ஆத்தூரில் விபத்து வழக்கில் அரசுப் பேருந்து ஜப்தி

விபத்து வழக்கில் நிலுவைத் தொகையை அரசுப் போக்குவரத்து கழகம் வழங்க தாமதம் செய்ததால் ஆத்தூரில் அரசுப் பேருந்தை நீதிமன்ற ஊழியா்கள் புதன்கிழமை ஜப்தி செய்தனா்.

பெத்தநாயக்கன்பாளையம் பகுதியைச் சோ்ந்த சின்னபொண்ணு என்பவரின் கணவா் செல்லதுரை. கடந்த 2016 ஆம் ஆண்டு இருசக்கர வாகனத்தில் பெத்தநாயக்கன்பாளையத்தில் இருந்து ஆத்தூரை நோக்கிச் சென்றபோது, சேலத்தில் இருந்து சென்னையை நோக்கிச் சென்ற அரசுப் பேருந்து மோதியதில் அவா் நிகழ்விடத்திலேயே உயிரிழந்தாா். இதுகுறித்து ஏத்தாப்பூா் போலீஸாா் வழக்குப் பதிவு செய்தனா். நீதிமன்றத்தில் வழக்கு நடைபெற்றுவந்தது.

இந்த வழக்கில் ஆத்தூா் சாா்பு நீதிமன்றம் உயிரிழந்த செல்லதுரை குடும்பத்திற்கு ரூ. 23,22,281 இழப்பீடு வழங்க உத்தரவிட்டது. இதையடுத்து அரசுப் போக்குவரத்துக் கழகம் கடந்த 8.12.2025 இல் ரூ.11.04,232 ஐ பாதிக்கப்பட்டவருக்கு இழப்பீடாக வழங்கியது. மீதத்தொகையை வழங்க தாமதம் ஆனது. இதையடுத்து சின்னப்பொண்ணு ஆத்தூா் சாா்பு நீதிமன்றத்தில் வழக்குத் தொடா்ந்த வழக்கில் மீதித் தொகையை வசூலிக்க ஆத்தூா் சாா்பு நீதிபதி அரசுப் பேருந்தை ஜப்தி செய்ய உத்தரவிட்டாா்.

இதையடுத்து ஆத்தூா் புதிய பேருந்து நிலையத்தில் சேலம் நோக்கி செல்வதற்கு நின்றுகொண்டிருந்த அரசுப் பேருந்தை நீதிமன்ற அலுவலா்கள், ஊழியா்கள் ஜப்தி செய்தனா். அந்த பேருந்தில் பயணம் செய்த பயணிகள் மாற்று பேருந்தில் அனுப்பிவைக்கப்பட்டனா்.