மாற்றம் ஏற்படுத்திய கெதர் ஜாதவ் ஆட்டம்: தியோதர் கோப்பை இறுதிச்சுற்றில் 283 ரன்கள் எடுத்த இந்தியா பி அணி!

உலகக் கோப்பைப் போட்டியில் ஆப்கானிஸ்தானுக்கு எதிராக 52 ரன்கள் எடுத்தார் கெதர் ஜாதவ். அதற்குப் பிறகு அவர் 5 ஒருநாள் ஆட்டங்களில் விளையாடியும் பெரிதாக எதுவும் ரன்கள் எடுக்க முடியவில்லை. விஜய் ஹசாரே போட்டியிலும் ஒரு அரை சதமும் எடுக்கவில்லை. இதனால் ரசிகர்கள் அவரைக் கிட்டத்தட்ட மறந்தே போன நிலையில் மீண்டும் விஸ்வரூபம் எடுத்துள்ளார்.

ராஞ்சியில் நடைபெற்று வரும் இந்தியா பி - இந்தியா சி அணிகளுக்கு இடையிலான தியோதர் கோப்பை இறுதிப் போட்டியில் முதலில் விளையாடிய இந்தியா பி அணி 50 ஓவர்களில் 7 விக்கெட் இழப்புக்கு 283 ரன்கள் எடுத்துள்ளது. இதற்கு முக்கியக் காரணம் - கெதர் ஜாதவ். மூன்று முன்வரிசை பேட்ஸ்மேன்கள் சரியாக விளையாடாத நிலையில் நிதிஷ் ராணாவுடன் இணைந்து அருமையாகக் கூட்டணியை அமைத்தார் கெதர் ஜாதவ். ஒரு கட்டத்தில் 25-வது ஓவர்களின்போது 4 விக்கெட் இழப்புக்கு 92 ரன்கள் எடுத்து தடுமாறிக் கொண்டிருந்தது இந்தியா பி அணி. ஆனால் ஆட்டத்தின் போக்கைத் தன்னுடைய அருமையான ஆட்டத்தின் மூலம் மாற்றினார் கெதர் ஜாதவ். 94 பந்துகளில் 4 சிக்ஸர்கள், 4 பவுண்டரிகளுடன் 86 ரன்கள் எடுத்தார். இளம் வீரர் ஜெயிஸ்வால் 79 பந்துகளில் 54 ரன்களும் விஜய் சங்கர் 33 பந்துகளில் 45 ரன்கள் எடுத்தார்கள். கடைசிக்கட்டத்தில் களமிறங்கிய கெளதம் 10 பந்துகளில் 3 சிக்ஸர், 3 பவுண்டரிகளுடன் 35 ரன்கள் எடுத்து அணியின் ஸ்கோரை வெகுவாக உயர்த்தினார். 

இந்தியா பி அணி 50 ஓவர்களில் 7 விக்கெட் இழப்புக்கு 283 ரன்கள் எடுத்துள்ளது. இந்தியா சி அணித் தரப்பில் 21 வயது இஷான் போரெல் அற்புதமாகப் பந்துவீசி 5 விக்கெட்டுகளை வீழ்த்தியுள்ளார்.