கற்கத் தடம் அறிவோம்!

பிளஸ் 2 வகுப்பு முடித்த மாணவா்களுக்கு வழிகாட்டும் வகையில், தமிழ்நாடு அரசு, பொது நூலக இயக்ககம் மற்றும் சென்னை மாவட்ட நூலக ஆணைக்குழு இணைந்து கல்லூரி மற்றும் பல்கலைக்கழக மாணவா்களுக்கான மாபெரும் கோடைக்காலப் பயிற்சியை நடத்தியது.

நிகழ்வில் ‘உயா் கல்வியில் புதிய வாய்ப்புகளும், அரசின் திட்டங்களும்’ என்ற தலைப்பில் உரைகள் நிகழ்த்தப்பட்டன. திக்குத் தெரியாமல் தவிக்கும் மாணவா்கள் பயனடைய வேண்டும் என்ற நோக்கத்துடன் இந்நிகழ்ச்சி நடத்தப்பட்டது.

பிளஸ் 2 முடித்த மாணவா்கள் தங்கள் எதிா்காலம் குறித்த தெளிவைப் பெறவேண்டும். இவா்களில் கிராமப்புற மாணவா்கள் தகுந்த வழிகாட்டுதல் இன்றி தவித்துப்போகிறாா்கள். ‘என்ன படிக்கலாம்?’ என்ற வழிகாட்டு நிகழ்ச்சிகள் நடத்தப்படுகின்றன.

கல்லூரிகள், அரங்குகள் அமைத்து மாணவா்களுக்கு வழிகாட்டின. யூ-டியூப் சேனல்களில் கல்வியாளா்கள் பேசுகிறாா்கள். உயா் கல்வி நிறுவனங்களில் சோ்க்கை நடைபெறுவது எப்படி?, அவா்கள் எழுத வேண்டிய நுழைவுத் தோ்வுகள், வேலைவாய்ப்பை அள்ளித்தரும் துறைகள் என்ன என்பது குறித்தும், மாணவா்கள் வளா்த்துக் கொள்ள வேண்டிய திறன்கள், கல்வி உதவித்தொகை பெறும் முறைகள் என்று பல பயனுள்ள ஆலோசனைகள் வழங்கப்பட்டுக் கொண்டேதான் இருக்கின்றன.

பிளஸ் 2 பொதுத்தோ்வு முடிவுகள் வெளியானவுடன் உயா் கல்விக்கு வழிகாட்டும் வகையில் 14417 என்ற தகவல் மைய எண் அறிவிக்கப்பட்டது. கல்லூரிக்கு விண்ணப்பிக்கும் முறை, கல்விக் கட்டணம், உதவித் தொகை போன்றவை குறித்து வழிகாட்டுதல் பெறலாம். இது பள்ளிக் கல்வித் துறையின் சிறந்த முன்னெடுப்பாகும்.

நகா்ப்புறத்தில் உள்ள படித்த பெற்றோா் கல்லூரியின் உள்கட்டமைப்பு, கல்லூரியின் தரம், வேலைவாய்ப்பு, மாநில அளவில் கல்லூரியின் ரேங்கிங் ஆகிய பலவற்றையும் சீா்தூக்கிப் பாா்த்து தங்கள் வாரிசுகளை சோ்க்கிறாா்கள். பெண்கள் என்றால் விடுதிப் பாதுகாப்பை உறுதி செய்துகொள்கிறாா்கள். தோ்வு முடிவுகள் வெளிவருவதற்கு முன்பே கல்லூரியைத் தோ்ந்தெடுத்து வைத்துக்கொள்கிறாா்கள்.

நல்ல மதிப்பெண்கள் வைத்திருந்தால் நம்பிக்கையுடன் கலந்தாய்வுக்காகக் காத்திருக்கிறாா்கள். அவா்கள் விரும்பிய கல்லூரி கிடைத்து விடுகிறது. மிகவும் வசதியும், செல்வாக்கும் உள்ளவா்கள் மதிப்பெண் குறித்துக் கவலைப்படுவதில்லை. எவ்வளவு குறைந்த மதிப்பெண் பெற்றிருந்தாலும் சிறந்த கல்லூரிகளில் இடம் வாங்கி விடுகிறாா்கள்; பணமும், பரிந்துரையும் கைகொடுக்கிறது.

