உலகம் முழுவதும் பாம்புக்கடி விஷ மருந்து கிடைக்க தமிழக இருளா் இன மக்களே காரணம்: ஆளுநா் ஆா்.என்.ரவி

பாம்புக்கடி விஷத்தால் பாதிக்கப்படக்கூடிய மக்களுக்காக பயன்படுத்தப்படும் மருந்து கிடைக்க தமிழகத்தில் வாழும் இருளா் இன மக்களே காரணமாக இருக்கிறாா்கள் என ஆளுநா் ஆா்.என்.ரவி கூறினாா்.

மத்திய அரசின் இளைஞா் நலன் மற்றும் விளையாட்டு அமைச்சகம், மத்திய உள்துறை அமைச்சகம் மற்றும் காஞ்சிபுரம் சங்கரா கல்லூரி ஆகியவை இணைந்து வட மாநில பழங்குடியின இளைஞா்கள் தமிழகத்தில் உள்ள பழங்குடியின இளைஞா்களின் கலாசாரம், பண்பாடு, நாகரிகம் ஆகியவற்றை பரிமாற்றிக் கொள்ளும் திட்டத்தின் தொடக்க விழா காஞ்சிபுரம் அருகே ஏனாத்தூரில் உள்ள சங்கரா கல்லூரியில் வெள்ளிக்கிழமை நடைபெற்றது. பிப்.19 ஆம் தேதி முதல் 25 ஆம் தேதி வரை நடைபெறும் இந்நிகழ்வில் ஒடிஸா, மத்தியப் பிரதேசம், ஜாா்கண்ட், மகராஷ்டிரம் ஆகிய 4 மாநிலங்களைச் சோ்ந்த 220 பழங்குடியின இளைஞா்கள் பங்கேற்றுள்ளனா். விழாவுக்கு காஞ்சிபுரம் சங்கர மடத்தின் பீடாதிபதி விஜயேந்திர சரஸ்வதி சுவாமிகள் தலைமை வகித்து ஆசியுரை வழங்கினாா். சங்கரா கல்லூரியின் தலைவா் எஸ்.ராமச்சந்திரன், மத்திய அரசின் மை.பாரத் அமைப்பின் மாநில இயக்குநா் செந்தில்குமாா் ஆகியோா் முன்னிலை வகித்தனா். சங்கரா கல்லூரி முதல்வா் கே.ஆா்.வெங்கடேசன் வரவேற்றாா். விழாவில் தமிழக ஆளுநா் ஆா்.என்.ரவி சிறப்பு அழைப்பாளராக கலந்து கொண்டு, புதுதில்லி குடியரசு தின விழா அணிவகுப்பில் பங்கேற்று சிறப்பித்த சங்கரா கல்லூரி மாணவா் எம்.மோகன்ராஜுக்கு பாராட்டு சான்றிதழ் வழங்கினாா். இதைத் தொடா்ந்து அவா் பேசியது: தமிழகத்தில் இருளா் என ஒரு வகை மக்கள் இருக்கிறாா்கள். அவா்கள் பாம்புகளை பிடித்து அதன் மூலம் அவற்றிலிருந்து விஷங்களை எடுக்கிறாா்கள். பாம்புக்கடி விஷத்தைப் போக்க பாம்பிடமிருந்து எடுக்கும் விஷம் தான் பயன்படுகிறது. உலகம் முழுவதும் பாம்புக்கடிக்கு பயன்படுத்தப்படும் மருந்து தமிழகத்தில் வாழும் இருளா் இன மக்களால் தான் எடுக்கப்படுகிறது. பழங்குடியின மக்கள் இன்றும் பின்தங்கித்தான் இருக்கிறாா்கள்.

இந்தியா பாரம்பரியம் மிக்க நாடு, பல்வேறு மொழிகள் உள்ள நாடு, மாநிலத்துக்கு மாநிலம் உணவு வகைகள், பழக்க வழக்கங்கள் வேறுபட்டாலும் நாம் அனைவரும் இந்தியா்கள் என்ற ஒற்றுமை மட்டுமே அனைவரது மனதிலும் நிறைந்திருக்கிறது.

இந்தியாவில் நாம் எங்கு இருந்தாலும் இருக்கும் இடம், பாரம்பரியம், வளம் ஆகியவற்றை தெரிந்து கொண்டு அவற்றின் சிறப்புகளை சமூக வலைதளங்கள் மூலமாக பரப்ப வேண்டும். இது நம் நாட்டின் பாரம்பரியத்தை மேம்படுத்த உதவும். தமிழ் மொழி ஒரு அற்புதமான மொழி. வடமாநிலத்தவரும் தினசரி 10 வாா்த்தைகளையாவது தமிழில் தெரிந்து கொண்டு அதை குடும்ப உறுப்பினா்களுக்கு மட்டுமில்லாமல் மற்றவா்களுக்கும் பரப்புங்கள் என்றாா்.

விழாவில் சங்கர மடத்தின் மேலாளா் ந.சுந்தரேச ஐயா், செயலாளா் சல்லா.விஸ்வநாத சாஸ்திரி, சங்கரா பல்கலையின் துணை வேந்தா் ஸ்ரீநிவாசு ஆகியோா் உள்ளிட்ட பலா் கலந்து கொண்டனா். ஒடிஸா, பிகாா், ஜாா்கண்ட், மத்தியப்பிரதேச மாநிலங்களின் பாரம்பரிய நடன நிகழ்ச்சிகளும் நடைபெற்றது.