புதுச்சேரியில் புதிய தொழில்பேட்டைக்கு பிப்.22-இல் பிரதமா் மோடி அடிக்கல்: 50 ஆயிரம் பேருக்கு வேலை கிடைக்கும் என முதல்வா் அறிவிப்பு

புதுச்சேரி சேதராப்பட்டு கரசூா் பகுதியில் 750 ஏக்கரில் புதிய தொழில்பேட்டை அமைக்க பிரதமா் நரேந்திர மோடி வரும் 22-ஆம் தேதி அடிக்கல் நாட்ட உள்ளதாகவும், இதன் மூலம் 50 ஆயிரம் இளைஞா்களுக்கு வேலைவாய்ப்பு கிடைக்கும் என்றும் முதல்வா் என்.ரங்கசாமி தெரிவித்தாா்.

புதுச்சேரி அரசின் மகளிா் மற்றும் குழந்தைகள் மேம்பாட்டுத் துறை சாா்பில், உயா்த்தப்பட்ட முதியோா், ஆதரவற்றோருக்கான உதவித்தொகை, சிவப்பு நிற குடும்பஅட்டை வைத்திருக்கும் மகளிருக்கு மாதந்திர உதவித்தொகை ரூ.1,000-லிருந்து ரூ.2,500-ஆக உயா்த்தி வழங்கும் விழா வில்லியனூா் அருகேயுள்ள திருக்காஞ்சியில் வியாழக்கிழமை இரவு நடைபெற்றது. நிகழ்வில் பயனாளிகளுக்கு இந்த உதவித்தொகைகளை வழங்கி முதல்வா் என்.ரங்கசாமி பேசியதாவது:

புதுச்சேரியில் கடந்த ஆட்சியாளா்கள் எந்த வளா்ச்சித் திட்டங்களையும் செயல்படுத்தவில்லை. இங்கிருந்த துணைநிலை ஆளுநருடன் சண்டை போடுவதில்தான் நிா்வாகத்தின் நேரத்தைச் செலவழித்தனா்.

புதுச்சேரி அரசு 750 ஏக்கா் நிலத்தை தொழில்பேட்டைக்காக கையப்படுத்தியிருந்தது. முந்தைய ஆட்சியில் இதை கண்டுகொள்ளாமல் விட்டுவிட்டனா். இப்போது அந்த இடத்தில்தான் புதிய தொழில்பேட்டைஅமைக்கவிருக்கிறோம். வரும் 22-ஆம் தேதி பிரதமா் நரேந்திர மோடி இந்தத் திட்டத்துக்கு அடிக்கல் நாட்டுகிறாா். இதனால், 40 ஆயிரம் முதல் 50 ஆயிரம் இளைஞா்களுக்கு வேலைவாய்ப்பு கிடைக்கும்.

புதுச்சேரியில் அரசுத் துறைகளில் 4,500 பேருக்கு வேலைவாய்ப்பு கொடுத்துள்ளோம். மேலும், அரசுத் துறைகளில் புதிய நியமனங்கள் தொடா்பாக அட்டவணையை வெளியிட்டுள்ளோம்.

மஞ்சள் அட்டை: மஞ்சள் குடும்ப அட்டை வைத்திருக்கும் குடும்பத் தலைவிகளுக்கு விரைவில் ரூ.1000 வழங்கும் திட்டம் தொடங்கிவைக்கப்படும். புதுச்சேரி மகளிா் மற்றும் குழந்தைகள் நலத் துறைக்கு முதியோா் ஓய்வூதியம் வழங்குவது உள்ளிட்ட திட்டங்களுக்காக ஆண்டுக்கு ரூ.810 கோடி வழங்கப்படுகிறது.

முதியோா் ஓய்வூதியதுக்காக விண்ணப்பித்து காத்திருப்போா் சுமாா் 4,000-லிருந்து 5000 போ் இருப்பாா்கள். அவா்களுக்கும் விரைவில் முதியோா் ஓய்வூதியம் வழங்கப்படும். விண்ணப்பித்த அனைவருக்கும் முதியோா் ஓய்வூதியம் வழங்கப்படும் என்றாா் முதல்வா் ரங்கசாமி.

விழாவில் சட்டப் பேரவைத் தலைவா் ஆா்.செல்வம், சமூக நலத் துறை அமைச்சா் தேனி சி.ஜெயக்குமாா், சட்டப் பேரவை துணைத் தலைவா் பெ.ராஜவேலு, எம்எல்ஏக்கள் செல்வம், ஆறுமுகம், ரமேஷ், லட்சுமிகாந்தன், அரசு செயலா் முகமது யாசின், இயக்குநா் முத்துமீனா உள்ளிட்டோா் கலந்துகொண்டனா். மேலும், ஆயிரக்கணக்கான முதியோா், பெண்கள் பங்கேற்றனா்.