வேளாண் பட்டதாரிகள், பொறியாளா் கூட்டமைப்பினா் ஆா்ப்பாட்டம்

திருப்பத்தூா் மாவட்ட வேளாண் பட்டதாரிகள் சங்கம் மற்றும் பொறியியல் சங்கம் சாா்பில் 6 அம்ச கோரிக்கைகளை வலியுறுத்தி ஆட்சியா் அலுவலகம் எதிரே கவன ஈா்ப்பு ஆா்ப்பாட்டம் நடைபெற்றது.

தமிழக அரசு வேளாண் பட்டதாரிகள் சங்கம் மற்றும் தமிழக அரசு பொறியாளா் கூட்டமைப்பின் திருப்பத்தூா் மாவட்டம் சாா்பில், நடைபெற்ற ஆா்ப்பாட்டத்துக்கு பொறியாளா் கூட்டமைப்பின் மாவட்டச் செயலாளா் அண்ணாதுரை தலைமை வகித்தாா். வேளாண் பட்டதாரிகள் சங்கத் தலைவா் சுரேஷ், செயலாளா் சதீஷ் ஆகியோா் முன்னிலை வகித்தனா். பொருளாளா் அபிநயா வரவேற்றாா்.

இதில் கடந்த திமுக ஆட்சியில் ஒரு நபா் குழு பரிந்துரையின் அடிப்படையில் பிறப்பிக்கப்பட்ட நிதி துறை அரசாணை எண் 448-ன் அடிப்படையில் வேளாண் துறையில் உள்ள தொழில் நுட்ப அலுலா்களுக்கு 6வது ஊதிய குழுவின்படி ஊதியத்தை உறுதி செய்து அதற்கு இணையாக 7-ஆவது ஊதிய குழுவில் ஊதியம் வழங்க தமிழக அரசு நடவடிக்கை எடுக்க வேண்டும்.

வேளாண் அலுவலா்களின் பணி நலன் மற்றும் பணி பாதுகாப்பை உறுதி செய்ய வேண்டும் என்பது உள்ளிட்ட 6 அம்ச கோரிக்கைகளை வலியுறுத்தி கோஷங்களை எழுப்பினா்.