தடுமாற்றத்தில் அரசு உதவி பெறும் கல்லூரிகள்

திருச்சி, ஏப். 8: பேராசிரியர்கள் பற்றாக்குறை காரணமாக அரசு உதவிபெறும் கல்லூரிகளில் படிக்கும் மாணவர்களின் கல்வித்திறன் மிக மோசமான நிலைக்கு தள்ளப்பட்டுள்ளது.

தமிழகத்தில் இப்போது 133 அரசு உதவிபெறும் கலை, அறிவியல் கல்லூரிகள் உள்ளன. ஒவ்வொரு கல்லூரியிலும் 10 முதல் 30 பேராசிரியர் பணியிடங்கள் காலியாக உள்ளன. தமிழகம் முழுவதும் உள்ள அனைத்து அரசு உதவிபெறும் கல்லூரிகளிலும் ஏறத்தாழ 2,000 பேராசிரியர் பணியிடங்கள் பல ஆண்டுகளாக நிரப்பப்படவில்லை.

அரசு உதவிபெறும் கல்லூரிகளில் படிப்பவர்களில் ஏறத்தாழ 90 சதம் பேர் கிராமப்புறங்களைச் சேர்ந்த ஏழை மாணவர்கள். இந்தக் கல்லூரிகளில் பல பாடப்பிரிவுகளில் போதிய எண்ணிக்கையில் பேராசிரியர்கள் இல்லாததால், பாடங்களில் அடிப்படை விஷயங்களை கற்றுக்கொள்ளகூட மாணவர்களுக்கு வாய்ப்பு கிடைப்பதில்லை.

மாணவர்கள் மீது அக்கறை கொண்ட சில கல்லூரிகள் மட்டும், தாற்காலிக அடிப்படையில் பேராசிரியர்களை நியமித்து, சொந்த நிதியில் இருந்து ஊதியம் அளிக்கின்றன.

கல்லூரி கல்வி இயக்குநர் அலுவலக வாசலில் இந்த கல்வி நிறுவனங்கள் பல ஆண்டுகளாக காத்துக்கிடந்தாலும் பேராசிரியர் பணி நியமனத்துக்கு அனுமதி கிடைப்பதில்லை.

தமிழகத்தில் அரசு உதவிபெறும் கல்லூரிகளில் பெரும்பாலானவை நிர்வாகச் சீர்கேடுகளால் மாணவர்கள் நலனில் கவனம் செலுத்துவதில்லை. இத்தகைய கல்லூரிகள், இருக்கும் பேராசிரியர்களை கொண்டு வேலை நாள்களை கழித்துக்கொண்டிருக்கின்றன. அரசு உதவிபெறும் கல்லூரி மாணவர்கள் பல்கலைக்கழக தேர்வுகளில் சராசரியாக 70 சதம் பேர் மட்டுமே தேர்ச்சி பெறுகின்றனர்.

தரமான கல்வியால்தான், திறமையான மாணவர்களை உருவாக்க முடியும். பட்டம் பெறுபவர்கள் பல ஆயிரம் பேர் இருந்தாலும், பல நிறுவனங்கள் திறமையான மாணவர்களை தேடிக்கொண்டிருக்கின்றன என்பதே மறுக்க முடியாத உண்மை.

நிர்வாகம், ஆட்சிப்பணி போன்ற உயர் பொறுப்புகளில் உள்ள பெரும்பாலானவர்கள் கலை பிரிவுகளில் பட்டம் பெற்றவர்கள்தான்.

பல ஆட்சிப்பணி அதிகாரிகளை உருவாக்கிய பெருமை கொண்ட கலைக்கல்லூரிகள் இப்போது அந்தப் பெருமையை இழந்து வருகின்றன.

திறமையான மாணவர்கள் உருவாக்கப்படாததாலேயே, இந்தக் கல்லூரிகள் சேர்த்துவைத்த பெருமையை இழக்கும் நிலை உருவாகியுள்ளது.

ஆராய்ச்சி படிப்பை முடித்துவிட்டு, தனியார் கல்லூரிகளில் மிகக்குறைந்த ஊதியத்தில் பணியாற்றும் சாதனையாளர்களுக்கு, அரசு உதவிபெறும் கல்லூரிகளில் வாய்ப்பு வழங்கப்படும் பட்சத்தில் இங்கு படிக்கும் மாணவர்களுக்கு தரமான கல்வி கிடைக்கும். மேலும், அந்த கல்லூரிகள் இழந்த பெருமையை மீட்கவும் முடியும்.

வளர்ச்சிப் பணிகளுக்கான மொத்த நிதியில் ஏறத்தாழ 75 சதம் அளவு கல்வி வளர்ச்சிக்கு ஒதுக்கீடு செய்வதாக மத்திய, மாநில அரசுகள் பெருமைபட்டுக் கொள்கின்றன.

உயர்கல்வி கனவோடு காத்திருக்கும் ஏழை மாணவர்களுக்கு, அதற்கான வாய்ப்பை ஏற்படுத்திக் கொடுக்கும் அரசு உதவிபெறும் கல்லூரிகளில், காலியாக உள்ள பேராசிரியர் பணியிடங்களை முழுமையாக நிரப்ப வேண்டும். அப்போதுதான் கல்விக்கென ஒதுக்கும் நிதி, முழுமையான பயனை அளிக்கும் என்பதை அரசு உணர வேண்டும்.