புதுச்சேரியில் களைகட்டிய புத்தாண்டு: திரளாக குவிந்த சுற்றுலா பயணிகள்-நள்ளிரவில் வாழ்த்து முழக்கம்

ஆங்கிலப்புத்தாண்டு கொண்டாட்டம் புதுச்சேரியில் களை கட்டியது. கடற்கரையில் பல்லாயிரக்கணக்கோனோா் குவிந்து நள்ளிரவு 12 மணிக்கு புத்தாண்டு பிறந்ததும் வாழ்த்து முழக்கம் எழுப்பி இனிப்பு வழங்கி கொண்டாடினா். சிறப்பு இசை நிகழ்ச்சிகள், ஆடல்கள், பாடல்கள் என 2026-ஐ உற்சாகமாய் வரவேற்றனா் சுற்றுலாப்பயணிகள்.

ஆங்கில புத்தாண்டு 2026 ஆம் ஆண்டு வியாழக்கிழமை அதிகாலை 12 மணிக்கு பிறந்தது. இதையொட்டி புதுச்சேரியில் உள்ள தேவாலயங்களில் புதன்கிழமை நள்ளிரவு சிறப்புப் பிராா்த்தனையும் கோயில்களில் வியாழக்கிழமை அதிகாலை சிறப்பு வழிபாடும் நடைபெற்றன. இதில் ஏராளமானோா் பங்கேற்றனா்.

மேலும், புதுச்சேரி கடற்கரையில் புத்தாண்டு பிறப்பைக் கொண்டாடும் வகையில் சுற்றுலா பயணிகள் புதன்கிழமை பிற்பகல் முதலே குவிந்தனா். இதனால் புதுச்சேரியின் வெள்ளை நகரம் என்று அழைக்கப்படும் கடற்கரையையொட்டிய பகுதிகளில் 4 சக்கர வாகன நடமாட்டம் புதன்கிழமை பிற்பகல் 3 மணி முதலே தடை செய்யப்பட்டது.

பேட்டரி பேருந்துகள்

புதுச்சேரிக்கு வரும் சுற்றுலா பயணிகளின் வசதிக்காக 10 இடங்களில் வாகனங்கள் நிறுத்துவற்கான வசதி செய்யப்பட்டிருந்தது. அங்கு காா் உள்ளிட்ட வாகனங்களை நிறுத்திவிட்டு புதுச்சேரி அரசு சாா்பில் இயக்கப்பட்ட இலவச பேட்டரி பேருந்துகளில் பயணம் செய்யும் வசதி அளிக்கப்பட்டிருந்தது. இதற்காக புதுச்சேரி சாலை போக்குவரத்துக் கழகம் 30 பேட்டரி பேருந்துகளை இயக்கியது.

இதைத் தவிர புதுச்சேரியில் இரண்டு சக்கர வாகனங்கள் வாடகைக்குக் கிடைக்கின்றன. அதனால் அந்த வாகனங்களையும் சுற்றுலா பயணிகள் வாடகைக்கு எடுத்துக் கொண்டு சுற்றியதைப் பாா்க்க முடிந்தது. இதைத் தவிர ஆங்காங்கே போலீஸாா் பாதுகாப்புப் பணியிலும் போக்குவரத்தைச் சீரமைக்கும் பணியில் ஈடுபடுத்தப்பட்டிருந்தனா்.

அவா்களுக்கு உதவியாக பல்வேறு மாணவா் படைகளைச் சோ்ந்த மாணவ, மாணவிகளும் ஈடுபடுத்தப்பட்டனா். அவா்கள் போக்குவரத்து ஜாக்கெட் அணிந்திருந்தனா். சட்டம் ஒழுங்கு, போக்குவரத்துக் கண்காணிப்பு ஆகிய பணிகளுக்காக சுமாா் 2 ஆயிரம் போலீஸாா் ஈடுபட்டதாக முதுநிலை காவல் கண்காணிப்பாளா் ஆா். கலைவாணன் கூறினாா்.

கேளிக்கை வரி குறைப்பு

இந்நிலையில் புதுவை நகராட்சி கேளிக்கை வரியை 25 சதவீதத்திலிருந்து 10 சதவீதமாக குறைத்துள்ளது. இதன் காரணமாகவும் புதுச்சேரிக்குச் சுற்றுலா பயணிகளின் வருகை அதிகரித்துள்ளது. இந்த வரி குறைப்பைத் தொடா்ந்து பல விடுதிகள், திறந்த வெளி அரங்குகளில் கேளிக்கை நிகழ்ச்சிகள் நடந்தன.

அதிக சுற்றுலா பயணிகளின் வருகை காரணமாக புதுச்சேரியில் சாதாரண விடுதி முதல் நட்சத்திர விடுதி வரை அறைகள் நிரம்பின. இதைத் தவிர ரிசாா்ட்டுகள், ஹோம் ஸ்டே ஆகியவற்றிலும் சுற்றுலா பயணிகள் கூட்டம் அலை மோதியது. நள்ளிரவில் புத்தாண்டு பிறந்ததும், ஒருவருக்கொருவா் புத்தாண்டு வாழ்த்துக்களை பறிமாறிக்கொண்டு, இனிப்பு வழங்கி புத்தாண்டை கொண்டாடினா். நடனம், விளையாட்டுப்போட்டிகள் என்று புத்தாண்டு கொண்டாட்டம் களை கட்டியது.

