பயிா்க் கடன் தள்ளுபடி அறிவிப்பு விவகாரம்! குறைதீா் கூட்டத்தில் இருந்து விவசாயிகள் வெளிநடப்பு

திருப்பூா் மாவட்ட ஆட்சியா் அலுவலகத்தில் நடைபெற்ற விவசாயிகள் குறைதீா் நாள் கூட்டத்தில் பங்கேற்றோா்.

Updated On :30 மே 2026, 3:54 am IST

பயிா்க் கடன் தள்ளுபடி அறிவிப்புக்கு எதிா்ப்பு தெரிவித்து குறைதீா் கூட்டத்தில் இருந்து விவசாயிகள் வெளிநடப்பு செய்தனா்.

திருப்பூரில் மாவட்ட ஆட்சியா் அலுவலகக் கூட்டரங்கில், ஆட்சியா் மனீஷ் தலைமையில் விவசாயிகள் குறைதீா் நாள் கூட்டம் வெள்ளிக்கிழமை நடைபெற்றது.

இதில் ஆட்சியா் மனீஷ் பேசியதாவது:

திருப்பூா் மாவட்டத்தின் இயல்பான ஆண்டு மழை அளவு 698.46 மி.மீ. இதில் ஜனவரி 2026 முதல் மே மாதம் வரை சராசரியாக பெய்ய வேண்டிய மழை அளவு 139.60 மி.மீ. ஆனால், சராசரி அளவைவிட 48.03 மி.மீ. குறைவாக மழைப் பதிவாகியுள்ளது. மாவட்டத்தில் பயிா் சாகுபடிக்கு தேவையான நெல் விதைகள் 35.043 மெட்ரிக் டன், தானிய பயிறு விதைகள் 15.15 மெட்ரிக் டன், பயிறு வகை விதைகள் 22.75 மெட்ரிக் டன், எண்ணெய் வித்து பயிா் விதைகள் 39.28 மெட்ரிக் டன் இருப்பு உள்ளது. அதேபோல நெல் சாகுபடிக்கு தேவையான யூரியா 2,680 மெட்ரிக் டன், டி.ஏ.பி. 1,351 மெட்ரிக் டன், காம்ப்ளக்ஸ் 5,506 மெட்ரிக் டன் மற்றும் சூப்பா் பாஸ்பேட் 826 மெட்ரிக் டன் இருப்பில் உள்ளது என்றாா்.

குறைதீா் நாள் கூட்டத்தில் திருப்பூா் மாவட்டத்தில் இருந்து பல்வேறு விவசாய சங்கப் பிரதிநிதிகள் மற்றும் விவசாயிகள் கலந்துகொண்டனா். முந்தைய கூட்டங்களில் விவசாயிகள் வழங்கிய மனுக்கள் மீதான நடவடிக்கையை காலதாமதமின்றி உடனடியாக மேற்கொள்ள அலுவலா்களுக்கு உத்தரவிட்டாா். இதைத்தொடா்ந்து பல்வேறு கோரிக்கைகளை வலியுறுத்தி விவசாயிகளிடமிருந்து 67 மனுக்களையும் பெற்றுக் கொண்டாா். முன்னதாக, வேளாண்மை மற்றும் உழவா் நலத் துறையின் சாா்பில் அமைக்கப்பட்டிருந்த பல்வேறு வேளாண் கண்காட்சி அரங்குகளை பாா்வையிட்டாா்.

இந்தக் கூட்டத்தில் மாவட்ட வருவாய் அலுவலா் க.காா்த்திகேயன், வேளாண்மைத் துறை இணை இயக்குநா் ஆதிசாமி, கூட்டுறவு சங்கங்களின் இணைப் பதிவாளா் பிரபு, கால்நடை பராமரிப்புத் துறை மண்டல இணை இயக்குநா் ஆா்.சந்திரன், வேளாண் வணிக துணை இயக்குநா் வெங்கடாசலம், ஆட்சியரின் நோ்முக உதவியாளா் (வேளாண்மை) பா.மீனாம்பிகை, தாராபுரம் கோட்டாட்சியா் ஃபெலிக்ஸ்ராஜா, ஒழுங்குமுறை விற்பனைக்கூட செயலாளா் சண்முகசுந்தரம், அனைத்து துறை அலுவலா்கள், விவசாய சங்கப் பிரதிநிதிகள் மற்றும் விவசாயிகள் கலந்துகொண்டனா்.

முன்னதாக தோ்தல் பிரசாரத்தின்போது அறிவித்ததுபோல பயிா்க் கடனை முழுமையாக ரத்து செய்ய வேண்டும் என வலியுறுத்தி தமிழக விவசாயிகள் பாதுகாப்பு சங்கத்தினா் வாயில் கருப்பு துணி கட்டி பங்கேற்றனா்.

பயிா்க் கடன் ரூ.50,000 வரை மட்டுமே தள்ளுபடி, ஒரு லட்சம் பெற்றவா்களுக்கு ரூ.5,000 மட்டுமே தள்ளுபடி என்பது விவசாயிகளை ஏமாற்றும் செயல். இதற்கு எதிா்ப்பு தெரிவித்து வாயில் கருப்பு துணி கட்டி குறைதீா் கூட்டத்தில் இருந்து விவசாயிகள் வெளிநடப்பு செய்தனா்.

இதே கோரிக்கைகளை வலியுறுத்தி தமிழகம் முழுவதும் விவசாயிகள் பாதுகாப்பு சங்கம் சாா்பில் திங்கள்கிழமை (ஜுன் 1) ஆா்ப்பாட்டம் நடத்தப்படும் என்று தெரிவித்தனா்.

பின்னூட்டத்தில் வெளியாகும் கருத்துகளுக்கு அவற்றைப் பதிவிடுவோரே முழுப் பொறுப்பு; அவை தினமணியின் கருத்துகளைப் பிரதிபலிக்கவில்லை.தனிநபர், சமூகம், மதம் அல்லது நாடு ஆகியவற்றுக்கு எதிராக அவமதிக்கிற அல்லது ஆபாசமான விதத்திலுள்ள எந்தவொரு கருத்தும் இந்திய அரசின் தகவல் தொழில்நுட்பக் கொள்கைப்படி தண்டனைக்குரிய குற்றம். இதுபோன்ற கருத்துகளுக்கு எதிராக உரிய சட்ட நடவடிக்கை எடுக்கப்படும்.