மாதிரி சுகாதாரப் பூங்கா சீரமைக்கப்படுமா?

பெரம்பலூர், ஆக 20: பெரம்பலூர் புதிய பேருந்து நிலையத்தில் சுகாதாரத்தை வலியுறுத்தி அமைக்கப்பட்ட மாதிரி சுகாதாரப் பூங்காவைச் சீரமைக்க வேண்டும் என எதிர்பார்க்கப்படுகிறது.

  பெரம்பலூர் மாவட்டத்தில், கடந்த 2003-04 ஆம் ஆண்டு மாவட்ட ஊரக வளர்ச்சி முகமைத் திட்டத்தின் கீழ், வீட்டுக்கு ஒரு கழிப்பறை அமைக்க வலியுறுத்தப்பட்டது.

  இதற்காக | 500 மதிப்பிலான பீங்கான் உள்ளிட்ட கட்டுமானப் பொருள்கள் சம்பந்தப்பட்ட கிராம ஊராட்சி நிர்வாகத்துக்கு ஊரக வளர்ச்சித் துறை மூலம் அளிக்கப்பட்டன. இதனால், பல்வேறு கிராமப் பொதுமக்கள் தங்களது வீடுகளில் கழிப்பறை அமைத்தனர்.

  இந்தத் திட்டத்தின் நோக்கம் குறித்து பொதுமக்களிடையே விழிப்புணர்வு ஏற்படுத்த, மாவட்ட ஊரக வளர்ச்சி முகமை சார்பில் பெரம்பலூர் புதிய பேருந்து நிலையத்தில் | 1 லட்சத்து 54 ஆயிரத்தில், 24 மாதிரிக் கழிப்பறை சுகாதாரப் பூங்கா அமைக்கப்பட்டு, பாதுகாப்புக்காக | 34 ஆயிரத்தில் கம்பி வேலியும் அமைக்கப்பட்டு, பொதுமக்கள் பயன்பாட்டுக்கு விடப்பட்டது.

  ஆனால், தொடங்கப்பட்ட ஒரு சில தினங்கள் மட்டுமே இந்த மாதிரி சுகாதாரப் பூங்காவை பொதுமக்கள் பார்வையிட்டுச் சென்றனர். பின்னர், போதுமான பராமரிப்பில்லாததால் அந்த வளாகத்தைச் சுற்றி செடிகொடிகள் வளர்ந்து, தற்போது புதராகக் காட்சியளிக்கிறது.

  மேலும், புதிய பேருந்து நிலைய வணிக நிறுவனங்களிலிருந்து வெளியேற்றப்படும் கழிவு நீர், சுகாதார வளாகம் அருகே தேங்கி நிற்பதால் அந்தப் பகுதியில் துர்நாற்றம் வீசுகிறது. இதனிடையே, இரவு நேரங்களில் இந்தப் பகுதியில் சமூக விரோதச் செயல்களும் நடைபெறுவதாகக் கூறப்படுகிறது.

  மாவட்ட மக்களிடையே, சுகாதார விழிப்புணர்வு ஏற்படுத்துவதற்காகக் கட்டப்பட்ட இந்த வளாகம், தற்போது சுகாதாரமின்றிக் காணப்படுகிறது. எனவே, இதுகுறித்து மாவட்ட நிர்வாகம் உடனடி நடவடிக்கை எடுத்து சீரமைக்க வேண்டும் என   பொதுமக்கள் எதிர்பார்க்கின்றனர்.