ஹெச்-1பி விசா கட்டணத்தை ரூ.88 லட்சமாக டிரம்ப் உயா்த்தியது ரத்து: அமெரிக்க உயா் நீதிமன்றம் உத்தரவு

ஹெச்-1பி நுழைவு இசைவு (விசா) கட்டணத்தை ஆண்டுக்கு ரூ. 88 லட்சமாக அமெரிக்க அதிபா் டொனால்ட் டிரம்ப் உயா்த்தியதை ரத்து செய்து அமெரிக்க உயா் நீதிமன்றம் அதிரடி உத்தரவைப் பிறப்பித்துள்ளது.

‘அமெரிக்க நாடாளுமன்றத்தின் ஒப்புதலைப் பெறாமல் ஹெச்-1பி நுழைவு இசைவு கட்டணத்தை உயா்த்தியது சட்டவிரோதமானது’ என்றும் நீதிமன்றம் சுட்டிக்காட்டியது.

உலகம் முழுவதும் இருந்து திறமையான தொழில்நுட்ப நிபுணா்களைத் தோ்வு செய்து அவா்களுக்கு அதிக ஊதியத்துடன் அமெரிக்காவில் வேலை வழங்க ஹெச்-1பி நுழைவு இசைவு நடைமுறையை அந் நாட்டு நிறுவனங்கள் பயன்படுத்தி வருகின்றன. இந்தத் திட்டத்தின் மூலம் அமெரிக்கா சென்று தகவல் தொழில்நுட்பத் துறையில் ஏராளமான இந்தியா்கள் பணியாற்றி வருகின்றனா். இதில், சிறப்பாகப் பணியாற்றுபவா்கள் நிரந்தரக் குடியுரிமை பெற ‘கிரீன்காா்டு’ வழங்கப்படும் வாய்ப்புள்ளது.

இந்தச் சூழலில், அமெரிக்க வேலைவாய்ப்பில் அமெரிக்கா்களுக்கு முன்னுரிமை என்ற கொள்கையின் கீழ், ஹெச்-1பி நுழைவு இசைவு கட்டணத்தை அமெரிக்க அதிபா் டிரம்ப் பல மடங்காக உயா்த்தி கடந்த ஆண்டு செப்டம்பரில் உத்தரவிட்டாா்.

அதன்படி, ரூ. 1.47 லட்சமாக இருந்த ஹெச்-1பி நுழைவு இசைவு கட்டணத்தை, ஆண்டுக்கு ரூ. 88 லட்சம் (ஒரு லட்சம் டாலா்) என்ற அளவில் உயா்த்தி உத்தரவிட்டாா். இந்தக் கட்டண உயா்வு கடந்த ஆண்டு செப்டம்பா் 21-ஆம் தேதி முதல் அமலுக்கு வந்தது.

இதற்கு, அமெரிக்காவின் தகவல் தொழில்நுட்ப நிறுவனங்கள் உள்பட பல்வேறு நிறுவனங்கள் சாா்பில் எதிா்ப்பு தெரிவிக்கப்பட்டது. ஏனெனில், ஹெச்-1பி நுழைவு இசைவு கட்டணத்தை பொதுவாக அமெரிக்க நிறுவனங்களே செலுத்தி, வெளிநாடுகளைச் சோ்ந்த தகுதியான நபா்களை பணிக்குத் தோ்வு செய்கின்றன.

இந்தக் கட்டண உயா்வுக்கு எதிராக அமெரிக்காவின் 20 மாகாணங்களைச் சோ்ந்த குழுக்கள் சாா்பில் மாஸசூசெட்ஸ் மாகாணம் பாஸ்டனில் உள்ள மாவட்ட நீதிமன்றத்தில் வழக்கு தொடரப்பட்டது. இந்த வழக்கு மாவட்ட நீதிபதி லியோ சோரோகின் முன்னிலையில் திங்கள்கிழமை விசாரணைக்கு வந்தது.

அப்போது, ‘அமெரிக்க அதிபா் டிரம்ப் அரசு குடியேற்றக் கொள்கை மற்றும் வரிகளை நிா்ணயிப்பதில் நாடாளுமன்றத்துக்கு உள்ள அதிகாரத்தை அபகரித்துள்ளது’ என்று மனுதாரா்கள் வாதிட்டனா்.

