சாகசப் பயணம்...

காது கேட்கும் திறன் இழந்த இளைஞர் கார்த்திக் குங்கும சீனிவாசன் , 10,000 கி.மீ. தூரம் தனியாக பைக்கில் சாகசப் பயணம் செய்துள்ளார்.

இவர் ஜூலை 3-ஆம் தேதி கன்னியாகுமரியில் இருந்து புறப்பட்டு கேரளா, கோவா ராஜஸ்தான், பஞ்சாப் பிறகு லடாக் சென்று நாக்பூர், ஹைதராபாத், சென்னை வழியாக தமிழகத்தின் தனுஷ்கோடிக்கு ஆகஸ்ட்21-இல் வந்து சேர்ந்தார்.

இவர் தனது பயண அனுபவம் குறித்து கூறியதாவது:

""நான் மதுரை சிக்கந்தர் சாவடியைச் சேர்ந்தவன். உலகிலேயே 19,024 அடி உயரத்தில் அமைந்த மிகவும் ஆபத்தான பாதையில் அமைந்துள்ள "உம்ல்லிங் லா' சென்று வந்த முதல் மாற்றுத்திறனாளி என்ற பெருமையும் எனக்கு உண்டு.

பயணத்தின் உச்ச கட்டம் காஷ்மீர் "கிஸ்த்வார் முதல் கிலாங்' வரை உள்ள 120 கிலோ மீட்டர் தூரம் கொண்ட உலகின் அபாயகரமான சாலையை கடப்பதுதான். இந்தத் தூரத்தைக் கடக்க மூன்று நாள்களில் சுமார் 26 மணி நேரம் பிடித்தது. ஆறு அடி அகலமான கரடு முரடான மலைப்பாதை. ஒருபுறம் வானத்தைத் தொடும் மலை.

இன்னொருபுறம் செங்குத்தாக இறங்கும் ஆழமான பள்ளத்தாக்கு. சின்ன தவறு நிகழ்ந்தால் கூட பள்ளத்தாக்கில் செங்குத்தாக விழ வேண்டும். இங்கே தினமும் குறைந்தது எட்டு விபத்துகள் நடக்கும்.

தொடர்ந்து மூன்று நாள்கள் அலைபேசியில் நான் தொடர்பு கொள்ளாவிட்டால் நான் இறந்துவிட்டதாக நினைத்த்துக் கொள்ளுங்கள் என்று நான் கிளம்பும்போதே வீட்டில் சொல்லிவிட்டு வந்தேன்.

லடாக் பகுதியில் பேட்டரி போட்ட அரை மணி நேரத்தில் பேட்டரியின் சக்தி தீர்ந்துவிடும். இருப்பினும், ஐந்து பாக்கெட் பேட்டரிகளைக் கொண்டு போனதால் அவற்றை உடனுக்குடன் மாற்றி சமாளித்தேன்.

முதலில் கடல் மட்டத்திலிருந்து 15,547 அடி உயரத்தில் இருக்கும் "நகீலா' என்ற இடத்துக்கு பைக்கில் பயணித்தேன். பிறகு 18380 அடி உயரத்தில் இருக்கும் ‘கார்டுங்ளா' உச்சிக்குப் பயணித்தேன். அங்கே சென்ற போது "கார்டுங்ளா'வுக்கு மேலே "உம்லிங் லா' என்ற உச்சி கடல் மட்டத்திலிருந்து 19,024 அடி உயரத்தில் உள்ளது. பாதை வசதி "உம்ல்லிங் லா' வரை மட்டுமே உள்ளது . பயணங்கள் முடியாது, தொடரும்'' என்றார்.