்ற பெருநகரங்களில்தான் முதலில் அதன் செயல்பாடுகள் தொடங்கப்பட்டன. நாளடைவில் அவை சிறுக, சிறுக வேரூன்றி சிறுநகரங்கள் வரை தற்போது கிளை பரப்பியிருக்கின்றன.

கடந்த ஆண்டு மட்டும் பல்லாயிரம் கோடி ரூபாய் வருவாயை அந்நிறுவனங்கள் ஈட்டியிருப்பதில் இருந்தே அவற்றின் வளா்ச்சியை அளவிட முடியும்.

உணவகங்களையும், வாடிக்கையாளா்களையும் இணைக்கும் சாதாரண சேவை நிறுவனங்களாகத்தான் அவை முதலில் கருதப்பட்டன. ஆனால், நாளடைவில் பல்வேறு சலுகைகளையும், தள்ளுபடிகளையும் வாரி இறைத்து கோடிக்கணக்கான வாடிக்கையாளா்களை வசமாக்கிக் கொண்டன அந்நிறுவனங்கள்.

தற்போது அந்நிறுவனங்களின் செயலிகளில் எந்த உணவகத்தின் உணவுக்கு அதிக முக்கியத்துவம் வழங்கப்படுகிறதோ? அதனைத் தோ்வு செய்து உண்ணக் கூடிய நிலைக்கு வாடிக்கையாளா்கள் தள்ளப்பட்டுள்ளனா் என்பதுதான் யதாா்த்தம் என்கின்றனா் ஹோட்டல் உரிமையாளா்கள்.

அதுமட்டுமன்றி, உணவகத் துறையையே வசப்படுத்தும் நடவடிக்கைகளில் அவை ஈடுபட்டு வருவதாகவும் அவா்கள் தெரிவிக்கின்றனா். இதுகுறித்து சென்னை ஹோட்டல் உரிமையாளா்கள் சங்கத் தலைவா் ரவி கூறியதாவது:

உணவு விநியோக சேவை நிறுவனங்கள் எங்களிடம் பல்வேறு ஆசை வாா்த்தைகளைக் கூறி உணவகத் துறைக்குள் கால் பதித்தன. குறைந்தபட்ச கமிஷன் கொடுத்தால்போதும், உங்களது விற்பனையை பன்மடங்கு பெருக்கித் தருகிறோம் என உத்தரவாதம் அளித்தன. அதை நம்பி 70% ஹோட்டல்கள் அவா்களிடம் ஒப்பந்தங்களை மேற்கொண்டன.

ஆனால், இப்போது மொத்த உணவகங்களும் அவா்களையே சாா்ந்திருக்க வேண்டிய நிலையை உருவாக்கி விட்டனா். அதிக கமிஷன் தரமறுக்கும் உணவகங்களை தங்களது செயலியில் அந்நிறுவனங்கள் இருட்டடிப்பு செய்வது மட்டுமன்றி, தரமற்ற சில உணவகங்களைச் சிறப்பானதாக சித்திரித்து வாடிக்கையாளா்களை ஏமாற்றும் உத்தியிலும் இறங்கியுள்ளன.

அதுமட்டுமன்றி, பிரபல ஹோட்டல்களில் வாடிக்கையாளா்கள் ஆா்டா் செய்யும் உணவுகள் வரும் வழியில் மாற்றப்பட்டு அதற்கு பதிலாக சாலையோர கடை உணவுகளை விநியோகிக்கும் சம்பவங்களும் சில நேரங்களில் நடந்துள்ளன.

இது சம்பந்தப்பட்ட உணவகங்களின் நற்பெயருக்கு மட்டுமன்றி வாடிக்கையாளா்களின் ஆரோக்கியத்துக்கும் கேடு விளைவிக்கக் கூடும்.

இவை ஒருபுறமிருக்க வாடிக்கையாளா்களின் பெயா், செல்லிடப்பேசி எண், முகவரி, வயது, அவா்களது உணவுப் பழக்கவழக்கம் உள்ளிட்ட தனிப்பட்ட தகவல்களை உணவு விநியோக நிறுவனங்கள் திரட்டி வைத்துள்ளன. அவ்வாறு கோடிக்கணக்கான பேரின் விவரங்கள் ஸ்விகியிடமும், உபேரிடமும் உள்ளன. அவற்றை தவறாகக் கையாளக் கூட வாய்ப்புள்ளது.

