பாலியல் வழக்கில் சிறைத் தண்டனை: முன்னாள் சிறப்பு டிஜிபி ராஜேஸ் தாஸின் மேல்முறையீட்டு மனு மீது தமிழக காவல்துறைக்கு நோட்டீஸ்

பாலியல் குற்றச்சாட்டு வழக்கில் கீழமை நீதிமன்றத்தால் விதிக்கப்பட்ட தண்டனையை உறுதிப்படுத்திய உயா்நீதிமன்ற உத்தரவுக்கு எதிராக முன்னாள் சிறப்பு டிஜிபி ராஜேஷ் தாஸ் ஜாமீன் கோரி தாக்கல் செய்த மனுவை உச்சநீதிமன்றம் திங்கள்கிழமை விசாரித்தது. அப்போது, இந்த மனுவுக்கு பதில் அளிக்க தமிழக அரசுக்கு நோட்டீஸ் அனுப்ப உத்தரவிட்டது. மேலும், இந்த விவகாரத்தில் மனுதாரரைக் கைது செய்ய இடைக்காலத் தடையும் விதித்தது.

தமிழக காவல் துறையில் சிறப்பு டிஜிபியாக இருந்து இடைநீக்க காலத்தில் பணி ஓய்வு பெற்றவா் ராஜேஷ் தாஸ். 2021-ஆம் ஆண்டு முதல்வரின் பாதுகாப்புப் பணியில் இருந்த பெண் காவல் கண்காணிப்பாளா் ஒருவா், தனக்கு ராஜேஷ் தாஸ் பாலியில் ரீதியாக தொல்லை கொடுத்ததாக அளித்த புகாரின்பேரில் அவா் மீது சிபிசிஐடி வழக்குப் பதிவு செய்தது.

இந்த வழக்கில், ராஜேஷ் தாஸுக்கு மூன்று ஆண்டுகள் சிறைத் தண்டனை விதித்து விழுப்புரம் குற்றவியல் நடுவா் நீதிமன்றம் தீா்ப்பளித்தது. இதன் பின்னா், இத்தீா்ப்பை எதிா்த்து விழுப்புரம் முதன்மை அமா்வு நீதிமன்றத்தில் ராஜேஷ் தாஸ் தரப்பில் மேல்முறையீடு செய்யப்பட்டது. இந்த வழக்கில் கடந்த பிப்ரவரி மாதம் 12-ஆம் தேதி கீழமை நீதிமன்றத்தின் தீா்ப்பை முதன்மை அமா்வு நீதிமன்றம் உறுதிப்படுத்தியது.

இதை எதிா்த்து ராஜேஷ் தாஸ் தாக்கல் செய்த மேல்முறையீட்டு மனுவை விசாரித்த சென்னை உயா்நீதிமன்றம், அவருக்கு எவ்வித நிவாரணமும் வழங்க முடியாது என்றும் கீழமை நீதிமன்றம் விதித்த 3 ஆண்டுகள் சிறை தண்டனையை நிறுத்தி வைக்க முடியாது என்றும் கூறி அவரது மனுவை தள்ளுபடி செய்தது.

இதையடுத்து, அவா் இந்தத் தண்டனை நிறுத்திவைக்கவும், ஜாமீன் வழங்கவும் கோரி உச்சநீதிமன்றத்தில் வழக்குரைஞா் ஏ.காா்த்திக் மூலம் மேல்முறையீட்டு மனு தாக்கல் செய்திருந்தாா்.

இந்த வழக்கு உச்சநீதிமன்றத்தில் நீதிபதிகள் பேலா எம். திரிவேதி, பங்கஜ் மிட்டல் ஆகியோா் அடங்கிய அமா்வு முன் வெள்ளிக்கிழமை விசாரணைக்கு வந்தது. அப்போது, மனுதாரா் சாா்பில் வழக்குரைஞா்கள் எஸ்.சச்சின், ஏ.காா்த்திக் ஆகியோருடன் மூத்த வழக்குரைஞா் அரிமா சுந்தரம் ஆஜராகி வாதங்களை முன்வைத்தாா்.

இதையடுத்து, ராஜேஷ் தாஸின் மேல்முறையீட்டு மனுவுக்கு தமிழக காவல் துறை பதிலளிக்க நோட்டீஸ் அனுப்ப உத்தரவிட்டு வழக்கை ஜூலைக்கு ஒத்திவைத்தனா். மேலும், அடுத்த விசாரணைத் தேதி வரையிலும் இந்த வழக்கில் ராஜேஷ் தாஸை கைது செய்வதற்குத் தடைவிதிப்பதாகவும் நீதிபதிகள் கூறினா்.