ஆடுகளத்தை விட்டு வெளியேறிய ஹார்திக் பாண்டியா; பந்துவீசிய விராட் கோலி!

பந்தினை தடுத்தபோது கணுக்காலில் அடிபட்டதால் ஹார்திக் பாண்டியா ஆடுகளத்தை விட்டு வெளியேறி அவருக்குப் பதிலாக சூர்யகுமார் யாதவ் ஃபீல்டிங்குக்கு வந்தார்.

உலகக் கோப்பையின் இன்றையப் போட்டியில்  இந்தியா - வங்கதேச அணிகள் விளையாடி வருகின்றன. இந்தப் போட்டியில் டாஸ் வென்ற வங்கதேசம் பேட்டிங்கை தேர்வு செய்தது. இரு அணிகளுக்கும் இடையிலான இந்தப் போட்டியில் ஆட்டத்தின் 9-வது ஓவரை ஹார்தி பாண்டியா வீசினார். அந்த ஓவரின் 3-வது பந்தை வங்கதேச அணியின் பேட்ஸ்மேன் லிட்டன் தாஸ் நேராக அடிக்க அதனை காலால் தடுக்க முயன்ற ஹார்திக் பாண்டியா கால் இடறி விழுந்தார். அதில் அவருக்கு கணுக்காலில் அடிபட்டது.

இதையும் படிக்க: எதிர்பார்ப்புகளைப் பூர்த்தி செய்ததா லியோ? திரை விமர்சனம்

இந்திய அணியின் மருத்துவக் குழு முதலுதவி செய்தும் அவருக்கு கால்களை ஊன்றி நடப்பதில் சிரமம் இருந்ததால் அவர் ஆடுகளத்தை விட்டு வெளியேறினார். அவருக்குப் பதிலாக சூர்யகுமார் ஃபீல்டிங்குக்கு வந்தார்.

ஹார்திக் 9-வது ஓவரில் 3 பந்துகளை மட்டுமே வீசியிருந்தார். மீதமுள்ள 3 பந்துகளை ரசிகர்களின் ஆரவாரத்துக்கு மத்தியில் வீச வந்தார் விராட் கோலி. அந்த ஓவரில் மீதமுள்ள மூன்று பந்துகளை வீசிய விராட் கோலி 2 ரன்கள் விட்டுக் கொடுத்தார். 

10 ஓவர்கள் முடிவில் வங்கதேசம் விக்கெட் இழப்பின்றி 63 ரன்கள் எடுத்திருந்தது குறிப்பிடத்தக்கது.