2017 ஆம் ஆண்டு முடிய இன்னும் ஒரே ஒரு நாள் மட்டுமே எஞ்சியுள்ள நிலையில், கடந்த ஆண்டின் நினைவுகளை எல்லாம் பசுமை மாறாமல் நெஞ்சுக்குள் பத்திரமாகப் பதுக்கிக் கொண்டு புத்தாண்டை விமரிசையாக வரவேற்க கொண்டாட்டத்துடன் திட்டமிட்டுக் கொண்டிருப்பீர்கள். நல்லது. ‘பழையன கழிதலும், புதியன புகுதலும் வழுவல கால வகையினானே’ என்ற நன்னூலார் பவணந்தி முனிவர் கூற்றுப்படி நாம் புத்தாண்டைக் கொண்டாட்டத்துடனும், குதூகலத்துடனும் வரவேற்பது தானே முறை! அந்தக் குதூகலத்துக்கு மேலும் சிறப்புச் சேர்க்கும் வகையிலும், உங்களை நீங்களே மீண்டுமொருமுறை ரசித்துக் கொள்ளும் படியாகவும் தினமணி.காம் உங்களுக்கு ஒரு ரசனை மிக்க வாய்ப்பை வழங்கவிருக்கிறது. தினமணி வாசகர்கள் 2017 ஆம் ஆண்டில் தாங்கள் எடுத்துக் கொண்ட பலப்பல அழகான செல்ஃபீக்களில் சிறந்ததென எண்ணும் ஒரு சூப்பர்ப் செல்ஃபீயை எங்களுக்கு மின்னஞ்சலில் அனுப்பி வையுங்கள். அது தினமணி.காம் முகப்புப் பக்கத்தின் புகைப்படப் பிரிவில் ‘பெஸ்ட் செல்ஃபீ 2017’ எனும் தலைப்பின் கீழ் பிரசுரிக்கப்படும்.