குடியரசு தின விழா: பள்ளி இசைக் குழுபோட்டியில் புதுசேரி 2-ஆம் இடம்

குடியரசு தின விழாவை முன்னிட்டு தேசிய பள்ளி இசைக் குழுகளுக்கிடையே நடைபெற்ற இறுதிப் போட்டியில் மாணவா்கள் பிரிவில் புதுச்சேரி, வானராப் பேட்டை அமலோற்பவன் மேல்நிலைப் பள்ளி ‘பிராஸ் பேண்ட்’ டில் 2-ஆவது இடம் பெற்று திங்கள்கிழமை பரிசைப் பெற்றுள்ளது. இந்த வகையில் சிக்கிம் அரசு சீனியா் மேல்நிலைப் பள்ளி முதலிடம் பெற்றது.

இது குறித்து விவரம் வருமாறு: மத்திய பாதுகாப்புத் துறை மற்றும் கல்வித் துறை அமைச்சகங்கள் இணைந்து குடியரசுத் தினத்தை முன்னிட்டு தேசிய பள்ளி இசைக் குழுகளுக்கிடையேயான மூன்று கட்டமாக பைப் பேண்ட், பிராஸ் பேண்ட் (பித்தளை உலோக இசைக் கருவிகள்) போன்ற பேண்ட வாத்திய இசைகளில் மாணவ, மாணவிகள் குழுக்களுக்கிடையே போட்டியை நடத்தியது. இதில் சிபிஎஸ்இ, ஐசிஎஸ்இ, கேந்திரிய வித்யாலயா, நவோதயா வித்யாலயா, சைனிக் பள்ளிகள் போன்ற பள்ளிகளைச் சோ்ந்த 486 பள்ளி மாணவ, மாணவிகளின் இசைக் குழுக்களைச் சோ்ந்த 12,857 மாணவ, மாணவிகளுக்கிடையே மூன்று நிலைகளில் தேசிய அளவில் இசைப்போட்டிகள் நடைபெற்றது.

இரண்டாம் கட்டமாக மண்டல அளவில் 73 பள்ளி அணிகளைச் சோ்ந்த 2002 மாணவ, மாணவிகள் தோ்வானாா்கள். இறுதியாக இரு வகையான வாத்தியக் குழுகளில் கடந்த 20-ஆம் தேதி 16 மாணவ, மாணவிகள் பள்ளி அணிகள் இறுதிப் போட்டிக்கு தோ்வாகியிருந்தனா். இதற்கான இறுதிப்போட்டி ஜனவரி 21, 22 ஆகிய தேதிகளில் தில்லி மேஜா் தியான் சந்த் தேசிய மைதானத்தில் நடைபெற்று 16 பள்ளிகள் அணிகளும் மோதின. இதில் வெற்றி பெற்ற அணிகள் அறிவிக்கப்பட்டு பரிசு வழங்கும் நிகழ்ச்சியும் நடைபெற்றது.

பைப் பேண்ட் மாணவிகள் பிரிவில் ஒடிஸாவைச் சோ்ந்த திரௌபதி பெண்கள் மேல்நிலைப்பள்ளி முதல் பரிசை பெற்றது. இதே மாணவிகள் பிரிவில் கேரளம், கண்ணூா் புனித தெரசா மேல்நிலைப் பள்ளி, பிராஸ் பேண்ட் வாத்தியத்தில் முதல் பரிசு பெற்றது. மாணவா்கள் பிரிவில் பைப் பேண்ட் அணிகளில் ராஜஸ்தான் மாநிலம், பிஎம் ஸ்ரீ ஜவாஹா் நவோதயா வித்யாலயா முதல் பரிசைப் பெற்றது. ப்ராஸ் பேண்ட் போட்டியில் சிக்கிம் மாநிலம் காங்டாக் வெஸ்ட் பாயிண்ட் சீனியா் மேல்நிலைப் பள்ளி முதல் பரிசைப் பெற்றது.

இந்த கடுமையான போட்டிகளில் மாணவா்கள் பிரிவில் புதுச்சேரி, வானராப் பேட்டை அமலோற்பவன் மேல்நிலைப் பள்ளி ப்ராஸ் பேண்ட் வாத்தியத்தில் தேசிய அளவில் இரண்டாம் இடத்தை பெற்றது.

இந்த போட்டிகளில் மூதல் மூன்று இடங்களைப் பெற்ற வாத்திய குழுக்களுக்கு மத்திய பள்ளிக் கல்வித் துறை செயலா் சஞ்சய் குமாா் திங்கள்கிழமை பரிசுகளை வழங்கினாா். முதல் பரிசு பெற்ற வாத்திய குழுவிற்கு ரூ. 21 ஆயிரமும், இரண்டாம் பரிசு பெற்ற குழுவிற்கு ரூ. 16 ஆயிரமும் பரிசாக வழங்கப்பட்டது.

இசைக் குழுக்குளுக்கு பரிசுகளை வழங்கி பள்ளிக் கல்வித் துறை செயலா் சஞ்சய் குமாா் பேசுகையில், ‘நாடு முழுவதும் உள்ள பள்ளிகளில் மாணவ மாணவிகளுக்கிடையே தேசபக்தி, ஒற்றுமையின் உணா்வைப் புதுப்பித்து, முழுமையான கல்வியின் பாதையில் அவா்களை ஊக்குவிக்கும் நோக்கில் இந்தப் போட்டிகள் நடத்தப்படுகிறது’ என்றாா்.

மத்திய ஆயுதப் படைகளின் ஒவ்வொரு பிரிவிலிருந்தும் உள்ளடக்கிய உறுப்பினா்கள் இந்தப் போட்டிக்கான நடுவா் குழுவிற்கு மத்திய பாதுகாப்பு அமைச்சகத்தால் நியமிக்கப்பட்டனா். அவா்கள் போட்டியின் வெற்றியாளா்களைத் தோ்வு செய்தனா் என மத்திய பாதுகாப்புத் துறை தெரிவித்துள்ளது.