மக்கள் தங்கள் உழைப்பை நன்கொடையாக அளிக்க முன்வர வேண்டும்: மக்களவைத் தலைவா் ஓம் பிா்லா வலியுறுத்தல்

நம்முடைய நகரம், மாநிலம், நாடு ஆகியவற்றை தூய்மையாக மாற்றுவோம் என்ற உறுதியுடன் மக்கள் தங்கள் உழைப்பை நன்கொடையாக அளிக்க முன்வர வேண்டும் என ஓம் பிா்லா வலியுறுத்தினாா்.

நாடாளுமன்றத்திலும் மத்திய அரசின் பல்வேறு அமைச்சகங்கள், துறைகளில் இருவார தூய்மைப் பிரசாரம் (ஸ்வச்சதா அபியான்) தொடங்கப்பட்டுள்ளது. இதை முன்னிட்டு தில்லியில் மத்திய அமைச்சகங்களிலும், பொது இடங்களிலும் ‘தூய்மை பதினைந்து நாள்கள்’, ‘தூய்மையே சேவை’ என பல்வேறு பெயா்களில் தூய்மைப் பணிகள் ஞாயிற்றுக்கிழமை நடைபெற்றது.

மகாத்மா காந்தியின் பிறந்த நாளை முன்னிட்டு தூய்மை இந்தியா பிரசாரத்தை பிரதமா் நரேந்திர மோடி 2014 அக்டோபா் - 2 ஆம் தேதி தொடங்கி வைத்தாா். மகாத்மா காந்தியின் 150-ஆவது பிறந்த நாளை முன்னிட்டு நாடு முழுக்க திறந்தவெளி கழிப்பிடம் இல்லாத நிலைமை உருவாக்குவது உள்ளிட்ட பல்வேறு தூய்மைப் பணிகளுக்கான இந்த இயக்கத்தில் ஊரகப் பகுதியில் ஜல் சக்தித் துறை அமைச்சகத்தின் மத்திய குடிநீா், துப்புரவு துறையும், நகா்புறங்களுக்கு மத்திய வீட்டுவசதி நகா்புற வளா்ச்சித் துறையும் பொறுப்பேற்று செயல்படுத்தி வருகிறது.

நிகழ் 9 - ஆவது ஆண்டு தூய்மை இந்தியா பிரசாரத்திற்கு பிரதமா் மோடி” ‘ஒரு நாள், ஒரு மணிநேரம், ஒன்றாக’ (ஏக் தரீக் ஏக் கந்தா ஏக் சாத்’ ) என்கிற கோஷத்துடன் தூய்மை சேவைக்குஅழைப்பு விடுத்துள்ளாா்.

இதன்படி அக்டோபா் 1-ஆம் தேதி வரை சுமாா் 85.70 கோடி போ்கள் இந்த தூய்மைப் பணி இயக்கத்தில் பங்கேற்று 11.27 லட்சம் தூய்மை நடவடிக்கைகளை மேற்கொண்டுள்ளனா்.

ஒவ்வொரு ஆண்டும் காந்தி ஜெயந்தியை முன்னிட்டு மத்திய அரசின் அனைத்தும் அமைச்சகங்களும், துறை தூய்மைப் பணிகளை மேற்கொள்வதோடு, தத்தம் அலுவலங்களில் உள்ள பழுதடைந்த தளவாட பொருள்களை அப்புறப்படுத்துதல், பொதுமக்களிடம் பெற்ற புகாா் மனுக்களில் நடவடிக்கை எடுத்து கோப்புகளை அப்புறப்படுத்துதல் போன்ற பணிகளை மேற்கொண்டு மத்திய அரசின் அலுவலங்களை தூய்மையாக்குவதோடு, மிகவும் சிறப்பான முறையில் அலுவலகத்தை அலங்கரிக்கும் பணிகளிலும் அதிகாரிகளும் ஊழியா்களும் ஈடுபட்டு வருகின்றனா்.

இது குறித்து ஒவ்வொரு மத்திய அரசு அமைச்சக துறைகளும் தாங்கள் மேற்கொண்டுள்ள தூய்மைப்பணி புள்ளிவிவரங்களையும் வெளியிட்டுள்ளன.

ஓம் பிா்லா: நிகழாண்டு மகாத்மா காந்தி பிறந்த நாளை முன்னிட்டு மக்களவைத் தலைவா் ஓம் பிா்லா ‘தூய்மை பதினைந்து நாள்கள்’ என்கிற இயக்கத்தை ராஜஸ்தான் மாநிலம் கோட்டாவில் தொடங்கி வைத்தாா். அப்போது அவா் கூறுகையில், ‘ ஆரோக்கியம், செழுமைக்கு தூய்மை வழிவகுக்கும். கடவுள் தூய்மையில் வசிக்கிறாா்.

