நெல் கொள்முதல் நிலையங்களில் விவசாயிகளிடம் கூடுதல் வசூல் கூடாது: குறைதீா் கூட்டத்தில் முறையீடு

நெல் கொள்முதல் நிலையங்களில் விவசாயிகளிடம் மூட்டை ஒன்றுக்கு கட்டாயமாக கூடுதல் தொகை வசூலிப்பதை கைவிட வேண்டும் என குறைதீா் கூட்டத்தில் விவசாயிகள் கோரிக்கை விடுத்தனா்.

திருச்சி கோட்டாட்சியரகத்தில் கோட்ட அளவிலான விவசாயிகள் குறைதீா் கூட்டம் வெள்ளிக்கிழமை நடைபெற்றது. இக்கூட்டத்துக்கு கோட்டாட்சியா் சாலை தவவளவன் தலைமை வகித்தாா். தமிழக ஏரி மற்றும் ஆற்றுப்பாசன விவசாயிகள் சங்கத் தலைவா் பூ. விசுவநாதன் பேசியதாவது:

உய்யக்கொண்டான் வாய்க்கால் பாசனத்தை நம்பி சம்பா நெல் சாகுபடி செய்துள்ள விவசாயிகளுக்கு, தட்டுப்பாடின்றி காவிரி நீா் கிடைப்பதற்கு, பாசன ஏரிகளில் நூறு விழுக்காடு தண்ணீா் நிரப்பி வைக்க வேண்டும். அதிக மகசூல் தரக்கூடிய, சாயாத நெல் ரகங்களை விவசாயிகளுக்கு வழங்க வேண்டும்.

தேசிய தென்னிந்திய நதிகள் இணைப்பு விவசாயிகள் சங்கத் தலைவா் பொ. அய்யாக்கண்ணு கூறுகையில், திருச்சி மாவட்டத்தில் உள்ள கூட்டுறவு சங்கங்களில் விவசாயிகளுக்கு கடன் வழங்குவதில் தாமதம் ஏற்படுவதை தவிா்த்து, விரைந்து கடன் வழங்க வேண்டும். நேரடி நெல் கொள்முதல் நிலையங்களில் மூட்டைக்கு ரூ.40 கூடுதலாக வசூலிப்பதை கைவிட வேண்டும்.

தமிழ்நாடு விவாசயிகள் சங்க மாவட்ட செயலா் அயிலை சிவசூரியன் கூறுகையில், நெல் கொள்முதலுக்கு சாக்கு இல்லை, பணம் இல்லை என காலதாமதம் செய்யாமல், கொள்முதல் செய்த நெல் மூட்டைகளை உடனடியாக லாரிகள் மூலம் கிடங்குக்கு செல்ல வேண்டும்.

கூத்தப்பாரைச் சோ்ந்த விவசாயி ராமலிங்கம் கூறுகையில், 2 ஏக்கரில் நெல் சாகுபடி செய்துள்ளேன். தற்போது கதிா் முளைத்துள்ள நிலையில் மயில்கள் கூட்டம், கூட்டமாக வந்து நெல் மணிகளை நாசம் செய்துள்ளன. எனவே, பாதிக்கபப்பட்ட பயிா்களுக்கு உரிய இழப்பீடு வழங்க வேண்டும் என்றாா் அவா்.

மலைக்கோட்டை விவசாயிகள் சங்கத்தின் சாா்பில் அளிக்கப்பட்ட மனுவில், திருவெறும்பூா் வட்டத்தில் தோட்டக்கலைத்துறை மூலம் விவசாயிகளுக்கி வாழைக்கன்று, முட்டுக் கொடுக்கும் மரம் வழங்கியதில் முறைகேடு நடைபெற்றுள்ளதா என்பது குறித்து விசாரணை நடத்த வேண்டும் என வலியுறுத்தப்பட்டிருந்தது.

விவசாயிகளின் கோரிக்கைகளையும், மனுக்களையும் கேட்டறிந்த கோட்டாட்சியா், அவற்றை பரிசீலனை செய்து உரிய நடவடிக்கை எடுப்பதாக உறுதியளித்தாா்.