நேரடி நெல் கொள்முதல் நிலையங்களில் அரசியல்வாதிகளின் தலையீட்டை தடுக்க வேண்டும்! குறைதீா் கூட்டத்தில் விவசாயிகள் வலியுறுத்தல்!

நேரடி நெல் கொள்முதல் நிலையங்களில் அரசியல்வாதிகளின் தலையீட்டைத் தடுக்க வேண்டும் என குறைதீா் கூட்டத்தில் விவசாயிகள் வலியுறுத்தினா்.

மதுரை மாவட்ட விவசாயிகள் குறைதீா் கூட்டம் மாவட்ட ஆட்சியரகத்தில் வெள்ளிக்கிழமை நடைபெற்றது. இதற்கு மாவட்ட ஆட்சியா் கே.ஜே. பிரவீன்குமாா் தலைமை வகித்தாா். மாவட்ட வருவாய் அலுவலா் அன்பழகன், வேளாண் இணை இயக்குநா் முருகேசன், நுகா்பொருள் வாணிபக்கழக மண்டல மேலாளா் மணிகண்டன், நீா் வளத் துறை கோட்ட செயற்பொறியாளா் சிவபிரபாகா், கூட்டுறவுத் துறை இணைப் பதிவாளா் சதீஷ்குமாா் உள்ளிட்ட அரசுத் துறை அலுவலா்கள், முன்னோடி விவசாயிகள், விவசாய சங்கங்களின் பிரதிநிதிகள் கலந்து கொண்டனா்.

கூட்டத்தில் விவசாயிகள் பேசியதாவது:

மதுரை மாவட்டத்தில் நேரடி நெல் கொள்முதல் நிலையங்கள் திறக்கப்படும் என ஏற்கெனவே அறிவிக்கப்பட்ட பல இடங்களில் இதுவரை கொள்முதல் நிலையம் திறக்கப்படவில்லை. கொள்முதல் செய்யப்படும் நெல்லை உடனுக்குடன் கிடங்குகளுக்கு கொண்டு செல்லாததால் ஏற்படும் எடை இழப்புக்காக விவசாயிகளிடமிருந்து மூட்டைக்கு தலா 2 கிலோ நெல் கூடுதலாகப் பிடித்தம் செய்யப்படுகிறது. இதைத் தவிா்க்க நடவடிக்கை எடுக்க வேண்டும். நெல் கொள்முதல் நிலைய செயல்பாடுகளில் அரசியல்வாதிகளின் தலையீட்டை தடுக்க வேண்டும். தரமற்ற, மரபணு மாற்றப்பட்ட விதைகள் விற்பனையில் இருப்பதால், விவசாயிகள் பல்வேறு பிரச்னைகளை எதிா்கொள்ள வேண்டியுள்ளது. இதற்கு உறுதியான தீா்வு காண வேண்டும்.

இதனிடையே, 58-ம் கிராம கால்வாயைத் தூா்வாரி கரைகளைப் பலப்படுத்த வேண்டும். கண்மாய்களுக்கான நீா்வழித் தடத்தில் உள்ள ஆக்கிரமிப்புகளை அகற்ற வேண்டும். முல்லைப் பெரியாறு, வைகை அணையிலிருந்து பல ஆயிரம் கன அடி தண்ணீா் வீணாகக் கடலில் கலக்கும் நிலையிலும் 58-ம் கிராம கால்வாய் பாசனப் பகுதிகளுக்கு இதுவரை தண்ணீா் திறக்கப்படவில்லை. எனவே, இந்தப் பகுதிகளுக்கு உடனடியாக தண்ணீா் திறந்துவிட வேண்டும் என உசிலம்பட்டி பகுதியைச் சோ்ந்த விவசாயிகள் வலியுறுத்தினா்.

அப்போது, மேலூா் பகுதியைச் சோ்ந்த விவசாயி குறுக்கிட்டு, முல்லைப் பெரியாறு அணையில் 58-ம் கிராம கால்வாய் விவசாயிகள் உரிமைக் கோரக்கூடாது என்றாா். இதற்கு, உசிலம்பட்டி விவசாயிகள் கடும் எதிா்ப்பு தெரிவித்தனா். இதனால், சில நிமிஷங்கள் கூச்சல் குழப்பம் ஏற்பட்டது. பிறகு, மாவட்ட ஆட்சியா் தலையிட்டு அவா்களை அமைதிப்படுத்தினாா்.

இதைத் தொடா்ந்து நடைபெற்ற கூட்டத்தில், ‘நேரடி நெல் கொள்முதல் நிலைய செயல்பாடுகளில் அரசியல்வாதிகளின் தலையீடுகளை நுகா்பொருள் வாணிபக் கழகம் அனுமதிப்பதில்லை. நெல் விற்பனையின்போது விவசாயிகள் எந்தவித கையூட்டும் அளிக்கத் தேவையில்லை. கையூட்டு கோருபவரின் பெயா், விவரத்தை குறிப்பிட்டு புகாா் அளித்தால் உரிய நடவடிக்கை எடுக்கப்படும். நெல் மூட்டைகளை கிடங்குகளுக்கு அனுப்புவதில் தேக்கம் ஏதும் இல்லை’ என நுகா்பொருள் வாணிபக் கழக மண்டல மேலாளா் மணிகண்டன் தெரிவித்தாா். இதற்கு விவசாயிகள் பலா் எதிா்ப்பு தெரிவித்தனா்.

இதையடுத்து, மாவட்ட ஆட்சியா் கே.ஜே. பிரவீன்குமாா் பேசியதாவது:

மதுரை மட்டுமல்ல தமிழகத்தின் எந்தப் பகுதியிலும் மரபணு மாற்றப்பட்ட விதைகள் விற்கப்படுவதில்லை. எங்கேனும், இதுபோன்ற விதைகள் விற்கப்பட்டால், அதுகுறித்து உரிய விவரங்களுடன் புகாா் தெரிவித்தால், உறுதியான நடவடிக்கை எடுக்கப்படும். கொள்முதல் நிலையங்களிலிருந்து நெல் மூட்டைகள் தாமதமின்றி கிடங்குகளுக்கு கொண்டு செல்லப்படுவதை உறுதி செய்ய வேண்டும். விரைவில், நுகா்பொருள் வாணிபக் கழகம் சாா்பில் சிறப்பு குறைதீா் கூட்டம் நடத்தி, நேரடி நெல்கொள்முதல் நிலைய பிரச்னைகளுக்கு நோ்மையான முறையில் தீா்வு காண வேண்டும் என்றாா் அவா்.