வரலாறு படைக்கும் 2.0 வியாபாரம்: லைக்கா மகிழ்ச்சி!

ரஜினி நடிக்கும் 2.0 படத்தின் ஆந்திரா மற்றும் தெலங்கானா பகுதிகளுக்கான விநியோக உரிமை குளோபல் சினிமாஸ் நிறுவனத்துக்கு அதிக விலைக்கு விற்கப்பட்டுள்ளது. 

இதுகுறித்து லைக்கா நிறுவனத்தின் தலைமைச் செயல் அதிகாரி ராஜூ மகாலிங்கம் ட்விட்டரில் கூறியதாவது: ஆந்திரா மற்றும் தெலங்கானா பகுதிகளில் பெரிய விலைக்கு 2.0 பட விநியோக உரிமை விற்கப்பட்டுள்ளது. லைக்கா நிறுவனமும் குளோபல் சினிமாஸும் இணைந்து வரலாறு படைக்கவுள்ளன என்று அவர் கூறியுள்ளார்.

ரஜினி - ஷங்கர் கூட்டணியில் உருவாகும் 2.O (எந்திரன் படத்தின் 2-ம் பாகம்) படத்தை லைக்கா புரொடக்ஷன்ஸ் நிறுவனம் தயாரித்துவருகிறது. பட்ஜெட் - ரூ. 400 கோடி. ரஜினிக்கு இணையான கதாபாத்திரத்தில் பாலிவுட் நடிகர் அக்‌ஷய் குமார் நடிக்கிறார். கதாநாயகி - ஏமி ஜாக்சன். ஏ.ஆர். ரஹ்மான் இசை அமைத்துள்ளார். வசனம் - ஜெயமோகன். ஒளிப்பதிவாளராக நீரவ் ஷா-வும் முத்துராஜ் கலை இயக்குநராகவும் படத் தொகுப்பாளராக ஆண்டனியும் ஒலி வடிவமைப்பாளராக ஆஸ்கர் விருது பெற்ற ரசூல் பூக்குட்டியும் பணியாற்றுகிறார்கள்.

2.0 படத்தின் படப்பிடிப்பு நிறைவுபெற்றுள்ளது. 3டி தொழில்நுட்பத்தில் உருவாகிவருவதால் இப்படத்தின் கிராபிக்ஸ் பணிகள் அமெரிக்காவில் தற்போது நடைபெற்று வருகின்றன.