இதை ஏற்ற நீதிபதி, ‘டிரம்ப் நிா்வாகம் நிா்ணயித்துள்ள ரூ. 88 லட்சம் தொகை எவ்வாறு அழைக்கப்பட்டாலும், அது ஒரு வரிவிதிப்பு என்பதையே வெளிப்படுத்துகிறது. அந்த வகையில், நாடாளுமன்றத்தின் ஒப்புதல் பெறாமல் ஹெச்-1பி நுழைவு இசைவு நடைமுறை மீது இந்த வரி விதிப்பு செய்யப்பட்டிருப்பது தெளிவாகத் தெரிகிறது. இது சட்டவிரோதம். எனவே, ஹெச்-1பி நுழைவு இசைவு கட்டணத்தை ரூ. 88 லட்சமாக உயா்த்தியது ரத்து செய்யப்படுகிறது’ என்று தீா்ப்பளித்தாா்.

வரவேற்பு: ஹெச்-1பி வழக்கில் நீதிமன்றம் அளித்த தீா்ப்பை அமெரிக்க நாடாளுமன்ற உறுப்பினா்கள் பலா் வரவேற்றனா்.

அமெரிக்க குடியரசு கட்சியின் அலாஸ்கா எம்.பி. லிசா முா்கோவிஸ்கி கூறுகையில், ‘தகவல் தொழில்நுட்பத் துறையில் மட்டுமன்றி, திறன்மிக்க மருத்துவப் பணியாளா்கள், ஆசிரியா்கள் உள்ளிட்ட பல்வேறு துறை சாா்ந்த நிபுணா்களும் இந்த நுழைவு இசைவு மூலம் பணியமா்த்தப்படுகின்றனா். குறிப்பாக, அமெரிக்காவின் கிராமப்புறங்களில் உள்ள பல பள்ளிகள் மற்றும் மருத்துவமனைகள் தரமான ஆசிரியா்கள் மற்றும் மருத்துவப் பணியாளா்களுக்கு இந்த ஹெச்-1பி நுழைவு இசைவு திட்டத்தையே நம்பியுள்ளன. அந்த வகையில், பள்ளிகள் ஆசிரியா் தெரிவை நடத்த உள்ள நிலையில், நீதிமன்றத்தின் இந்தத் தீா்ப்பு மிகுந்த வரவேற்புக்குரியது’ என்றாா்.

நாட்டுக்குப் பெரும் பாதிப்பு: டிரம்ப்

வாஷிங்டன், ஜூன் 9: ‘ஹெச்-1பி நுழைவு இசைவு கட்டண உயா்வை ரத்து செய்து ஃபெடரல் நீதிமன்றம் அளித்த தீா்ப்பு நாட்டுக்கு மிக மோசமான பாதிப்பை ஏற்படுத்தும்’ என்று அதிபா் டிரம்ப் தெரிவித்தாா்.

நீதிமன்ற தீா்ப்பு குறித்து நியூயாா்க்கில் செய்தியாளா்களைச் சந்தித்த டிரம்ப் கூறியதாவது: இந்த நீதிபதிகள் அரசு நிா்வாகத்துக்குப் பெரும் சிரமத்தை ஏற்படுத்துகின்றனா். இது மிகவும் விசித்திரமான, மோசமான விஷயம். நாட்டுக்கு மிக மோசமான பாதிப்பை ஏற்படுத்துகின்றனா் என்றாா்.

மேல்முறையீடு: அமெரிக்க அதிபரின் அலுவலகமான வெள்ளை மாளிகையின் செய்தித்தொடா்பாளா் டெய்லா் ரோஜா்ஸ் கூறுகையில், ‘ஹெச்-1பி நுழைவு இசைவு திட்டம் பல ஆண்டுகளாக தவறாகப் பயன்படுத்தப்பட்டு வந்தது. இதை சரிப்படுத்த அதிபா் டிரம்ப் நடவடிக்கை மேற்கொண்டாா். வாஷிங்டனில் உள்ள ஒரு நீதிமன்றமும் ஏறக்குறைய இதேபோன்ற தீா்ப்பை வழங்கியுள்ளது. மேல்முறையீட்டின் மூலம் இந்த தீா்ப்புகள் ரத்து செய்யப்படும் என்பதை அரசு நிா்வாகம் உறுதியாக நம்புகிறது’ என்றாா்.

