பிக் பாஸ் நிகழ்ச்சியில் சக போட்டியாளர்கள் என்னைக் கொடுமைப்படுத்தினார்கள்: காவல் நிலையத்தில் நடிகை மதுமிதா புகார்!

பிக் பாஸ் நிகழ்ச்சியில் சக போட்டியாளர்கள் என்னைக் கொடுமைப்படுத்தினார்கள். அதை கமல் ஹாசனும் கண்டிக்கவில்லை என நடிகை மதுமிதா காவல்நிலையத்தில் புகார் அளித்துள்ளார்.

விஜய் தொலைக்காட்சியில் கமல்ஹாசன் தொகுத்து வழங்கும் பிக் பாஸ் சீசன் 3 சமீபத்தில் தொடங்கியுள்ளது. விஜய் டி.வி.யில் கடந்த இரண்டு ஆண்டுகளாக ஒளிபரப்பாகி வந்த பிக் பாஸ் நிகழ்ச்சிக்கு ரசிகர்களிடையே பரவலான வரவேற்பு உண்டு. தொலைத் தொடர்பு, இணையம், தொலைக்காட்சி என எந்தத் தகவல் தொடர்பு சாதனங்களும் இல்லாமல் 100 நாள்கள் இருப்பதுதான் இந்த நிகழ்ச்சியின் போட்டி விதி. கடந்த இரண்டு ஆண்டுகளாக நிகழ்ச்சியைத் தொகுத்து வழங்கிய கமல்ஹாசன், இந்த முறையும் தொகுத்து வழங்கி வருகிறார். பிக் பாஸ் முதல் சீஸனை நடிகர் ஆரவ்வும் கடந்த வருட போட்டியை நடிகை ரித்விகாவும் வென்றார்கள். சமூகவலைத்தளங்களில் பிக் பாஸ் குறித்த விவாதங்கள் அதிகமாக இடம்பெறுவதால் இதில் இடம்பெற்ற போட்டியாளர்கள் அதிகக் கவனம் பெற்று புகழை அடைந்துள்ளார்கள்.

தற்கொலை செய்துகொள்ள முயற்சி செய்த காரணத்துக்காக பிக் பாஸ் நிகழ்ச்சியிலிருந்து வெளியேற்றப்பட்டார் நடிகை மதுமிதா. நடிகை ஷெரின் மற்றும் இதர போட்டியாளர்களுடன் ஏற்பட்ட வாக்குவாதத்தின் காரணமாக தன் கையைத் தானே அறுத்துக்கொண்டார் மதுமிதா. இதனால் அவர் நிகழ்ச்சியிலிருந்து வெளியேற்றப்பட்டார். இந்நிலையில் நசரத் பேட்டை  காவல் நிலையத்தில் தபால் மூலம் நடிகை மதுமிதா புகார் அளித்துள்ளார். அதில் அவர் கூறியுள்ளதாவது:

பிக் பாஸ் நிகழ்ச்சியில் சக போட்டியாளர்கள் என்னைக் கொடுமைப்படுத்தினார்கள். இதைத் தொகுப்பாளர் கமல் ஹாசனும் கண்டிக்கவில்லை. என்னை மன உளைச்சலுக்கு ஆளாக்கி 56-வது நாளில் வலுக்கட்டாயமாக போட்டியிலிருந்து வெளியேற்றினார்கள் என்று புகாரில் கூறியுள்ளார்.