தூய்மைப் பணியாளா்களுக்கு அடையாள அட்டை: நலவாரியத் தலைவா் அறிவுறுத்தல்

செங்கல்பட்டு: செங்கல்பட்டு மாவட்ட ஆட்சியா் அலுவலகத்தில் திங்கள்கிழமை தூய்மைப் பணியாளா்களுக்கான நலத்திட்ட உதவிகள் வழங்கும் நிகழ்ச்சி நடைபெற்றது.

நிகழ்ச்சிக்கு தூய்மைப் பணியாளா் நல வாரியத் தலைவா் திம்மம்பட்டி ஆறுச்சாமி தலைமை வகித்தாா். ஆட்சியா் தி. சினேகா, தூய்மை பணியாளா் நலவாரிய துணைத் தலைவா் கனிமொழி பத்மநாபன், திட்ட இயக்குநா் (ஊரக வளா்ச்சி முகமை) ஸ்ரீதேவி, ஆட்சியரின் நோ்முக உதவியாளா் (பொது) காஜா சாகுல் அமீது, தூய்மைப் பணியாளா் நலவாரிய உறுப்பினா்கள் ஜி.கே.ராஜன், ஹரிஸ் குமாா் உள்ளிட்டோா் முன்னிலை வகித்தனா்.

தூய்மைப் பணியாளா்களின் குறைகளை நலவாரியத் தலைவா் ஆறுச்சாமி கேட்டறிந்தாா். உள்ளாட்சி அமைப்புகளில் அடையாள அட்டைகளை தூய்மைப் பணியாளா்களுக்கு விரைவாக வழங்க அறிவுறுத்தினாா்.

நல வாரியத் தலைவா் பின்னா் கூறியது: தூய்மைப் பணியாளா்களுக்கு பாதுகாப்பு கவசங்கள் கட்டாயம் தர வேண்டும். தனியாா் நிறுவனங்களில் பணிபுரியும் தொழிலாளா்களை தன்னாா்வ தொண்டு நிறுவனங்கள் மூலமாக அடையாளப்படுத்தப்பட்டு அவா்களுக்கும் நல வாரிய அட்டை வழங்க ஏற்பாடுகளை மேற்கொண்டு வருகிறோம்.

அடுக்குமாடி குடியிருப்புகள் மற்றும் தனியாா் தொழிற்சாலைகளில் பணிபுரிபவா்கள் என பல்வேறு தளங்களில் பணிபுரியும் துப்புரவு பணியாளா்களை கண்டறிந்து அவா்களுக்கும் அட்டைகளை வழங்க ஏற்பாடுகள் செய்யப்பட்டுள்ளது.

தூய்மைப் பணியாளா்கள் நலம் காக்கும் ஸ்டாலின் முகாம்களில் கலந்து கொண்டு முழுஉடல் பரிசோதனை செய்து கொள்ளலாம் என்றாா்.