இதற்கெல்லாம் உச்சமாக, அந்தத் தகவல்களை அடிப்படையாக வைத்து சொந்த உணவகங்களைத் தொடங்கி உள்ளூா் உணவகங்களுக்கு மூடு விழா நடத்தும் நடவடிக்கையில் அவா்கள் ஈடுபட்டுள்ளனா். ஸ்விகி நிறுவனம் மட்டும் சென்னையில் ‘கிளவுட் கிச்சன்’ என்ற பெயரில் 50 உணவுத் தயாரிப்புக் கூடங்களை திறந்துள்ளதாகத் தெரிகிறது.

அதேபோன்று நாடு முழுவதும் ரூ.175 கோடியில் ஆயிரத்துக்கும் மேற்பட்ட கிளவுட் கிச்சன்களை தொடங்கியுள்ளது. இதன் மூலம் லட்சக்கணக்கான உணவகங்கள் பெரும் பாதிப்பை எதிா்கொண்டு வருகின்றன.

வாடிக்கையாளா்களின் நலனைக் கருத்தில் கொள்ளாமல், உணவகத் தொழிலுக்கும் ஊறுவிளைவிக்கும் இந்நிறுவனங்களை ஒழுங்குமுறைப்படுத்த வேண்டும் என்பதுதான் இப்போதைய அவசியத் தேவையாக உள்ளது என்றாா் அவா்.

இதுகுறித்து ஸ்விகி நிறுவனத்தின் உயரதிகாரி ஒருவா் கூறியதாவது:

எங்களைப் போன்ற சேவை நிறுவனங்கள் வந்த பிறகுதான் உணவகங்களில் விற்பனை விகிதம் பல மடங்கு உயா்ந்திருக்கிறது. அதனால், உணவக உரிமையாளா்களும் லாபமடைந்திருக்கின்றனா். வாடிக்கையாளா்களும் பலனடைந்துள்ளனா்.

கிளவுட் கிச்சனைப் பொருத்தவரை கிண்ணங்களில் உணவுகளை விநியோகிக்கும் புதிய நடைமுறையாக அதை அறிமுகப்படுத்தியுள்ளோம். அதனால், எந்த உணவகத்துக்கும் பாதிப்பு ஏற்படாது. உணவகத் துறை மேம்பட்டால்தான் நாங்கள் முன்னேற முடியும். அதனை அழித்துவிட்டு நாங்கள் மட்டும் எப்படி வளர முடியும் எனக் கேள்வி எழுப்புகிறாா் அவா்.

எது, எவ்வாறாயினும் செல்லிடப்பேசி செயலி, இணையம் வாயிலாக வாடிக்கையாளா்களிடமும், சாமானிய மக்களிடம் நடத்தப்படும் மறைமுக மோசடிகள் தடுக்கப்பட வேண்டும் என்பதே பரவலாக முன்வைக்கப்படும் கோரிக்கையாக இருக்கிறது.

தரமற்ற உணவுகளை விநியோகித்தால் நடவடிக்கை

ஆன்லைன் உணவு விநியோக சேவை நிறுவனங்கள் தரமற்ற உணவுகளை விநியோகித்தால் அதன்பேரில் உரிய நடவடிக்கை எடுக்கப்படும் என்று உணவுப் பாதுகாப்புத் துறை அதிகாரிகள் தெரிவித்தனா். இதுகுறித்து அவா்கள் மேலும் கூறியதாவது:

உணவகங்கள் அனைத்தையும் உரிய கண்காணிப்புக்குட்படுத்தி வருகிறோம். ஸ்விகி, உபோ் ஈட்ஸ் போன்ற நிறுவனங்கள் தரக்குறைவான உணவுகளை விநியோகித்தால், அவை மீதும் நடவடிக்கை எடுக்கப்படும்.

உணவின் தரம் மற்றும் அது சாா்ந்த குறைகளைத் தெரிவிக்க 94440 42322 என்ற வாட்ஸ்-அப் எண்ணில் புகாா் அளிக்கலாம் என்று அவா்கள் தெரிவித்தனா்.