நடுத்தர வா்க்கத்தினா் குழப்பத்தில் ஆழ்ந்து போகிறாா்கள். கட்-ஆஃப் மதிப்பெண் குறைந்துபோனால், கலந்தாய்வு வரை காத்திருக்க பயம்; நல்ல கல்லூரி கிடைக்காமல் போய்விடும் என்று நினைத்து, தங்களுக்குப் பிடித்தமான தனியாா் பொறியியல் கல்லூரிகளில் சோ்க்கை வாங்கி விடுகிறாா்கள். சில சமயம் அந்த கட்-ஆஃப் மதிப்பெண்ணுக்கு கலந்தாய்வில் நல்ல கல்லூரி கிடைக்கும் என்று எவ்வளவு எடுத்துச் சொன்னாலும் கேட்காமல் நிா்வாக ஒதுக்கீட்டில் சோ்க்கை பெறத் துடிக்கிறாா்கள்.

தங்கள் நண்பா்கள், உறவினா்கள், மகனின் நண்பா்கள் பணம் கட்டி, நிா்வாக ஒதுக்கீட்டில் இடம் வாங்கி விட்டதைப் பாா்த்து மற்றவா்களும் அவ்வாறே செய்து விடுகிறாா்கள். கல்லூரியில் இடம் பிடிக்க அலைந்து தேவை இல்லாமல் பணத்தைச் செலவழிக்கிறாா்கள்.

கிராமப்புற மாணவா்கள்தான் விவரம் இல்லாதவா்கள்; அவா்களின் பெற்றோா் விவரம் இல்லாதவா்கள்; அவா்களின் உறவு வட்டமும் போதிய தெளிவு இல்லாதவா்கள்; ஆகவே, அப்பிள்ளைகள் தங்களின் பள்ளி ஆசிரியா்களை நாடுகிறாா்கள். வேறு சிலா் தங்கள் நண்பா்கள் எந்தக் கல்லூரியை, எந்தப் பிரிவைத் தோ்ந்தெடுக்கிறாா்களோ, அதே கல்லூரியில் சோ்ந்து விடுகிறாா்கள்.

பள்ளி ஆசிரியா்களின் பொறுப்பு இங்கே அதிகமாகிறது. முதலில்அவா்களுக்குக் ‘கலந்தாய்வு’, ‘சோ்க்கை’, ‘நிா்வாக ஒதுக்கீடு’ குறித்த தெளிவு இருக்க வேண்டும்.கல்வி வழிகாட்டு நிகழ்ச்சிகள் அனைத்துக்கும் ஆசிரியா்களின் வருகை கட்டாயமாக்கப்பட வண்டும். அரசின் திட்டங்கள் குறித்து அவா்கள் நன்கு தெரிந்து வைத்திருக்க வேண்டும்.

ஒரு சம்பவம்: விவரம் அறியாத விவசாயக் கூலி ஒருவரின் மகன்; அவன் பிளஸ் 2 வில் அரசு உதவி பறும் பள்ளி ஒன்றில் ஆங்கில வழியில் படித்தான். அடுத்து எதில் சேருவது? என்ற குழப்பம். அந்தப் பள்ளியின் ஆசிரியா், அவா் வகுப்பில் தோ்ச்சி பெற்ற 10 மாணவா்களை ஒரு தனியாா் கலைக் கல்லூரியில் ரூ.1,000 செலுத்தி விண்ணப்பிக்க வைத்தாா்.

அவா் தோ்ந்தெடுக்கச் சொன்ன பாடப் பிரிவுக்கு வேலை கிடைப்பது அரிது. அந்தக் கல்லூரி குறித்த எந்த விவரமும் அந்த மாணவருக்குத் தெரியவில்லை. அவன் பெற்றுள்ள மதிப்பெண்ணுக்கு இடஒதுக்கீடு அடிப்படையில், கலந்தாய்வு மூலம், அரசு பொறியியல் கல்லூரியில் இடம் கிடைக்கும். உதவித் தொகை கிடைக்கும்.

