4 வருடங்களாக ஐபிஎல்-லில் பெஞ்ச்; டிஎன்பிஎல்-லில் சாதித்துக் காட்டிய பாபா அபராஜித்!

ஐபிஎல் என்பது பலருக்கும் பல கதவுகளைத் திறந்துவைக்கும் வாய்ப்பாக உள்ள நிலையில் சிலருக்கு மட்டும் அணியில் இடம்பெறமுடியாத நிலைமை ஏற்பட்டு விடுகிறது. ஐபிஎல்-லில் அப்படி ஒரு துரதிர்ஷ்டம் பாபா அபராஜித்துக்கு ஏற்பட்டது.

2013-ம் வருடம் சென்னை சூப்பர் கிங்ஸ் அணிக்குத் தேர்வானார் பாபா அபராஜித். U19 உலகக்கோப்பையில் திறமையை வெளிப்படுத்தி அதிகக் கவனம் பெற்றதால் ஐபிஎல்-லிலும் தன்னை நிரூபிப்பார் என்கிற எதிர்பார்ப்பு அவர்மீது இருந்தது. ஆனால் எல்லாமே நேர்மாறாக நடந்தது. இன்றுவரை ஐபிஎல்-லில் பாபா அபராஜித்துக்கு ஒரு வாய்ப்பும் கிடைக்கவில்லை! சிஎஸ்கேவுக்குப் பிறகு புணே அணியில் தேர்வானார் பாபா. இந்த ஐபிஎல்-லில், புணே அணி தொடர்ந்து தோற்றபோதும், பலருக்குக் காயம் ஏற்பட்டு விலகியபோதும்கூட தோனி பாபாவைச் சீந்தவில்லை. அதே பெஞ்ச்!

இந்நிலையில் 4 ஐபிஎல்களுக்குப் பிறகு இப்போது தமிழ்நாடு பிரீமியர் லீக் போன்ற ஒரு பெரிய போட்டியில் விளையாடி தன் திறமையை மீண்டும் நிரூபித்துள்ளார் பாபா.

தமிழ்நாடு பிரீமியர் லீக் கிரிக்கெட் போட்டியில், காரைக்குடி காளை அணிக்கு எதிரான ஆட்டத்தில் 5 விக்கெட் வித்தியாசத்தில் திருவள்ளூர் வீரன்ஸ் அணி வெற்றி பெற்றது. திண்டுக்கல் என்பிஆர் கல்லூரி மைதானத்தில் வியாழக்கிழமை நடைபெற்ற இந்த ஆட்டத்தில், அபராஜித் 63 பந்துகளில் (12 பவுண்டரிகள், 6 சிக்ஸர்கள்) 118 ரன்கள் குவித்து அணியின் வெற்றிக்கு உதவியுள்ளார். இந்த தமிழ்நாடு பிரீமியர் லீக் போட்டியின் முதல் சதம் இது. இதனால் பாபா அபராஜித் மீது அதிக கவனம் குவிந்துள்ளது.