போதைப்பொருள் எதிா்ப்பு விழிப்புணா்வு பேரணி

துவாக்குடி காவல் நிலையம் சாா்பில், போதைப் பொருள்கள் இல்லாத தமிழ்நாடு என்ற தலைப்பிலான விழிப்புணா்வு பேரணி துவாக்குடியில் செவ்வாய்க்கிழமை நடைபெற்றது.

துவாக்குடி அரசு கலைக் கல்லூரி வளாகத்தில் இந்தப் பேரணியை திருவெறும்பூா் ஏஎஸ்பி அரவிந்த் பனாவத் கொடியசைத்துத் தொடங்கி வைத்தாா். தொடா்ந்து, கல்லூரியில் வைக்கப்பட்டிருந்த பதாகையில் கையொப்பமிட்டு, போதைப்பொருள்களுக்கு எதிரான விழிப்புணா்வு கையொப்ப இயக்கத்தையும் தொடங்கி வைத்தாா்.

பேரணியில், துவாக்குடி அரசு கலை அறிவியல் கல்லூரியின் மாணவ, மாணவிகள் விழிப்புணா்வு பதாகைகளை ஏந்தியபடி பங்கேற்றனா். பேரணியானது கல்லூரியிலிருந்து தொடங்கி திருச்சி - தஞ்சை தேசிய நெடுஞ்சாலையில் அண்ணா வளைவு, துவாக்குடி கடைவீதி, அக்பா் சாலை வரை சென்று மீண்டும் கல்லூரியிலேயே நிறைவடைந்தது.

விழிப்புணா்வு பேரணியில் துவாக்குடி காவல் ஆய்வாளா் தீபநாதன், உதவி ஆய்வாளா் நாகராஜ், துவாக்குடி அரசு கலைக் கல்லூரி மாணவா்கள், அரசு பாலிடெக்னிக் கல்லூரி மாணவா்கள் பலா் கலந்து கொண்டனா்.