முதல் தலைமுறைப் பட்டதாரி என்ற வகையில் கல்விக் கட்டணமும் கிடையாது. அந்தக் குடும்பத்தில் அவன் முதல் பொறியாளராக வந்தால், அவா்களின் வாழ்க்கைத் தரம் மேம்பட்டுவிடும். எதையும் அறியாத மாணவரை, அந்த ஆசிரியா் தனியாா் கலை அறிவியல் கல்லூரியில் சோ்த்துவிட நினைப்பது பெரும் குற்றம். தனியாா் கல்லூரிகள், பிளஸ் 2 ஆசிரியா்கள், தலைமை ஆசிரியா்களை அணுகி, தங்கள் கல்லூரியில் மாணவா்களை சோ்த்துவிடச் சொல்லி நயந்து கேட்கிறாா்கள்.

பல தனியாா் பொறியியல் கல்லூரி மற்றும் பாலிடெக்னிக் கல்லூரிகளில் மாணவா் சோ்க்கைக்காக இன்னொரு முறையைப் பின்பற்றுகிறாா்கள். கல்லூரியில் பணிபுரியும் ஒவ்வொரு ஆசிரியரும் ஐந்து மாணவா்களைச் சோ்க்க வேண்டும்; வெளிப்படையாகக் கூறினால் ‘ஆள் பிடிக்க வேண்டும்’; இதற்காக அந்த ஆசிரியா்கள் பெரும்பாடுபடுகிறாா்கள், அவ்வாறு ஆள் பிடித்து வரவில்லை என்றால் பணிநீக்கம் செய்யப்படுகிறாா்கள்; அதற்கு பயந்து வேலையை விட்டவா்களும் உண்டு.

கல்லூரியின் தரம் குறித்து அறிந்துகொள்ளாமல் சோ்த்து விடுபவா்களில் பலரும் படிப்பைப் பாதியில் விட்டு விடுகிறாா்கள். அவ்வாறு வந்துவிட்டால் அவா்களுடைய சான்றிதழ்களையும், மாற்றுச் சான்றிதழையும் பெறுவதற்கு முழு படிப்புக்கான கல்விக் கட்டணத்தைச் செலுத்தச் சொல்கிறாா்கள். அவ்வாறு பணம் செலுத்த முடியாதவா்கள் கூலி வேலைக்குப் போகும் அவலம் உண்டாகிறது.

ஆன்லைனில் கலந்தாய்வு நடைபெறுவதால், அது குறித்து மாணவா்கள் முழுவதும் தெரிந்துகொள்ள வேண்டும். மாணவா்கள் தாங்கள் சேர விரும்பும் கல்லூரியில் தங்களுக்கு விருப்பமான பாடப் பிரிவுகளின் தோ்வுகளை தமிழ்நாடு பொறியியல் சோ்க்கை இணைய தளத்தில் உள்ளீடு செய்ய வேண்டும். அவா்களது கட்-ஆஃப் மதிப்பெண், தரவரிசை ஆகியவற்றைப் பொருத்து, அவா்களது தோ்விலிருந்து இடம் வழங்கப்படுகிறது; இதற்குப் பொறுத்திருக்க வேண்டும்; பொறுமை இல்லாமல் பலரும் நிா்வாக ஒதுக்கீட்டில் பணம் செலுத்தி சோ்ந்து விடுகிறாா்கள்.

இன்னொரு சம்பவம்: ஒரு மாணவன் நல்ல கட்-ஆஃப் மதிபெண் பெற்றுள்ளான். அந்தப் பெற்றோா் நகரத்தின் மிகச் சிறந்த தனியாா் பொறியியல் கல்லூரிக்குப் போய் சோ்க்கை குறித்து விசாரித்துள்ளாா்கள். அவா்கள் கூறியது: ‘உங்கள் மகனுக்கு கலந்தாய்வின் போது நிச்சயம் எங்கள் கல்லூரியிலேயே இடம் கிடைக்கும். இதையே தோ்ந்தெடுங்கள். ஆனால், முன்பணமாக ரூ.50,000 செலுத்தி உறுதி செய்துகொள்ளுங்கள். கலந்தாய்வு மூலம் வந்தால் இந்தப் பணத்தைக் கழித்துக்கொள்ளலாம். அப்படி கிடைக்காமல் போனால், நிா்வாக ஒதுக்கீட்டில் சேரும்போது, மீதமுள்ள பணத்தைச் செலுத்திவிடுங்கள்’. பணத்தைச் செலுத்திவிட்டு அவா் குழப்பத்துடன் உள்ளாா்.

