டால்பின்

நன்றாக பழக்கப்படுத்தப்பட்ட நாய்கள் செய்கின்ற செயல்களைவிட அற்புதமான செயல்களை செய்பவை டால்பின்கள். டால்பின்களின் சர்க்கஸ் வேலைகளைப் பார்த்தவர்கள் வியப்படைவது மட்டுமில்லாமல் இதன் கூர்மையான அறிவுத்திறனும் மனிதர்களுக்கு இதன்மேல் ஆர்வத்தை ஏற்படுத்துகிறது.

கூட்டம் கூட்டமாக வாழும் இவ்வினம் மிக வேகமாக கடலில் நீந்தினாலும் நீருக்குள் அதிக ஆழம் போவதில்லை. பெரும்பாலான டால்பின்களின் முதுகுப்பகுதி கறுப்பாகவும் அடிப்பகுதி வெண்மையாகவும் இருக்கிறது.

கதைகளிலும்,காவியங்களிலும் கூட ஓவியமாக தீட்டப்படும் இந்த இனங்களில் 32 வகைகள் இருப்பதாகத் தெரிய வந்துள்ளது.

சாதாரண டால்பின்கள் 8 அடி நீளம் வரை உள்ளது.உடலானது திமிங்கிலத்தை போல இழைவரி வடிவமுடையதாகவும் அதன் நுனி கூர்மையாகவும் விளிம்பில் குழியுடையதாகவும் உள்ளது.சிறந்த பாலூட்டி இனமான இவற்றின் குட்டி பிறக்கும் போது அதன் வால்ப்பகுதி தான் முதலில் வெளியில் வரும்.

பிரசவமாகும் போது பல பெண் டால்பின்கள் தாயைச் சுற்றி நின்று பாதுகாக்கின்றன. பிறந்தகுட்டியை முதல் மூச்சு விடச் செய்ய நீர்மட்டத்தின் மேல்பகுதிக்கு கொண்டு வருகின்றன. குட்டி தாயிடம் ஒரு வருடம் வரை பால் குடிக்குமாம்.

இதன் ஒலி முனங்குவது போலவும் குரைப்பது போலவும் நம் காதில் கேட்கும். இதன் எதிரொலி மூலம் எதிரில் உள்ள பொருளின் தன்மையை டால்பின் அறிந்து கொள்கிறது. ஒலி எழுப்பிய நேரத்தையும் அந்த ஒலி எதிரொலித்துத் திரும்ப வந்த நேரத்தையும் வைத்து அப்பொருள் இருக்கும் தூரத்தையும் அறிந்து கொள்கிறது.

உணவுகளை வேட்டையாடவும் கூட இந்த ஒலியே டால்பின்களுக்கு பெரிதும் உதவுகிறது.

கப்பல்கள் கடலில் சென்று கொண்டிருக்கும்போது அதனருகே நீந்திச் செல்வதும் இதன் குணங்களில் ஒன்று. கடலில் வாழும் மீன்கள்,நண்டுகள் இவற்றின் உணவாகும். மீனவர்களின் நண்பன் எனப்படும் இந்த அரியவகை உயிரினமான டால்பின் இனம் ராமநாதபுரம் மாவட்ட கடற்கரை பகுதிகளான தனுஷ்கோடி, வேதாளை, தேவிபட்டிணம்,அழகன்குளம் பகுதிகளிலும் அதிகமாக காணப்படுகிறது.