நதியே.. நதியே...!

உலகில் எண்ணற்ற நதிகள், ஆறுகள் ஓடுகின்றன. இவற்றில் சுத்தமான, அசுத்தமான நதிகளை அறிவோம்.

நதிகள் மாசுபட்டதற்கு நகரங்களின் வளர்ச்சியும், தொழிற்சாலைகளும்தான்!

தேம்ஸ் நதி :

இங்கிலாந்தின் தேம்ஸ் நதியை 'லண்டனின் இதயம்' என அழைப்பர். லண்டன் மாநகரின் குடிநீர்த் தேவையில் மூன்றில் இரு பங்கை இதுதான் வழங்குகிறது. 346 கி.மீ. ஓடுகிறது. இது உலகின் மிக அழகான நதிகளில் ஒன்றாகும்.

தாரா நதி:

மாண்டி நீக்ரோவில் உள்ளது. 'ஐரோப்பாவின் நகை' என அழைப்பர். யுனெஸ்கோ பாரம்பரிய தளங்களில் ஒன்று. கைப்படாத, பள்ளத்தாக்கில் அடியில் எடுப்பாக ஓடும் நதி. ஸ்படிகம் போல் தெளிவான நீர்.

டோர்ன் நதி:

சுவீடன், பின்லாந்து ஆகிய இரண்டு நாடுகளின் எல்லையாக இருப்பதால், சுத்தத்தில் அக்கறை எடுத்து பராமரிக்கப்படுகிறது.

செயிண்ட் குரோயிக்ஸ் நதி:

அமெரிக்காவில் ஒரு காலத்தில் கடுமையாக மாசுபட்டிருந்த நதியாக இருந்தது. இன்று படுசுத்தமாகப் பராமரிக்கப்படுகிறது. இங்கு விலங்குகளும் உண்டு. பொழுதுபோக்கு இடங்களும் உண்டு. ஆனாலும் சுத்தம், தூய்மை மக்களைக் கவர்ந்திழுக்கிறது.

த்வாகி நதி:

இந்தியாவின் மேகாலயா மாநிலத்தில் உள்ள இந்த நதியை 'உம்ங்கோட் நதி' எனவும் அழைப்பர்.

இதனை சுற்றி இயற்கை அழகு நிறைந்திருக்கிறது. படகு சவாரியும் உண்டு . ஆனாலும் நதியின் சுத்தம் பராமரிக்கப்படுகிறது. சுற்றுலா பயணிகள் தேடி வருகின்றனர்.

கங்கை நதி:

இந்தியாவின் புண்ணிய நதியாக, பக்தர்கள் நீராட்டு செய்கின்றனர். மறுபுறம் நகரங்களின் கழிவுகள், தொழிலகங்களின் சாயங்கள், அசுத்த நீர்கள் ஒரு பில்லியன் கேலன் அளவில் இணைகின்றன. பலன் புனித நீர் பல இடங்களில் மாசுபடுகிறது.

சிட்டாரம் நதி:

இந்தோனேஷியாவின் சிட்டாரம் நதியில் ஜவுளித் தொழிற்சாலைக் கழிவுகள், குப்பைகள், நச்சு ரசாயணங்கள், மூலக் கழிவுகள் நதியை மாசு பட்ட நிலைக்கு கொண்டு சென்று விட்டன.

பாசிக் நதி :

பிலிப்பைன்ஸில் உள்ள இந்த நதி மணிலா வழியாகச் செல்கிறது. இது வீடுகள், தொழிற்சாலைகளின் கழிவுகள் சேர்க்கப்பட்டு மிகவும் மாசுபட்டு விட்டது. கழிவுகள் அகற்றபட்டு வந்தாலும், இன்னும் ஏராளமான சவால்கள் அப்படியே உள்ளன.

புரி கங்கா நதி :

வங்க தேசத்தின் டாக்கா நகருக்கு மிக முக்கியமானது. வீடுகள், தொழிற்சாலைகள் கழிவுகள் எல்லாம் சங்கமமாவது இதில்தான். ஏராளமான தோல் பதனிடப்படும் தொழிற்சாலை கழிவுகள் காரணமாக, நீர் நச்சுத்தன்மையை அடைந்துள்ளது.

யமுனா நதி:

இந்தியாவின் கங்கையின் துணை நதி. சுத்திகரிக்கப்படாத கழிவுநீர், தொழிலகக் கழிவுகள் பெரும் பாதிப்பை ஏற்படுத்திவிட்டது. இதனால் சீர்செய்ய இயலாத நிலைக்கு தள்ளிக் கொண்டிருக்கிறது.