விடுதிகளில் பாா்களில் இளைஞா்கள் பலா் மது அருந்து கொண்டாட்டத்தில் ஈடுபட்டனா். அவா்கள் வரம்பு மீறாமல் இருக்க கண்காணிப்பு போடப்பட்டிருந்தது. நள்ளிரவு வரை மது விற்பனைக்கும் அனுமதி அளிக்கப்பட்டிருந்தது.

4 அடுக்குப் பாதுகாப்பு

புத்தாண்டு கொண்டாட்டத்தையொட்டி 4 அடுக்கு பாதுகாப்பை போலீஸாா் செய்திருந்தனா். புதுச்சேரியின் எல்லைப் பகுதிகளில் சோதனை சாவடி மற்றும் கண்காணிப்பு செய்யப்பட்டது. மரப்பாலம், இந்திரா காந்தி , ராஜீவ் காந்தி , சிவாஜி சதுக்கங்களில் பாதுகாப்பு மற்றும் கண்காணிப்பு செய்யப்பட்டது.

அண்ணா சாலையிலிருந்து நகரப் பகுதிக்குள் நுழையும் வாகனங்களுக்குக் கட்டுப்பாடு விதிக்கப்பட்டது. மேலும், செஞ்சி சாலையிலிருந்து முற்றிலுமாக வாகனப் போக்குரவத்துக்குத் தடை விதிக்கப்பட்டது. முக்கிய சந்திப்புகளில் சுற்றுலா பயணிகளுக்கு வழிகாட்ட உதவி மையங்களும் அமைக்கப்பட்டிருந்தன. பெண்கள் பாதுகாப்புக்காக வீரமங்கை குழுவினா் சீருடையிலும், சாதாரண உடையிலும் ரோந்து பணியில் ஈடுபட்டனா்.

ராக்பீச், பாண்டி மெரீனா கடற்கரை உள்பட கடற்கரை பகுதியில் கூட்ட நெரிசலைத் தடுக்க டிரோன்கள் மூலம் வான் கண்காணிப்பும் செய்யப்பட்டது. மேலும், 70 இடங்களில் சிசிடிவி கேமராக்கள் பொருத்தப்பட்டன. மேலும், கடற்கரை சாலையையொட்டி கடல் பகுதியில் யாரும் இறங்காமல் இருக்கத் தடுப்புகள் அமைக்கப்பட்டுள்ளன. அதையும் மீறி கடலில் இறங்க முயன்றவா்களை போலீஸாா் மடக்கிப்பிடித்து எச்சரிக்கை செய்து அனுப்பி வைத்தனா்.

இசை நிகழ்ச்சி

புதுச்சேரி கடற்கரையில் 2 இடங்களில் இசை நிகழ்ச்சி நடந்தது. ஒரே இடத்தில் கூட்ட நெரிசலைத் தடுக்க கடற்கரை சாலை 10 பிரிவுகளாகப் பிரிக்கப்பட்டது. ஆங்காங்கே அமைக்கப்பட்டிருந்த எல்இடி திரையில் இசை கச்சேரி உள்ளிட்ட நிகழ்ச்சிகளை மக்கள் பாா்த்து ரசித்தனா். நள்ளிரவு 12 மணிக்கு வாண வேடிக்கை, லேசா் ஷோ, டிரோன் ஷோ நடந்தது. கடற்கரை சாலையில் கண்காணிப்பு கோபுரங்கள் அமைக்கப்பட்டிருந்தன. புதுச்சேரியில் உள்ள மதுக்கடைகளிலும் கூட்டத்தைக் காண முடிந்தது.

40 ஆயிரம் லட்டு

புத்தாண்டையொட்டி ஸ்ரீ மணக்குள விநாயகா் கோயிலில் பக்தா்களுக்கு 40 ஆயிரம் லட்டு பிரசாதம் வழங்க ஏற்பாடு செய்யப்பட்டிருந்தது. இதேபோல் புதுச்சேரி காந்தி வீதியில் உள்ள வரதராஜப் பெருமாள் கோவில், வேதபுரீஸ்வரா் கோவில், மிஷன் வீதியில் உள்ள காளத்தீஸ்வரா், ரயில் நிலையம் எதிரே உள்ள கௌசிக பாலசுப்ரமணியா், முத்தியால்பேட்டை கற்பக விநாயகா், பொன்னு மாரியம்மன், ஏழை மாரியம்மன், ராமகிருஷ்ணா நகா் லட்சுமி ஹயக்ரீவா், வில்லியனூா் திருக்காமீஸ்வரா், தென்கலை வரதராஜப் பெருமாள், முதலியாா்பேட்டை வன்னியபெருமாள், பெரிய காலாப்பட்டில் உள்ள பாலமுருகன் கோவில் உள்பட பல்வேறு கோவில்களில் அதிகாலையிலேயே நடை திறக்கப்பட்டு சிறப்பு பூஜைகள் நடைபெற்றன. இதில் ஏராளமானோா் பங்கேற்று சுவாமி தரிசனம் செய்தனா்.

இதுபோன்று தேவாலயங்களிலும் புத்தாண்டு சிறப்பு திருப்பலி மற்றும் பிராா்த்தனைகள் நடைபெற்றன.