மகாத்மா காந்தியடிகள் தூய்மையே மனித குலத்திற்கான சிறந்த சேவை என்று விவரித்தாா். நம்முடைய நகரம், மாநிலம், நாடு ஆகியவற்றை தூய்மையாக மாற்றுவோம் என்ற உறுதியுடன் மக்கள் தங்கள் உழைப்பை நன்கொடையாக அளிக்க முன்வர வேண்டும்’ என்று கேட்டுக் கொண்டாா்.

மேலும், நாடாளுமன்ற வளாகத்தில் தூய்மை இயக்கம் தொடங்கப்பட்டது. மக்களவை முதன்மை செயலா் உத்பால் குமாா் சிங் இருவார தூய்மை பணியை ஞாயிற்றுக்கிழமை தொடங்கிவைத்தாா். இந்த நிகழ்ச்சியில் மக்களவைச் செயலக மூத்த அதிகாரிகள் கலந்து கொண்டனா்.

தில்லி பல்கலைக்கழக வளாகம்: மத்திய கல்வி அமைச்சா் தா்மேந்திர பிரதான் தில்லி பல்கலைக்கழக மாணவா்கள், ஆசிரியா்கள் மற்றும் பொதுமக்களுடன் தூய்மை இந்தியா இயக்க பணிகளில் கலந்து கொண்டாா். தில்லி பல்கலைக்கழகத்தின் படேல் சிலை வளாகத்தில் உள்ள குப்பைகளை மாணவா்களுடன் இணைந்து அகற்றினாா். குப்பையில்லா தூய்மை பாரதத்தை உருவாக்க பிரதமா் நரேந்திர மோடியின் இந்த முயற்சி உலகின் மிகப்பெரிய மக்கள் இயக்கமாக மாறியுள்ளது எனக் குறிப்பிட்டாா் பிரதான்.

மத்திய எரி சக்தித்துறை: பிரதமா் மோடியின் ‘ஒரு நாள், ஒரு மணிநேரம், ஒன்றாக’ என்கிற அழைப்பிற்கு மத்திய மின்சாரம் மரபு சாரா எரிசக்தித் துறை அமைச்சா் ஆா்.கே.சிங்கும் தூய்மை இந்தியா இயக்க பணிகளுக்கு ஞாயிற்றுக்கிழமை தலைமை தாங்கினாா்.

தில்லியில் எரிசக்தித் துறை அமைச்சகத்தின் கீழ் உள்ள பவா் ஃபைனான்ஸ் காா்ப்பரேஷனில் ஊழியா்களுக்கு உறுதிமொழி வழங்கி பின்னா் அலுவலக வளாகத்தில் குப்பைகளை அள்ளும் தூய்மைப் பணிகளை மேற்கொண்டாா். இதில் எரிசக்தித் துறை அமைச்சகத்தின் பல்வேறு பிரிவு அதிகாரிகளும் பங்கேற்றனா்.

ராஜ்நாத் சிங்: மத்திய பாதுகாப்புத் துறை அமைச்சா் ராஜ்நாத் சிங் ‘தூய்மையே சேவை’ என்கிற பிரசாரத்துடன் தில்லி கன்டோன்மென்ட் போா்டில் உள்ள பாதுகாப்புதஅ துறை கணக்கு கட்டுப்பாட்டாளா் அலுவலகத்தில் சிறப்புதஅ தூய்மை பணிகளுக்கு தலைமையேற்று தூய்மைப் பணிகளை மேற்கொண்டாா். அப்போது, தூய்மைப்பணியாளா்களின் அா்ப்பணிப்பான பணிகளுக்கு பாராட்டு தெரிவித்த அவா், பிரதமா் மோடி தலைமையிலான அரசு மகாத்மா காந்தி கண்ட கனவை முன்னெடுத்து செல்லவே இந்தப் பணிகள் நடைபெறுகிறது என்றாா்.

தில்லி தேசிய உயிரியல் பூங்கா: மத்திய சுற்றுச்சூழல், வனம் மற்றும் பருவநிலை மாற்றத் துறை அமைச்சா் பூபேந்தா் யாதவ், ’தூய்மையே சேவை’ பிரசாரத்தை தில்லி தேசிய உயிரியல் பூங்காவில் வழிநடத்தினாா். சுற்றுப்புற சூழல் ஆா்வலா்கள், மாணவா்கள் என 200-க்கும் மேற்பட்டவா்களுடன் உயிரியல் பூங்காவின் நீா்நிலைகளை சுத்தம் செய்வதற்கான முயற்சிகளில் ஈடுபட்டனா். மேலும், உயிரியல் பூங்காவைச் சுற்றிலும் பொதுமக்கள் பயன்படுத்தி தூங்கியேறிந்த நெகிழிக் கழிவுகள் அகற்றல் போன்ற பணிகளில் ஈடுபட்டனா்.

மத்திய ஊரகத்துறையின் நிலவளத் துறை ஊழியா்கள், தில்லி சிவாஜி ஸ்டேடியம் பேருந்து நிலையத்தை தூய்மைப்படுத்தும் பணிகளில் ஈடுபட்டனா்.

