முதியோர் - வீடு, நாட்டின் சொத்து!

உலக சுகாதார அமைப்பின் அறிக்கையின் அடிப்படையில், முதியோர் மீதான வெறுப்பு மூன்று பிரிவுகளாக வகைப்படுத்தப்பட்டுள்ளது: புறக்கணிப்பு, தனிமை, சமூக தனிமை. நிராகரிப்பு உள்பட முதல் வகை; சட்ட, மருத்துவ, மனித உரிமைகளற்ற இரண்டாவது வகை; தேர்வு செய்யும் உரிமை, நிதி, மரியாதை, தீர்மானிக்க முடியாத மூன்றாவது வகை.
 உலகின் ஒவ்வொரு 10 மூத்த குடிமக்களில் ஒருவர் இந்தியர். இந்திய மக்கள்தொகை பதிவாளர் - பொது கணக்கெடுப்பு ஆணையர் அலுவலகத் தரவுகளின்படி, இந்தியாவில் முதியோர் எண்ணிக்கை விகிதம் 1961-ஆம் ஆண்டில் 5.63%-லிருந்து 2011-ஆம் ஆண்டில் 8.6%-ஆக (2.47 கோடியிலிருந்து 9.72 கோடியாக) அதிகரித்துள்ளது.
 இந்தியாவில் வாழும் மூத்த குடிமக்களில் 75% பேர் கிராமங்களிலும், மூன்றில் ஒரு பங்கினர் வறுமைக் கோட்டுக்குக் கீழும் வாழ்கின்றனர். முதியோரில் 70.3% பேர் எழுத்தறிவு இல்லாதவர்களாகவும், 32% பேர் 65 வயதைக் கடந்து கூலித் தொழிலாளர்களாகவும், 90% பேர் அமைப்புசாரா துறைகளில் பணிபுரிந்து வருங்கால வைப்பு நிதி, ஓய்வூதியம் முதலான பலன்கள் இல்லாதவர்களாகவும் உள்ளனர்.
 2017-இல் வெளியான "எங்கள் பெரியவர்களைப் பராமரித்தல்' என்ற ஆய்வறிக்கை, இந்திய அளவில் 11.2% முதியோரைக் கொண்டு அதிக மூத்த குடிமக்கள் கொண்ட மாநிலங்களில் இரண்டாவது இடத்தில் தமிழகம் உள்ளது என்றும் இந்தியாவிலேயே மிக அதிகமாக தமிழகத்தில்தான் 13.7% முதியவர்கள் தனியாக வாழ்கின்றனர் என்றும் கூறுகிறது. தமிழக முதியோரில் 17% பேர் ஆண்கள், 19.4% பேர் பெண்கள்.
 முதியோருக்கு எதிரான குற்றங்களுக்காக பதிவு செய்யப்பட்ட வழக்குகளின் எண்ணிக்கை 18,714 எனவும், முதியோருக்கு இழைக்கப்படும் கொடுமைகளின் ஒட்டுமொத்த விகிதம் இந்தியாவில் 18.3% -ஆக உயர்ந்துள்ளது எனவும் தேசிய குற்ற ஆவணப் பணியகம் 2014 அறிக்கை தெரிவிக்கிறது.
 நிதி பாதுகாப்பு காரணமாக பெரும்பாலான மூத்த குடிமக்கள் தங்கள் சொந்த குடும்பத்திலிருந்தே கொடுமையை எதிர்கொள்கின்றனர். இந்தியாவில் 71%-க்கும் அதிகமான மூத்த குடிமக்கள் தங்கள் சொந்த குடும்ப உறுப்பினர்கள், உறவினர்கள் அல்லது குழந்தைகளால் துன்புறுத்தல் அல்லது அவமானத்தை எதிர்கொள்கின்றனர்.
 2011-ஆம் ஆண்டு இந்தியாவின் 12 முக்கிய நகரங்களில் ஹெல்ப் ஏஜ் இந்தியா அமைப்பு மேற்கொண்ட முதியோருக்கு எதிரான குற்றங்கள் குறித்த ஆய்வு, மூத்த குடிமக்கள் வாய்மொழியாக (60%), உடல் ரீதியாக (48%), உணர்ச்சி ரீதியாக (37%),பொருளாதார ரீதியாக (35%) இன்னல்களுக்கு உள்ளாகின்றனர் என்றும் குடும்பம் - சமுதாயம் தங்களைப் புறக்கணித்ததாக 20% முதியவர்கள் உணர்கின்றனர் என்றும் தெரிவிக்கிறது.
 இந்தியாவில் இன்னல்கள் அனுபவித்துவரும் முதியவர்களில் 72% பேர் 60 - 69 வயதுக்குட்பட்டவர்கள், 25% பேர் 70 - 79 வயதுக்குட்பட்டவர்கள், 3% பேர் மட்டுமே 80 அல்லது 80 வயதுக்கு மேற்பட்டவர்கள் என்றும் ஆண்களுடன் (48%) ஒப்பிடும்போது பெண்கள் (53%) அதிக அளவு இடர்ப்பாடுகளுக்கு உள்ளானவர்கள் என்றும் ஆய்வறிக்கைகள் தெரிவிக்கின்றன.