இந்தப் பிரச்னைகளுக்கு தீா்வு என்ன? கல்வி வழிகாட்டு நிகழ்ச்சிகள் தோ்வு நெருங்கும் சமயத்தில் பொது அரங்கில் நடத்தப்படுகின்றன; அப்போது மாணவா்கள் தோ்வுக்குத் தயாராகிக்கொண்டு இருப்பாா்கள்; எனவே, பலா் வருவதில்லை; ஆகவே, இந்த வழிகாட்டு நிகழ்ச்சிகளைக் கல்வியாண்டின் தொடக்கத்திலேயே அந்தந்தப் பள்ளி வளாகத்திலோ, அல்லது இரண்டு, மூன்று பள்ளிகளை இணைத்து ஒரு பொது அரங்கிலோ நடத்தலாம்.

பெற்றோரை வரவழைக்க வேண்டும். கிராமப்புற மாணவா்களில் பலா் மிகச் சிறந்த மதிப்பெண் பெறுகின்றனா், அவா்களுக்கு உயா் கல்வி குறித்த வழிகாட்டுதல் அவசியம். அவா்கள் அனைவரையும் ஒன்று திரட்டி அந்தந்த மாவட்டக் கல்வி நிா்வாகம் ஆலோசனை வழங்க வேண்டும். இவா்களை தனியாா் கல்லூரிகள் ‘கொக்கி’ போட்டு இழுப்பதை, அப்போதுதான் தடுக்க முடியும்.

ஒரு தனியாா் பொறியியல் கல்லூரியின் வாயிலில் ஓா் அறிவிப்புப் பலகை வைக்கப்பட்டுள்ளது. ‘ஸ்காலா்ஷிப் அட்மிஷன் நடந்து கொண்டிருக்கிறது’ இதைப் பாா்த்த பலரும் கலந்தாய்வு வரை காத்திருக்காமல் அந்தக் கல்லூரியில் சோ்ந்து கொண்டிருக்கிறாா்கள்.

கல்வி வியாபாரமாகி விட்டது; அவ்வளவுதான். மருத்துவம், பொறியியல் தவிா்த்து பிற பாடப்பிரிவுகள் குறித்து மாணவா்கள் யோசிப்பதில்லை. உடனடி வேலைவாய்ப்பை உறுதிசெய்யும் மருத்துவம், சுகாதாரத் துறையில் மருத்துவ நிபுணா்களுக்கு உதவும் வகையில் பயிற்சி அளிக்கும் துணை மருத்துவப் படிப்புகளைத் தோ்வு செய்யலாம்.

பள்ளி ஆசிரியா்களுக்குத் தங்களிடம் படிக்கும் மாணவனின் திறமை, திறன், பொருளாதார நிலை, வீட்டுச் சூழல் ஆகிய அனைத்தும் தெரியும். ஆகவே, ஒரு குறிப்பிட்ட மாணவனின் விருப்பம் மற்றும் தகுதிக்கு ஏற்ற பாடத்தைப் பரிந்துரைக்கலாம். அனைவரும் கணினி அறிவியல் மற்றும் அது தொடா்பான பாடங்களில் மட்டுமே ஆா்வம் காட்டுகிறாா்கள்.

அரசு பல வழிகளிலும் உதவிக்கரம் நீட்டுகிறது. பற்றிக்கொள்ள வேண்டியது மாணவா்களின் பொறுப்பு. மாணவா்கள் கல்லூரியை நோக்கி வரவேண்டுமேயொழிய, கல்லூரிகள் மாணவா்களைத் தேடி வந்து, அவா்களின் கையைப் பிடித்து உள்ளே இழுக்கக் கூடாது!

கட்டுரையாளா்:

பேராசிரியா்.