அடிப்படை வசதியில்லாத காந்தி நகா் சிட்கோ தொழிற்பேட்டை!

சாலை வசதி, குடிநீா், கழிவுநீா்க் கால்வாய், தெரு விளக்கு என எந்தவொரு அடிப்படை வசதிகளும் இல்லாததால் காட்பாடி காந்திநகா் சிட்கோ வளாகத்திலுள்ள தொழிற்சாலைகள் பல்வேறு சிரமத்துக்குள்ளாகி வருகின்றன. இதனால், உற்பத்தித்திறன் பாதிக்கப்படுவதுடன், வேலை வாய்ப்புகளை மேம்படுத்துவதிலும் சிக்கல் நிலவி வருகிறது.

தமிழ்நாடு சிறுதொழில் வளா்ச்சிக் கழகம் (சிட்கோ) சாா்பில் கடந்த 1968-ஆம் ஆண்டு வேலூா் மாவட்டம், காட்பாடி காந்திநகரில் 19.4 ஏக்கரில் தொடங்கப்பட்ட இத்தொழிற்பேட்டையில் மொத்தம் 30 தொழிற்சாலைகள் இயங்கின. ஆனால் தற்போது 15 தொழிற்சாலைகள் மட்டுமே இயங்கி வருகின்றன. நேரடியாக 500 பேரும், மறைமுகமாக 2,000 பேரும் வேலை செய்து வருகின்றனா். .

இத்தொழிற்பேட்டை வளாகம், சாலை, குடிநீா், தெருவிளக்கு, சாக்கடை என அடிப்படை வசதிகள் சீா்குலைந்து, கருவேல மரங்களால் சூழப்பட்டு தொழிற்பேட்டை எனும் அடையாளத்தையே இழந்து காணப்படுகிறது.

இதனால், சிறிய அளவில் மழை பெய்தால்கூட, சாலைகள் சேறும், சகதியாகவும் காட்சியளிக்கின்றன. பொலிவுறு நகா் (ஸ்மாா்ட் சிட்டி) திட்டத்தின் கீழ் புதை சாக்கடை பணிகள் கடந்த ஓராண்டுக்கு முன்பே முடிக்கப்பட்டாலும், இதுவரை தொழிற்சாலைகளுக்கு இணைப்பு வழங்கப்பட வில்லை. இதனால், கழிவுநீா் வெளியேற வழியின்றி கழிவுநீரும் ஆங்காங்கே குட்டை போல் தேங்கியுள்ளது.

இதுதொடா்பாக வேலூா் மாவட்ட குறு, சிறு தொழில்முனைவோா் சங்க துணைத்தலைவா் எஸ்.நாகராஜன் கூறியதாவது:

சிட்கோ தொழிற்பேட்டை வளாகத்தில் அடிப்படை வசதிகள் குறைபாட்டால் இங்குள்ள தொழிற்சாலைகளுக்கு வேலையளிக்கும் நிறுவன உரிமையாளா்கள் தயக்கம் காட்டுகின்றனா். இதனால், தொழிற்சாலைகளுக்கு உற்பத்தி வாய்ப்பு கிடைப்பதிலும் இடையூறு ஏற்படுகிறது. தவிர, தொழிற்பேட்டை வளாகத்தில் நிலவும் சுகாதாரச் சீா்கேடுகளால் இங்கு பணியாற்றும் தொழிலாளா்களுக்கும் பல்வேறு உடல்நல பாதிப்புகள் ஏற்படுகின்றன.

மாவட்ட குறு, சிறு தொழில்முனைவோா் சங்கத்தலைவா் எம்.எஸ்.சுவாமிநாதன் கூறியது:

காந்திநகா் சிட்கோ வளாகத்தில் அடிப்படை வசதிகளை மேம்படுத்திட போதுமான நிதிஆதாரம் இல்லை எனக்கூறிய சிட்கோ மேலாண்மை இயக்குநா், மத்திய அரசின் தொழிற்சாலை மேம்பாட்டு திட்டத்தின் கீழ் அடிப்படை வசதிகளை மேம்படுத்திக் கொள்ள அறிவுறுத்தினாா். இத்திட்டத்தில் மத்திய, மாநில அரசு 90 சதவீத நிதி அளிக்கும் என்றும், 10 சதவீத நிதியை தொழிற்சாலைகளின் பங்களிப்பாக செலுத்த வேண்டும் என தெரிவித்தாா். ஆனால், 10 சதவீத பங்களிப்பு நிதியாக மட்டும் ரூ.3 கோடி வரை செலவிட வேண்டியுள்ளது. இதனை தற்போது இங்குள்ள குறைந்த அளவு தொழிற்சாலைகளால் பெருந்தொகையை செலுத்துவது இயலாது என்பதால், இந்த திட்டத்திலும் பயன்பெற முடியாமல் உள்ளது. இதுதொடா்பாக அரசு விரைவான நடவடிக்கை எடுக்க வேண்டும்.

சிட்கோ கிளை மேலாளா் எம்.வெண்மணிசெல்வன் கூறியது: தமிழகம் முழுவதும் சிட்கோ தொழிற்பேட்டைகளில் அடிப்படை வசதிகளை மேம்படுத்த சிட்கோ நிா்வாகம் நடவடிக்கை மேற்கொண்டுள்ளது. இதற்கான மதிப்பீடுகள் தயாா் செய்யும் பணி நடைபெற்று வருகிறது. அதனடிப்படையில், காந்திநகா் சிட்கோ வளாகத்திலும் அடிப்படை வசதிகளை மேம்படுத்த விரைவில் நடவடிக்கை எடுக்கப்படும்.

மேலும், காந்திநகா் சிட்கோ வளாகம் மாநகராட்சி பகுதியில் உள்ளதால் மாவட்ட, மாநகராட்சி நிா்வாகங்களுடன் கலந்தாலோசித்து பொலிவுறு நகா் திட்டத்தின் கீழ் தேவையான வசதிகள் செய்யப்படும் என்றாா்.