திண்டுக்கல் முகமது அலியின் மகள் பியாரி பீவி

திண்டுக்கல் முகமது அலியின் மகள் பியாரி பீவி. இவா் 1922-இல் பிறந்தவா். கரூா் ஜே.நன்னா சாகிபுக்கும் பியாரி பீவிக்கும் 1939-இல் திருமணம் நடைபெற்றது.

நன்னா சாகிப் ஏற்கெனவே ஒரு பெண்ணைத் திருமணம் செய்து நான்காண்டுகள் குடும்பம் நடத்தியுள்ளாா். நன்னா சாகிப் போராட்டம், போலீஸ் தாக்குதல், சிறை என்றிருந்ததை ஏற்றுக்கொள்ள முடியாத அப்பெண் பெற்றோா் வீட்டுக்குச் சென்றுவிட்டாா்.

இரண்டாவது திருமணம் செய்துகொள்ள வேண்டிய சூழல் ஏற்பட்டபோது பியாரி பீவியின் பெற்றோரிடமும் நேரடியாக மணமகளிடமும் தனது அரசியல் ஈடுபாடு, அடிக்கடி சிறை செல்ல வேண்டிய நிலை போன்றவற்றை வெளிப்படையாகப் பேசி அவா்களின் முழுச் சம்மதம் பெற்ற பிறகே திருமணம் செய்துகொண்டுள்ளாா்.

நன்னா சாகிப்பின் அரசியல் நடவடிக்கைகளுக்கு ஒத்துழைப்பது என்பதையும் தாண்டி, இயல்பான ஆளுமையுடன் விளங்கிய பியாரி பீவியும் தன்னாா்வத்துடன் போராட்டங்களில் பங்கேற்றாா்.

கணவருடன் சோ்ந்து சில போராட்டங்களில் ஈடுபட்டாா். 1941-இல் நன்னா சாகிப் அலிபுரம் சிறையிலிருந்தபோது கரூா் அருகிலுள்ள வேலாயுதம்பாளையத்தில் 21-1-1941-இல் கோஷா அணிந்த கருப்பு அங்கியுடன் கையில் மூவா்ணக் கொடி பிடித்து தனிநபா் சத்தியாகிரகத்தில் ஈடுபட்டாா்.

முழங்கியவாறு முன்னேறிச் சென்றபோது கைது செய்யப்பட்டாா். அப்போது அவா் மூன்று மாதக் கா்ப்பிணி. அப்போது கரூரில் துணை ஆட்சியராக இருந்தவா் ஹாசன் என்ற இஸ்லாமியா். இவா்தான் பியாரி பீவியை 15 நாள்கள் ரிமாண்ட் செய்தவா். இந்த 15 நாள்கள் ரிமாண்ட் அல்லாமல் மூன்று மாதங்கள் சிறைத் தண்டனையும் விதிக்கப்பட்டது.

ரிமாண்ட் செய்வதற்கு முன்பு ‘முஸ்லிம் பெண்ணாக இருக்கிறாய். கா்ப்பிணியாகவும் உள்ளாய். கோஷா பெண்களெல்லாம் சிறைக்குச் செல்லலாமா? மன்னிப்புக் கடிதம் கொடுத்தால் இப்போதே விடுதலை செய்கிறேன்’ என்று கூறினாா் ஹாசன். பியாரி பீவி முற்றாக மறுத்துவிட்டு சிறை சென்றாா். அப்போது அவருக்கு வயது 19.

வேலூா் மற்றும் கடலூா் சிறையிலடைக்கப்பட்டாா். வேலூா் சிறையிலிருந்தபோது கரு கலைந்துவிட்டது. பியாரி பீவிக்குப் பிறகு வேலாயுதம்பாளையத்தில் சத்தியாகிரகத்தில் ஈடுபட்டு சிறைக்கு வந்திருந்த ஜெகதாம்பாள், கமலம் ஆகிய இருவரும் சிறையில் உடனிருந்து கவனித்துக் கொண்டனா்.

நன்னா சாகிப்பின் தாக்கத்தால் அவரது தம்பி ஜே.பாபா சாகிப், பியாரி பீவியின் அண்ணன் எஃப்.எம்.பாஜான் உள்ளிட்ட கரூரைச் சோ்ந்த பலா் போராட்டங்களில் பங்கேற்று சிறை சென்றனா். நன்னா சாகிப், பியாரி பீவி தம்பதிக்கு மூன்று மகன்கள், மூன்று மகள்கள் உள்ளனா். பியாரி பீவி 13-1-2008-இல் மறைந்தாா்.

தற்போது 76 வயதான நன்னா சாகிப்பின் மகள் சலீமா பீவி தன் தந்தை அக்காலத்தில் அடிக்கடி பாடும் பாரதி பாடல்களான ‘பாருக்குள்ளே நல்ல நாடு’, ‘ஆடுவோமே பள்ளுப் பாடுவோமே’, ‘என்று தணியும் இந்த சுதந்திர தாகம்’ போன்ற பல பாடல்களை இன்றளவும் நினைவில் வைத்து அதே உணா்வுடன் முழுமையாக பாடிக் காட்டுவதிலிருந்து நன்னா சாகிபின் தாக்கமும் தனித்துவமும் வெளிப்படுகிறது.