தொடா் பின்னடைவு!

அமெரிக்க அரசின் அதிரடி நடவடிக்கைகளை அந் நாட்டு நீதிமன்றங்கள் ரத்து செய்து வருவது, டிரம்ப் நிா்வாகத்துக்கு தொடா் பின்னடைவாகப் பாா்க்கப்படுகிறது.

அமெரிக்க அதிபராக இரண்டாவது முறையாகப் பதவியேற்ற டிரம்ப், இந்தியா உள்பட 60 நாடுகள் அமெரிக்காவுடன் நியாயமற்ற முறையில் வா்த்தக நடைமுறைகளைக் கடைப்பிடிப்பதாக குற்றஞ்சாட்டி பரஸ்பர வரிவிதிப்பு நடவடிக்கையை மேற்கொண்டாா். அதன்படி, இந்தியாவிலிருந்து இறக்குமதி செய்யப்படும் பொருள்கள் மீது முதல் கட்டமாக 25 சதவீத வரியை விதித்தாா். பின்னா், உக்ரைன் மீது போா் தொடுக்கும் ரஷியாவிடமிருந்து கச்சா எண்ணெய்யை வாங்கி அந்தப் போருக்கு உதவுவதாகக் குற்றஞ்சாட்டி இந்திய பொருள்கள் மீது கூடுதலாக 25 சதவீத வரியை விதித்தாா்.

இதற்கு எதிராக அமெரிக்க உச்சநீதிமன்றத்தில் ஏராளமான மனுக்கள் தாக்கல் செய்யப்பட்டன. இந்த மனுக்களை கடந்த பிப்ரவரி 20-ஆம் தேதி விசாரித்த உச்சநீதிமன்றம், டிரம்ப் விதித்த வரிகள் செல்லாது என்று தீா்ப்பளித்தது.

இந்தத் தீா்ப்பைத் தொடா்ந்து, உலக நாடுகள் மீது மாற்று வழிகளில் இந்த பரஸ்பர வரி விதிப்பை அமெரிக்கா மேற்கொள்ளும் என்று அறிவித்த டிரம்ப், இந்தியா உள்ளிட்ட உலக நாடுகளின் பொருள்கள் மீது புதிய சீரான 10 சதவீத பரஸ்பர வரியை பிப்ரவரி 24-ஆம் தேதி முதல் 150 நாள்களுக்கு விதித்தாா்.

இதை எதிா்த்து அமெரிக்காவின் சா்வதேச வா்த்தகத்துக்கான நீதிமன்றத்தில் வழக்கு தொடரப்பட்டது. இந்த வழக்கை விசாரித்த நீதிமன்றம், ‘உலக நாடுகள் மீது புதிய 10 சதவீத சீரான பரஸ்பர வரி விதிப்பு செல்லாது’ என்று தீா்ப்பளித்தது.

தற்போது, ஹெசி-1பி நுழைவு இசைவு கட்டண உயா்வை உயா்நீதிமன்றம் ஒன்று ரத்து செய்து உத்தரவிட்டுள்ளது. இது டிரம்ப் நிா்வாகத்துக்கான தொடா் பின்னடைவாகப் பாா்க்கப்படுகிறது.

இந்திய வம்சாவளியினா் வரவேற்பு: அமெரிக்காவில் உள்ள இந்தியா மற்றும் இந்திய வம்சாவளியினா் கல்வி அறக்கட்டளையின் செயல் இயக்குநா் சஞ்சீவ் ஜோஷிபுரா கூறுகையில், ‘நீதிமன்ற தீா்ப்பு ஹெச்-1பி நுழைவு இசைவு தொடா்பான அனைத்துத் தரப்புனருக்கும் நிம்மதி அளித்துள்ளது. ஆனால், இந்த உத்தரவு இறுதியானதா என்பது கேள்விக்குரியதே’ என்றாா்.