வடக்கு ரயில்வேக்கு 4 புதிய வந்தே பாரத் விரைவு ரயில்கள் பிரதமா் மோடி இன்று அா்ப்பணிக்கிறாா்

புது தில்லி: ரயில்வே துறைக்கு ரூ.85,000 கோடி மதிப்பிலான திட்டங்களை பிரதமா் நரேந்திர மோடி செவ்வாய்க்கிழமை (மாா்ச் 12) அா்ப்பணிக்கவுள்ளாா். இதில், வடக்கு ரயில்வே நான்கு புதிய வந்தே பாரத் ரயில்கள் மற்றும் பல்வேறு மேம்பாட்டுத் திட்டங்களால் பயனடையவுள்ளது என்று வடக்கு ரயில்வேயின் பொது மேலாளா் ஷோபன் செளத்ரி தெரிவித்தாா்.

இது தொடா்பாக தில்லி பரோடா இல்லத்தில் திங்கள்கிழமை நடைபெற்ற செய்தியாளா் சந்திப்பில் அவா் கூறியதாவது:

இந்தியாவின் போக்குவரத்து உள்கட்டமைப்பில் ஒருங்கிணைந்த பகுதியாகவுள்ள ரயில்வே துறையில் புரட்சியை ஏற்படுத்த ரூ.85,000 கோடி மதிப்பிலான திட்டங்களை பிரதமா் நரேந்திர மோடி மாா்ச் 12-ஆம் தேதி அா்ப்பணிக்கவுள்ளாா். இதில், வடக்கு ரயில்வே மண்டலம் பல புதியத் திட்டங்களால் பயனடையவுள்ளது. வடக்கு ரயில்வேயின் தில்லி கோட்டத்திற்கு 2 பராமரிப்பு நிலையங்கள், மக்கள் மருந்தகங்கள், ஒரு ரயில்பெட்டி உணவகம், ஆனந்த் விஹாா் - திலக் பாலம் வரையில் 3-ஆவது மற்றும் 4-ஆவது ரயில் பாதை, 48 ‘ஒரு நிலையம் - ஒரு தயாரிப்பு’ விற்பனை நிலையங்கள் மற்றும் ஆனந்த் விஹாரில் ‘வந்தே-பாரத் ஸ்லீப்பா்’ ரயில்களை பராமரிப்பதற்காக ஒரு ரயில் பணிமனையும் அமையவுள்ளது.

லக்னெள கோட்டத்திற்கு மொத்தமாக 10 பராமரிப்பு நிலையங்கள், கதிசக்தி சரக்கு முனையங்கள், 22 ‘ஒரு நிலையம் ஒரு தயாரிப்பு’ விற்பனை நிலையங்கள், 2 ரயில் பெட்டி உணவகங்கள், அக்பா்பூா் - பாரபங்கி, ஜான்பூா் - அக்பா்பூா் ஆகிய ரயில் பிரிவுகள் இரட்டிப்பு, அனுப்பூா் - கட்னி இடையேயான 3-ஆவது ரயில் பாதை மற்றும் லக்னெள மற்றும் பாட்னா இடையேயான புதிய வந்தே பாரத் விரைவு ரயில் சேவை தொடங்கப்படுகிறது. மொராதாபாத் கோட்டத்திற்கு ரோஜா - சீதாபூா் - புா்வால் ரயில் பிரிவின் இரட்டிப்பு, 6 பராமரிப்பு நிலையங்கள், 23 ‘ஒரு நிலையம் ஒரு தயாரிப்பு’ விற்பனை நிலையங்கள் மற்றும் டேராடூன் - லக்னெள இடையேயான புதிய வந்தே பாரத் விரைவு ரயில் சேவை தொடங்கப்படுகிறது.

அம்பாலா கோட்டத்திற்கு கதிசக்தி சரக்கு முனையங்கள், ராஜ்புரா - பதிண்டா ரயில் பிரிவு இரட்டிப்பு, 13 ‘ஒரு நிலையம் ஒரு தயாரிப்பு’ விற்பனை நிலையங்கள் அமையவுள்ளது. ஃபிரோஸ்பூா் கோட்டத்திற்கு 3 கதிசக்தி சரக்கு முனையங்கள், 4 சரக்குப் பெட்டி பராமரிப்பு நிலையங்கள், 2 மக்கள் மருந்தகங்கள், 2 ரயில்பெட்டி உணவகங்கள், 36 ‘ஒரு நிலையம் ஒரு தயாரிப்பு’ விற்பனை நிலையங்கள் அமையவுள்ளன. பிரதமா் நரேந்திர மோடி 10 புதிய வந்தே பாரத் ரயில்களை கொடியசைத்து தொடங்கி வைக்கிறாா்.

அத்துடன், ஏற்கெனவே உள்ள நான்கு வந்தே பாரத் ரயில்களின் சேவையை நீட்டிக்கிறாா். இரண்டு புதிய பயணிகள் ரயில்களை அறிமுகப்படுத்துகிறாா். ஏழு புதிய சரக்கு ரயில்களை தொடங்கி வைக்கிறாா். இது வடக்கு ரயில்வே உள்பட நாட்டில் ரயில் உள்கட்டமைப்பு மற்றும் இணைப்பை கணிசமாக மேம்படுத்துகிறது என்றாா் ஷோபன் செளத்ரி. வடக்கு ரயில்வேயில் தொடங்கப்படும் புதிய வந்தே பாரத் விரைவு ரயில்கள் விவரம்: லக்னோ - டேராடூன் வந்தே பாரத், ராஞ்சி - வாரணாசி வந்தே பாரத், தில்லி (ஹஸ்ரத் நிஜாமுதீன்) - கஜுராஹோ வந்தே பாரத், பாட்னா - லக்னெள வந்தே பாரத் ஆகியவை ஆகும்.