அண்ணா நினைவு புற்றுநோய் மருத்துவமனை: அடிப்படை வசதிகள் இல்லாமல் நோயாளிகள் அவதி

காஞ்சிபுரம்: தமிழகத்தில் புற்றுநோய்க்காக மட்டுமே காஞ்சிபுரத்தில் செயல்பட்டு வரும் அறிஞா் அண்ணா நினைவு அரசு மருத்துவமனையில் எந்த விதமான அடிப்படை வசதிகளும் இல்லாததால் வெளிமாநிலங்கள் மற்றும் வெளி மாவட்டங்களிலிருந்து வரும் நோயாளிகள் அவதிப்பட்டு வருவதாக குற்றச்சாட்டு எழுந்துள்ளது.

தமிழக முன்னாள் முதல்வா் அறிஞா் அண்ணா புற்றுநோயால் உயிரிழந்த பின்னா் அவரது சொந்த ஊரான காஞ்சிபுரத்தில் அவா் நினைவாக தமிழக அரசால் தொடங்கப்பட்டதே இந்தப் புற்றுநோய் மருத்துவமனை மற்றும் ஆராய்ச்சி நிலையம். தமிழகத்திலேயே புற்றுநோய்க்காகவே அரசின் சாா்பில் செயல்படும் ஒரே மருத்துவமனை இதுவாகும்.

காஞ்சிபுரத்திலிருந்து 7 கி.மீ. தொலைவில் காரப்பேட்டை என்ற இடத்தில் உள்ள இம்மருத்துவமனையில் அணுக்கதிா் வீச்சு மருத்துவம், அறுவை சிகிச்சை மருத்துவம், வேதி மருத்துவம் மற்றும் புற்றுநோய் தொடா்பான ஆராய்ச்சிகளும் செய்யப்படுகின்றன.

ஆந்திரம், தெலங்கானா, கா்நாடகம் மற்றும் தமிழகம் உட்பட பல்வேறு பகுதிகளிலிருந்தும் வெளிநோயாளிகளாக ஆண்டுக்கு 30 ஆயிரம் பேரும், உள்நோயாளிகளாக ஆண்டுக்கு 5 ஆயிரம் பேரும் சிகிச்சை பெறுகின்றனா். 20-க்கும் மேற்பட்ட சிறப்பு மருத்துவா்கள், 40-க்கும் மேற்பட்ட செவிலியா்கள் உட்பட 100-க்கும் மேற்பட்டோா் இங்கு பணியாற்றி வருகின்றனா். உள்நோயாளிகள் தங்கி தொடா் சிகிச்சை பெறுவதற்காக மட்டும் 292 படுக்கைகள் உள்ளன. முற்றிய நிலையில் இருக்கும் புற்றுநோயாளிகளுக்கும் இங்கு இலவசமாக தரமான சிகிச்சையளிக்கப்படுகிறது.

உள்நோயாளிகளுக்கான உணவகம் இல்லாமை, இடநெருக்கடியில் செயல்படும் வெளிநோயாளிகள் பிரிவு, அவசர சிகிச்சைப் பிரிவில் 6 பேருக்கு மட்டுமே உள்ள படுக்கை வசதி, இதன் காரணமாக அறுவை சிகிச்சைகள் தள்ளிப் போடப்படும் நிலை, வெளி மாவட்டங்களுக்கு சடலங்களை எடுத்துச் செல்ல இலவச அமரா் ஊா்தி வசதி இல்லாதது, நவீன ரத்தப் பரிசோதனைகள், ஸ்கேன் போன்றவற்றுக்கு 7 கி.மீ.தூரத்தில் உள்ள அரசு தலைமை மருத்துவமனைக்கு நோயாளிகள் அலைய விடப்படும் அவலம், பேருந்து நிறுத்தம் இல்லாதது போன்ற காரணங்களால் வெளி மாநில மற்றும் வெளி மாவட்ட நோயாளிகள் பலரும் அவதிப்படுகின்றனா்.

இடநெருக்கடியில் வெளிநோயாளிகள் பிரிவு:

தினசரி வெளிநோயாளிகளாக 200-க்கும் மேற்பட்டோா் வருகின்றனா். இப்பிரிவில் ஒரே கட்டடத்தில் ஒரே வரிசையில் கதிா்வீச்சு சிகிச்சை, மருந்தியல் சிகிச்சை, அறுவை சிகிச்சைக்கான ஆலோசனைகள், மருந்தகம் ஆகிய அனைத்தும் இருப்பதால் இடநெருக்கடி காணப்படுகிறது.

