'காலா' டீஸர் ரிலீஸ் தேதியை அறிவித்தார் தயாரிப்பாளர் தனுஷ்!

'கபாலி' படத்தின் வெற்றியைத் தொடர்ந்து ரஜினி மற்றும் இயக்குநர் பா.ரஞ்சித் கூட்டணியில் உருவாகியுள்ள படம் 'கரிகாலன்' என்கிற 'காலா'. தமிழ், ஹிந்தி, தெலுங்கு என 3 மொழிகளில் இப்படம் வெளியாகிறது. 

நடிகர் தனுஷின் வுண்டர்பார் ஃபிலிம்ஸ் நிறுவனம் இத்திரைப்படத்தை தயாரிக்கிறது. சந்தோஷ் நாராயணன் இசையமைத்துள்ளார்.

சமுத்திரக்கனி, நானா படேகர், சம்பத், சாயாஜி ஷின்டே, அருள் தாஸ், ஹூமா குரேஷி, திலீபன், அரவிந்த் ஆகாஷ், சுதான்ஷூ பாண்டே, ஈஸ்வரி ராவ், சாக்‌ஷி அகர்வால் உள்ளிட்டோர் நடித்துள்ளனர்.

இப்படம் வருகிற ஏப்ரல் 27-ந் தேதி வெளியாகும் என்று அதன் தயாரிப்பாளரும், நடிகருமான தனுஷ் பிப்ரவரி 10-ந் தேதி ட்வீட் செய்தார். இச்செய்தி ரஜினி ரசிகர்களிடம் உற்சாகத்தையும், பரபரப்பையும் ஏற்படுத்தியது. 

இந்நிலையில், காலா டீஸர் தொடர்பான புதிய அறிவிப்பை தனுஷ் தற்போது வெளியிட்டுள்ளார். அதில், "இந்த கரிகாலனோட முழு ரவுடித்தனத்த பாத்தது இல்ல..ல ..? பாப்பீங்க!!!" என்கிற பஞ்ச் வசனத்துடன் மார்ச் 1-ந் தேதி காலா டீஸர் வெளியாகும் என்று தனது ட்விட்டர் பக்கத்தில் தெரிவித்துள்ளார்.

இதற்கிடையில் ரஜினி - ஷங்கர் கூட்டணியில் உருவாகி வரும் 2.O படத்தின் வெளியீடு கிராபிக்ஸ் பணிகள் காரணமாக தொடர்ந்து தள்ளி வைக்கப்பட்டு வருகிறது. அதுமட்டுமல்லாமல் தீவிர அரசியலில் ஈடுபடப்போவதாக நடிகர் ரஜினிகாந்த் அறிவித்துள்ள நிலையில், சன் பிக்சர்ஸ் தயாரிப்பில் கார்த்திக் சுப்புராஜ் இயக்கத்தில் புதுப்படம் ஒன்றில் நடிக்க பிப்ரவரி 23-ந் தேதி ஒப்பந்தமாகியுள்ளது குறிப்பிடத்தக்கது.