பொதுமக்களின் அடிப்படைத் தேவைகளை பூா்த்தி செய்வதில் அலட்சியம் காட்டினால் நடவடிக்கை: அதிகாரிகளுக்கு அமைச்சா் அதிஷி எச்சரிக்கை

புது தில்லி: பாதாள சாக்கடை வசதி என்பது பொதுமக்களின் அடிப்படைத் தேவை என்றும் இதைப் பராமரிப்பதில் அலட்சியமாக இருக்கும் சம்பந்தப்பட்ட அதிகாரிகள் மீது நடவடிக்கை எடுக்கப்படும் என்று பொதுப் பணித்துறை அமைச்சா் அதிஷி செவ்வாய்க்கிழமை எச்சரிக்கை விடுத்தாா்.

இது தொடா்பாக அமைச்சா் அதிஷி தனது ‘எக்ஸ்’ தளத்தில் கூறியிருப்பதாவது:

குடியிருப்புப் பகுதிகளில் கழிவுநீா் தேக்கம் தொடா்பாக பொது மக்களிடமிருந்து பெறப்பட்ட புகாா்களின் அடிப்படையில் தில்லியின் சிட்லா கேட், சாவ்ரி பஜாா் மற்றும் நேரு மலை ஜே.ஜே.காலனியில் அதிகாரிகளுடன் இணைந்து ஆய்வு நடத்தப்பட்டது. இந்தப் பகுதிகளில் குடிநீா் வாரிய அதிகாரிகளின் அலட்சியத்தால் தெருக்களில் கழிவுநீா் தேங்கி பொதுமக்கள் அவதிப்படுகின்றனா்.

பாதாள சாக்கடைகளை இப்பகுதிகளில் தூா்வாராமல் இருந்ததற்கு காரணமானவா்கள் மீது கடும் நடவடிக்கை எடுக்க வேண்டுமென அதிகாரிகளுக்கு அறிவுறுத்தப்பட்டுள்ளது.

மேலும், தொழில்நுட்பம் மற்றும் நிபுணா்கள் உதவியுடன், அப்பகுதியில் உள்ள பாதாள சாக்கடைப் பிரச்னைக்கு விரைவில் தீா்வு காணப்படும். பாதாள சாக்கடை வசதி என்பது பொதுமக்களின் அடிப்படைத் தேவை, இதில் அலட்சியமாக இருக்கும் சம்பந்தப்பட்ட அதிகாரிகள் மீது நிச்சயம்

நடவடிக்கை எடுக்கப்படும் என்றாா் அமைச்சா் அதிஷி.

தில்லி பாஜக எதிா்வினை கழிவுநீா் தேங்கிய பிரச்னைக்காக மதியா மஹால் சட்டப்பேரவைத் தொகுதி மட்டுமல்லாது, பழைய தில்லியின் அனைத்து தொகுதி மக்களும் அமைச்சா் அதிஷியை பாா்வையிட அழைக்கின்றனா் என்று பாஜக தில்லி பிரிவு தெரிவித்துள்ளது.

அமைச்சா் அதிஷியின் ஆய்வு தொடா்பாக பாஜக செய்தித் தொடா்பாளா் பிரவீன் சங்கா் கபூா் வெளியிட்ட அறிக்கையில் கூறியிருப்பதாவது:

பழைய தில்லி முழுவதும் ஆம் ஆத்மி கட்சியின் எம்.எல்.ஏ.க்கள் மற்றும் மாநகராட்சி கவுன்சிலா்கள் பொது மக்களின் அடிப்படை வசதிகளை பூா்த்தி செய்து கொடுக்காமல் ஏமாற்றி வருகின்றனா்.

அமைச்சா் அதிஷி ஒரு வகையான நிகழ்ச்சி மேலாளா் போல் ஒவ்வொரு நாளும் ஒரு புதிய நிகழ்வை உருவாக்குகிறாா்.

மதியா மஹால் சட்டப்பேரவைத் தொகுதியில் மக்கள் சந்திக்கும் சிரமங்களுக்கு தில்லி ஜல் போா்டு அதிகாரிகளே பொறுப்பு.

நிா்வாகத்தில் எந்தத் தவறு நடந்தாலும் அதிகாரிகளை குற்றம் சாட்டும் புதிய விளையாட்டை அமைச்சா் அதிஷி உருவாக்கியுள்ளாா் என்றாா் பிரவீன் சங்கா் கபூா்.