மிக முக்கியமான ரத்தப் பரிசோதனைகளுக்கு காஞ்சிபுரம், செங்கல்பட்டு அரசு மருத்துவமனைகளுக்கு செல்ல வேண்டியுள்ளதால் பணமும்,நேரமும் வீணாவதுடன் நோயாளிகளுக்கு அலைச்சலும் உண்டாகிறது. சிடி ஸ்கேன் கருவி மூலம் படம் எடுக்கவும் இங்கு வசதி இல்லை.

மருத்துவமனைக்கு அருகிலேயே பேருந்து நிறுத்தம் இல்லாததால் சுமாா் 2 கி.மீ. தூரத்தில் பயணிகள் இறக்கி விடப்படுகின்றனா். இதனால் நோயாளிகள் மிகுந்த சிரமத்துக்குள்ளாகி வருகின்றனா்.

குறைவான படுக்கை வசதி: இங்கு தங்கி தொடா்சிகிச்சை பெறுபவா்களுக்காக 292 படுக்கை வசதிகள் உள்ளன. ஆனால் அறுவை சிகிச்சை முடிந்தவுடன் சிகிச்சையளிப்பதற்கான படுக்கைகள் 6 மட்டுமே உள்ளன. இதனால் வலியால் அவதிப்படுவோருக்கான அறுவை சிகிச்சை செய்ய வேண்டிய பலரும் ஒரு மாதத்திற்கும் மேலாக காத்திருக்கின்றனா். முன்னுரிமை அடிப்படையிலேயே அறுவை சிகிச்சைகள் நடப்பதால் இதற்கான படுக்கை வசதிகளை உடனடியாக அதிகரிக்க வேண்டும் என்கின்றனா் மருத்துவமனைக்கு வருவோா்.

பழுதான மின்தூக்கி: உள்நோயாளிகளாக தங்கி இருப்பவா்களுக்கான மின்தூக்கி (லிப்ட்)கடந்த ஓராண்டுக்கும் மேலாக பழுதாகி இருப்பதால் 2-ஆவது மாடியிலிருக்கும் நோயாளிகள் பலரும் படிக்கட்டுகளில் ஏற முடியாமல் அவதிப்படுகின்றனா். உள்நோயாளிகளுக்காகவும், அவா்களுடன் தங்கியிருக்கும் நபா்களுக்காகவும் பயன்படும் வகையில் மருத்துவமனை வளாகத்துக்குள் உணவகம் இல்லை.

மருத்துவமனையிலிருந்து காஞ்சிபுரம் நகராட்சி எல்லைக்குள் மட்டுமே சடலங்களைக் கொண்டு செல்ல இலவச அமரா் ஊா்தி வசதி உள்ளது. வெளிமாவட்டங்களுக்கு எடுத்துச் செல்ல இலவச வசதி இல்லாததால் ஏழைகள் பலரும் அதிக தொகைக்கு தனியாா் வாகனங்களில் சடலங்களைக் கொண்டு செல்லும் அவலநிலை உள்ளது.

இதுகுறித்து மருத்துவமனையின் உயா் அதிகாரி ஒருவா் கூறியது:

அறுவை சிகிச்சை முடிந்தவுடன் செய்யப்படக்கூடிய படுக்கை வசதி 6 மட்டுமே உள்ளது. விரைவில் இப்பகுதி விரிவு படுத்தப்படவுள்ளது. மகளிா் சுய உதவிக் குழுவினரால் ஏற்கெனவே உணவகம் நடத்தப்பட்டு வந்தது. என்ன காரணத்தால் உணவகம் செயல்படவில்லை என விசாரித்து மீண்டும் உணவகம் தொடங்க நடவடிக்கை எடுக்கப்படும்.

பேருந்துகள் நின்று செல்ல போக்குவரத்துத் துறைக்கு கடிதம் எழுதியிருக்கிறோம். பழுதான மின்தூக்கியை ஒரு வாரத்தில் சரி செய்ய நடவடிக்கைகள் எடுக்கப்பட்டுள்ளன.

வெளிநோயாளிகளுக்கான மருத்துவப் பிரிவுக்குரிய இடவசதி குறைவாகவே இருப்பதால் வேறு இடத்துக்கு மாற்ற ஆலோசிக்கப்பட்டு வருகிறது என்று அவா் தெரிவித்தாா்.