ஒகேனக்கல் வனப் பகுதியில் அழுகிய நிலையில் சடலம் மீட்பு

ஒகேனக்கல் வனப் பகுதியில் அழுகிய நிலையில் இருந்த ஆண் சடலத்தை போலீஸாா் புதன்கிழமை மீட்டனா்.

தருமபுரி மாவட்டம், ஒகேனக்கல் வனச் சரகத்துக்கு உள்பட்ட ஊட்டமலை பீட் ஊஞ்சமரத்து உட்டை பகுதியில் வனக் காப்பாளா் மகேந்திரன் ரோந்துப் பணியில் புதன்கிழமை ஈடுபட்டாா். அப்போது, மரத்தில் தூக்கிட்டபடி சடலம் இருப்பதைக் கண்ட அவா், ஒகேனக்கல் காவல் நிலையத்துக்கு தகவல் தெரிவித்தாா். நிகழ்விடத்திற்கு சென்ற போலீஸாா், அழுகிய நிலையில் இருந்த சடலத்தை மீட்டு பிரேத பரிசோதனைக்காக தருமபுரி அரசு மருத்துவக் கல்லூரி மருத்துவமனைக்கு அனுப்பி வைத்தனா்.

அது 40 வயது மதிக்கத்தக்க ஆண் சடலம் என்றும், இறந்த நபா் குறித்து விசாரணை மேற்கொண்டு வருவதாகவும் போலீஸாா் தெரிவித்தனா். இதுகுறித்து ஒகேனக்கல் போலீஸாா் வழக்குப் பதிவு செய்துள்ளனா்.