நீர் வற்றிய குளம்: பூ. சுப்ரமணியன்

அன்று
நீர் நிறைந்த குளத்தில்
துள்ளித் திரிந்த மீன்கள்
அல்லி மலர்க் கூட்டம்
இதழ் விரிந்த

தாமரை மொட்டுகள் 
அழகைக் கண்டு மகிழ்ந்த 
குளத்துப் படிக்கற்களே
இன்று 
நீர் வற்றிய குளம்
கண்டு ஏங்கி நிற்கின்றன !

அன்று
நீர் நிறைந்த குளத்தில்
நீச்சலடித்த சிறுவன்
பாசி படர்ந்த நீரில்
வீசியடித்த சிறுகல்
துள்ளித் துள்ளி ஓடுவதை
ரசித்து மகிழ்ந்த சிறுவன்
இன்று
நீர் வற்றிய குளம்
கண்டு ஏங்கி நிற்கிறான் !

அன்று
நீர் நிறைந்த குளத்தில்
வெண்மைப் படகுகள்
மிதப்பதைப்போல்
நீந்திய வாத்துக்கூட்டம்
இன்று
நீர் வற்றிய குளக்கரையில்
நீந்த ஏங்கி நிற்கின்றன !

அன்று
வாடிய பயிரைக் கண்டு
வாடி நின்றார் வள்ளலார்
இன்று
நீர் வற்றிய குளம்
நினைத்து பயிர்களே
வாடி ஏங்கி நிற்கின்றன !