உலகின் அதிக எடை கொண்ட மனிதருக்கு சிகிச்சை!

மெக்ஸிகோ நகரில் வாழ்ந்து வரும் ஜுன் ஃபெட்ரோ என்பவர் தான் உலகின் அதிக எடையுள்ள மனிதர்  ஆவார்.தற்போது இவருடைய வயது 32, எடை 500 கிலோ. கடந்த ஆறு வருடங்களாக உடல் பருமன் பிரச்னையால் படுக்கையிலிருந்து எழ முடியாமல் அவதிப்பட்டுக் கொண்டிருந்தவருக்கு, எடை குறைப்பு சிகிச்சை தொடங்கியது. ஜுனை மருத்துவமனைக்கு அழைத்துச் செல்லப் பிரத்யேகமாக ஒரு வாகனத்தை ஏற்பாடு செய்தனர் மருத்துவ குழுவினர். மத்திய மெக்ஸிகோவில் இருக்கும் அவருடைய சொந்த ஊரான அகாஸ்கலண்டிஸிலிருந்து மேற்கு மெக்ஸிகோவில் உள்ள நகரான கவுடலஜாரா எனும் ஊரில் உள்ள தனியார் மருத்துவமனைக்கு அழைத்துச் செல்லப்பட்டார் ஜுன். 

அவரை அங்கு கொண்டு செல்வதற்குள் பெரும் சிரமமாகிவிட்டது என்றனர் மருத்துவர்கள். ஜுன் தன்னுடைய மருத்துவ சிகிச்சையைப் பற்றிக் கூறும்போது இனி என்னுடைய வாழ்க்கையை புதிதாக தொடங்க முடிவெடுத்துள்ளேன், புதிய நம்பிக்கை ஏற்பட்டுள்ளது, எனக்கு உதவி செய்யும் மருத்துவர்களுக்கு அன்பும் நன்றியும் என்று நெகிழ்ச்சியுடன் பேசினார்.

அவருடைய தற்போதைய நிலை உண்மையில் கவலைக்கு இடமாகத் தான் உள்ளது. ஜுன் இளம் வயதிலிருந்தே உடல் எடை அதிகமான சிறுவனாக இருந்துவந்தார். 15 வயதில் 200 கிலோ எடையில் இருந்த அவரின் வயது அதிகமாகி வருகையில் உடல் எடையும் அதிகரித்து வந்தது. ஒரு கட்டத்தில் கட்டுக்கு அடங்காத அளவுக்கு அவரின் உடல் எடை அதிகரித்துவிட்டது. அதுவும் கடந்த ஆறு வருடத்தில் அவரால் படுக்கையிலிருந்து எழுந்து கொள்ளக் கூட முடியாத அளவுக்கு உடல் பருமனாகிவிட்டதால் தற்போது இறந்துவிடும் நிலைக்கு வந்துவிட்டார். அதனால் தான் உடனடியாக அவருக்கு மருத்துவ சிகிச்சை தேவைப்பட்டது. தனக்கோ தன்னுடைய குடும்பத்தாருக்கோ இதை எப்படி குணமாக்குவது என்றே தெரிந்திருக்கவில்லை என்று வருத்தத்துடன் அவர் கூறினார்.

ஜுனின் பிரச்னையை சரி செய்ய முடிவெடுத்த டாக்டர் ஜோஸ் அண்டொனியோ காஸ்டநேடா தன்னுடைய குழுவினருடன் முதலில் ஜுனை அவர் வீட்டில் சந்தித்தார். அதன் பின்னரே அவரை உடனடியாக மருத்துவ வசதிகள் நிறைந்த க்ளினிக்குக்கு மாற்ற முடிவு செய்தார். டாக்டரும் அவருடைய குழுவினரும் இதுவரை உடல் பருமன் பிரச்னையில் அவதியுற்ற 8000 நபர்களுக்கு சிகிச்சை அளித்துள்ளனர் என்பது குறிப்பிடத்தக்கது. அதிக உடல் எடை உள்ளிட்டு ஹைபோ தைராய்டிஸம், ஹைபர் டென்ஷன், நாள்பட்ட நுரையீரல் அடைப்பு நோய் மற்றும் அதிகமான ரத்த க்ளூகோஸ் அளவு என பல சிக்கல்களும் ஜுனுக்கு இருந்தது. எனவே அவருக்கான சிகிச்சை ஆறு மாதம் வரை நீடிக்கும். சிகிச்சையில் முக்கியமாக அவருடைய உடல் எடை குறைவதற்கான முயற்சிகள் எடுக்கப்படும் அதே சமயத்தில் மற்ற நோய்களுக்கும் மருத்துவம் செய்யப்படும். தேவைப்படும் எனில் அறுவை சிகிச்சை செய்யலாம் இது நிச்சயம் அவருக்கான நிரந்தர தீர்வாக இருக்கும் என்றனர் மருத்துவர்கள்.

2015 -ம் ஆண்டில் மேற்கொள்ளப்பட்ட ஒரு ஆய்வில் 32.4 சதவிகித மெக்ஸிக ஆண்கள் உடல் பருமன் பிரச்னையில் உள்ளனர். இதுவே அமெரிக்காவில் 35.3 சதவிகிதமாகும் என்று கண்டறியப்பட்டுள்ளது.