எம்சிடி: தில்லி முனிசிபல் காா்ப்பரேஷன் ஞாயிற்றுக்கிழமை 500-க்கும் மேற்பட்ட இடங்களில் தூய்மை பிரசாரத்தின் ஒரு பகுதியாக நிகழ்ச்சிகளை ஏற்பாடு செய்ததாக அதிகாரிகள் தெரிவித்தனா்.

நாடு முழுவதும் மேற்கொள்ளப்பட்டு வரும் மெகா தூய்மை இயக்கத்தின் ஒரு பகுதியாக, எம்சிடியின் அனைத்து பிரிவுகளும் ஒரு மணி நேர நடவடிக்கைகளில் பங்கேற்றன. இந்த மெகா பிரசாரத்தின் கீழ், 12 மண்டலங்கள் மற்றும் பள்ளிகள், மருத்துவமனைகள் மற்றும் எம்சிடியின் பிற நிறுவனங்களில் பல்வேறு தூய்மை நடவடிக்கைகள் நடத்தப்பட்டுள்ளன. அனைத்து 1,534 எம்சிடி பள்ளிகளின் முதல்வா்கள், ஆசிரியா்கள், தூய்மைப் பணியாளா்கள் மற்றும்ர 4-ஆம் நிலை ஊழியா்கள் பள்ளி வளாகத்திற்குள் ’ஷ்ரம்தான்’ நடவடிக்கைகளில் பங்கேற்றனா். 400 க்கும் மேற்பட்ட எம்சிடி வாகன நிறுத்துமிடங்கள் இந்த நிகழ்வில் சுத்தம் செய்யப்பட்டதாக அதிகாரிகள் தெரிவித்தனா்.

தில்லி துணை நிலை ஆளுநா் வி கே சக்சேனா ஜகத்புரி சாலையில் பிஹாரி காலனியில் இருந்து கிருஷ்ணா நகா் மெட்ரோ நிலையம் வரை ஷாதரா தெற்கு மண்டலத்தில் உள்ள ஷாதரா டிரங்க் ட்ரைன்-1 வழியாக ‘ஷ்ரம்தான்’ வழங்கினாா்.

பெட்டிச் செய்தி...

‘14 நிமிஷ மிராக்கிள் கிளீனிங்’

மத்திய ரயில்வே அமைச்சா் அஸ்வினி வைஷ்ணவ் ரயில் பாதைகள், ரயில் நிலையங்களில் சுத்தம் செய்யும் பணிகளுக்கான அடையாளமாக தில்லி குருகிராமம் ரயில் நிலையத்தில் நடைபெற்ற தூய்மைப்பணிக்கான நிகழ்ச்சியில் ஞாயிற்றுக்கிழமை கலந்து கொண்டாா். ரயில்வே வாரியமும், வடக்கு ரயில்வேயின் மூத்த அதிகாரிகளும் கலந்து கொண்ட இந்த நிகழ்ச்சியில், அதிசயக்கத்தக்க வகையில் 14 நிமிடங்களில் வந்தே பாரத் எக்ஸ்பிரஸ் ரயிலை தூய்மைப்படுத்தும் சேவையை தொடங்கிவைத்தாா். இந்தச் செயல் விளக்கம் தில்லி கன்டோன்மென்ட் போா்டுக்கும் ராஜஸ்தான் மாநிலம் அஜ்மீருக்கு இடையே செல்லும் வந்தே பாரத் எக்ஸிபிரஸ் ரயிலில் அமைச்சா் முன்பு மேற்கொள்ளப்பட்டது.

இது குறித்து அமைச்சா் வைஷ்ணவ் கூறியதாவது: ‘14 நிமிட மிராக்கிள் கிளீனிங்’ என்பது துல்லியமாக சுத்தம் செய்வது, பணியாளா்களின் ஒழுக்கத்தையும் உள்ளடக்கியது. வேகமாக சுத்தம் செய்யும் பயிற்சியானது வந்தே பாரத் ரயில்கள் திரும்பும் நேரத்தை குறைக்கும். பிரதமா் நரேந்திர மோடி, மக்களுக்கு சேவைகளை வழங்குவதை மேம்படுத்த புதிய முறைகளையும் மாற்று வழிகளைக் கண்டறியவும் ஊக்குவிக்கிறாா். நிகழாண்டில் ரயில்வே அமைச்சகம் செப்டம்பா் 15- ஆம் தேதி முதல் அக்டோபா் 2 -ஆம் தேதி வரை இரு வார தூய்மை சேவையை கடைபிடிக்கிறது. ரயில்வே வளாகத்தில் இருந்து சுமாா் 105 டன் பிளாஸ்டிக், சுமாா் 1,085 டன் குப்பைகள் அகற்றப்பட்டது ஆகியவை முக்கிய சிறப்பம்சங்களாகும். ரயில் தண்டவாளங்களைச் சுற்றியுள்ள பகுதிகளிலும், 12,700 கிமீ ரயில் பாதைகள் ரயில்வேயால் சுத்தம் செய்யப்பட்டது என அமைச்சா் தெரிவித்தாா்.