 படுக்கையில் இருந்த, மற்றவர்களைச் சார்ந்து இருந்த மூத்த குடிமக்களிடம் நடத்திய ஆய்வில், தங்களின் இன்னல்களுக்கு காரணம் 50% பேர் மருமகள் என்றும், 42% பேர் மகன் என்றும், 10% பேர் மகள் என்றும், 23% பேர் சகோதரர்கள், மைத்துனர்கள் உள்ளிட்ட பிற உறவினர்கள் என்றும் 3% பேர் ஊழியர்கள் / பராமரிப்பாளர்கள் என்றும் தெரிவித்துள்ளனர். இவர்களில் 70% பேர் குடும்ப விஷயங்களின் ரகசியத் தன்மை காரணமாகவும் 12% பேர் குழந்தைகளால் நிராகரிக்கப்படுவோம் என்ற அச்சத்தின் காரணமாகவும் காவல் துறையிடம் தெரிவிக்க ஒருபோதும் நினைத்ததில்லை என்று கூறியுள்ளனர்.
 மூத்த குடிமக்களில் 10% பேர் மட்டுமே ஓய்வூதியம் பெறுகின்றனர். அதிலும் வறுமைக்கோட்டுக்குக் கீழ் உள்ளவர்கள் மட்டுமே மாதத்துக்கு ரூ.200 முதல் ரூ.1,000 வரை ஓய்வூதியம் பெறத் தகுதியுடையவர்கள்.
 வயதானவர்களுக்கு அடிப்படை வசதிகளை உறுதி செய்யும் வகையில் மத்திய அரசின் 90% நிதியுதவியுடன் தன்னார்வத் தொண்டு நிறுவனங்களைக் கொண்டு முதியோர் இல்லங்களை அமைக்க 1992-ஆம் ஆண்டு உருவாக்கப்பட்ட திட்டத்தின் கீழ் 2015-ஆம் ஆண்டு வரை 352 முதியோர் இல்லங்கள் மட்டுமே நிறுவப்பட்டுள்ளன.
 1999-இல் உருவாக்கப்பட்டு, 2008, 2010 ஆகிய ஆண்டுகளில் இரண்டு முறை திருத்தப்பட்ட மூத்த குடிமக்களுக்கான தேசியக் கொள்கையும், சுகாதார - குடும்ப நல அமைச்சகத்தால் 2010-இல் அறிமுகப்படுத்தப்பட்ட முதியோர் சுகாதார பராமரிப்பு தேசிய திட்டத்துக்கும் ஒரே ஒரு வித்தியாசம் வெவ்வேறு அமைச்சகத்தால் உருவாக்கப்பட்டவை என்பது மட்டுமே.
 செயல் திட்டங்களில் மாற்றம் இல்லாத இந்த இரண்டும் அதிக நிதி ஒதுக்கீடு இல்லாமல் திணறுகிறது. 2015-16, 2017-18-ஆம் ஆண்டுகளில் தொற்றற்ற நோய்களுக்கான ஒதுக்கீட்டில் முதியோரின் சுகாதார பராமரிப்பு தேசிய திட்டத்துக்கென ரூ.1,414 கோடியில் 5% மட்டுமே பயன்படுத்தப்பட்டுள்ளது.
 முதியோரின் வாழ்க்கை, சொத்துகளின் பாதுகாப்பை உறுதி செய்யும் "பெற்றோர் பராமரிப்பு, மூத்த குடிமக்கள் நலச் சட்டம் 2007'-இன்படி தங்கள் சொந்த வருமானம் தங்களைத் தக்கவைத்துக் கொள்ள போதுமானதாக இல்லை; இந்த நிலையில் தங்கள் வாரிசுகளிடமிருந்து பராமரிப்புச் செலவுகளுக்காக மூத்த குடிமக்கள் ரூ.10,000 பெற முடியும் என்ற சூழலில், இந்தச் சட்டம் குறித்து 14% பேர் மட்டுமே அறிந்திருக்கின்றனர்.
 இந்தச் சட்டத்தின் தீர்ப்பாயம் குறித்து 12% பேரும், காவல் துறையின் உதவி மைய தொடர்பு எண்ணை (முதியோர் உதவி எண் - 1800 180 1253) 16% பேரும் தெரிந்து வைத்திருந்தனர். முதியவர்களில் பெரும்பாலானோர் இது குறித்து அறிந்திருக்காத நிலையில், மூத்த குடிமக்களின் உரிமைகள் குறித்த விழிப்புணர்வு வலி கொண்டோருக்கு விழி அளித்ததுபோல அமையும்.
 (இன்று உலக முதியோர் புறக்கணிப்பு தடுப்பு விழிப்புணர்வு நாள்)