ஆனந்த கண்ணீர் 'ஈமோஜி' அதிக அளவில் பயன்பாடு: டுவிட்டர் ஆய்வில் தகவல்

இந்த ஆண்டின் சிறந்த வார்த்தையாக ஆக்ஸ்போர்ட் பல்கலைகழகத்தால் தேர்வு செய்யப்பட்டுள்ள ஆனந்த கண்ணீர் 'ஈமோஜி'-தான் அதிக அளவில் பயன்படுத்தப்பட்டுள்ள டுவிட்டர் ஆய்வில் தெரியவந்துள்ளது.

டுவிட்டர், பேஸ்புக், வாட்ஸ்அப் உள்ளிட்ட தகவல் பரிமாறும் செயலிகளில் 'ஈமோஜி' எனப்படும் பல்வேறு வகையான சிறு படங்கள் உபயோகப்படுத்தப்படுகின்றன.

கடந்த ஏப்ரல் 2014 முதல் ஜூலை 2015 வரையான காலங்களில், தொலைகாட்சி தொடர்பான டுவிட்டர் செய்தி தகவல் பரிமாற்றத்தில் பயன்படுத்தப்பட்ட ஈமோஜி குறித்து அந்நிறுவனம் ஆய்வு மேற்கொண்டது.

இதில், அதிக அளாவக ஆனந்த கண்ணீருடன் கூடிய ஈமோஜி 24 சதம் பயன்படுத்தப்பட்டுள்ளது. அடுத்தப்படியாக இதயவடிவிலான கண்களுடன் கூடிய ஈமோஜி 12 சதமும், அழுகை முகம் 8 சதமும், பிராத்தனை கைகள் 6 சதமும் பயன்படுத்தப்பட்டுள்ளன.

டுவிட்டர் பக்கங்களில் கடந்த ஏப்ரல் 2014ல், அறிமுகம் செய்யப்பட்ட இந்த வகை ஈமோஜிகள் செய்தி பரிமாற்றத்தில் ஒரு பெரிய மாற்றத்தை ஏற்படுத்தியுள்ளன என டுவிட்டர் நிறுவனத்தின் தரவுகள் அதிகாரி ஜோ குரூஸ் கூறியுள்ளார்.

தொலைகாட்சி நிகழ்ச்சிகளை பார்க்கும் போது செய்யப்பட்ட டுவிட்டுகளில் அதிக அளவிலான ஈமோஜிகள் பயன்படுத்தப்பட்டுள்ளன. நிகழ்ச்சிகள் குறித்த விமர்சனங்கள் ஒரே படத்தின் மூலம் பதிவு செய்யப்பட்டுள்ளன. ஒரு சிறிய படம் ஆயிரம் வார்த்தைகளுக்கு சமமாக இருந்துள்ளது.

மேலும், இந்த ஈமோஜியை பயன்படுத்துவதில் 24 வயது மற்றும் அதற்கு குறைவான வயதுடையோரே (86 சதம் பேர்) முன்னணியில் இருப்பதாக ஆய்வில் தெரியவந்துள்ளது. இதிலும், ஆண்களை (43%) விட பெண்களே (57) ஈமோஜியை பயன்படுத்துவதில் அதிக ரசனையுடன் இருந்துள்ளனர்.

இந்த ஈமோஜிகள் விளையாட்டாக மட்டுமல்ல, பெரு நிறுவனங்களின் விளம்பரங்களிலும் தூதுவராக பயன்படுத்தப்பட்டுள்ளன. இதற்காக டுவி்ட்டர் நிறுவனம் அந்நிறுவனங்களிடம் பணம் பெற்றுள்ளது.