சைவ கலங்கரை விளக்கம்

பஞ்ச காலத்தின்போது சிவபெருமான், வேதசன்மாவின் பக்தியை சோதிக்க விரும்பி, அவரை வறுமையில் சிக்கச் செய்தார். இந்தக் காலகட்டத்தில் வேதசன்மா ஒரு நாள் வீடு வீடாக நெல் சேகரித்து கோயிலின் சந்நிதி முன் உலரச் செய்துவிட்டு நீராடச் சென்றார்.

அப்போது திடீரென மழை பெய்தது. இதைப் பார்த்த வேதசன்மா இறைவனுக்கு அமுது படைக்க உலர வைத்த நெல் என்ன ஆனதோ என்று கலங்கியபடி கோயிலுக்கு ஓடோடி வந்தார். ஆனால் அங்கே உலரப் போட்டிருந்த நெல்லைச் சுற்றி மழை பெய்ததே தவிர, நெல்லின் மீது வெயில் அடித்தது.

இதைப் பார்த்த வேதசன்மா மெய்சிலிர்த்தார். தான் கண்ட காட்சியை மன்னனிடம் தெரிவித்தார். மன்னனும் அந்தக் காட்சியைக் கண்டு பக்தியில் உருகினான். பின்னர் நெல் மட்டும் நனையாது காத்த பரம்பொருளான இந்தப் பிரான், இன்று முதல் " நெல்வேலி நாதர் ' என்று அழைக்கப்படுவார் என்றான். இந்தப் பெயரே நாளடைவில் மருவி நெல்லையப்பர் என்று அழைக்கப்படலானது.



ஒருமுறை ராமக்கோன் என்னும் பக்தர் வேணுவனம் வழியாக அரசனுக்கு பால் கொண்டு செல்லும்போது, மூங்கில் முளையால் கால் இடறி பால் தினமும் கொட்டி வந்தது. ஒருநாள் கோபத்தின் எல்லைக்கே சென்ற ராமக்கோன், அந்த மூங்கில் முளையை கோடாரியால் வெட்டினார். அப்போது அதிலிருந்து ரத்தம் பெருக்கெடுத்து ஓடியது. இதைப் பார்த்து பயந்த ராமக்கோன், மன்னன் ராமபாண்டியனிடம் தான் கண்ட காட்சியைக் கூறினார்.



மன்னன் அங்கே விரைந்து வந்து பார்த்தபோது, சிவபெருமான் லிங்க வடிவில் காட்சி கொடுத்தார். நடந்தது இறைவனின் திருவிளையாடலே என்பதைப் புரிந்து கொண்ட மன்னன், சிவபெருமானின் ஆணையை ஏற்று அங்கேயே ஆலயத்தைக் கட்டினார்.

இந்தக் கோயிலில் மாதம் ஒரு திருவிழா நடைபெறுவது தனிச்சிறப்பாகும். இதில் முக்கியமாக ஆனிப் பெருந் திருவிழா மிகவும் பிரம்மாண்டமான முறையில் தொன்றுதொட்டு நடைபெறுகிறது.  இந்தத் திருவிழாவில் தமிழகத்தில் உள்ள 3 வது பெரிய தேர் இழுக்கப்படும். இந்தத் தேருடன்  5 தேர்கள் இழுக்கப்படும். இந்தத் திருவிழாவின்போது திருநெல்வேலி மாநகரமே விழாக்கோலம் பூண்டுவிடும். மாவட்டம் முழுவதிலும் இருந்தும் மக்கள் சாதி, சமய பாகுபாடு இன்றி தேரை இழுப்பர்.



மேலும் இந்தக் கோயிலில்தான் நடராஜ பெருமான் திருநடனம் புரியும் பஞ்ச சபைகளில் ஒரு சபையான தாமிரசபை உள்ளது. இந்த சபையில் மார்கழி மாதம் நடைபெறும் திருவாதிரைத் திருவிழாவின் நிறைவு நாளன்று நடராஜ பெருமான் திருநடனம் புரியும் வைபவம் நடைபெறுகிறது. ஐப்பசி மாதம் நடைபெறும் காந்திமதி அம்பாள் திருக்கல்யாணத் திருவிழாவும் மிகவும் பிரசித்தி பெற்ற ஒன்று. சுவாமி நெல்லையப்பர் கோயில், பல கட்டங்களில், பல மன்னர்களால் திருப்பணிகள் செய்யப்பட்டது. தற்போது இருக்கும் நிலை வரை, நின்றசீர் நெடுமாற பாண்டியனால் சீர்படுத்திக் கட்டப்பட்டிருக்கிறது.



சாந்த சொரூபமாக வீற்றிருக்கும் காந்திமதி அம்பாளை திருமணமாகாத பெண்கள் தரிசித்தால், விரைவில் திருமணம் நடைபெறும் என்பது பக்தர்களின் நம்பிக்கை. சுவாமி சந்நிதி அருகே உள்ள பொள்ளாப் பிள்ளையாரை வணங்கினால், குழந்தை இல்லாத தம்பதிகளுக்கு விரைவில் குழந்தை பிறக்கும் என்பது பக்தர்களின் அசைக்க முடியாத நம்பிக்கை. இங்கே குழந்தை இல்லாத தம்பதிகள் தங்களது வேண்டுதல் நிறைவேற, சங்கடஹர சதுர்த்தியன்று பொள்ளாப் பிள்ளையாருக்கு 11 வகையான அபிஷேகம் செய்து, மோதகம் வைத்து, அருகம்புல் மாலை சூட்டி வழிபட்டால், அந்தத் தம்பதியின் வேண்டுதல் உடனடியாக நிறைவேறும். 41 நாள்கள் தொடர்ந்து கணவனும் மனைவியும் பக்தி சிரத்தையுடன், அர்ச்சனை செய்து வழிபட்டால் குழந்தை வரம் கிட்டும் என பக்தர்கள் நம்புகின்றனர். சிற்பக் கலைக்கு எடுத்துக் காட்டாக, மாக்காளை மண்டபத்தில் பிரம் மாண்டமாக சுமார் 10 அடி உயரத்துக்கு வீற்றிக்கும் கர்ணன்,அர்ஜுனன், வீரபத்திரர் உள்ளிட்ட சிற்பங்களைக் கூறலாம். இச் சிலைகளில் மனிதனுக்குத் தெரிவது போல நரம்புகள்,விழி அசைவுகள்,உடல் அசைவுகள் ஆகியவை தெரிகின்றன. மேலும் சிற்பக் கலைக்கு எடுத்துக் காட்டாக சங்கிலி மண்டபம்,வசந்த மண்டப சிற்பங்கள்,சுவாமி சந்நிதி முன் உள்ள இசைத் தூண்கள் என கூறிக் கொண்டே செல்லலாம். நெல்லையப்பர் கோயிலுக்குச் சென்றால் சுவாமி தரிசனம் மட்டுமின்றி, வியக்க வைக்கும் சிற்பங்களையும் காணலாம்.