முதல்வர் ஜெயலலிதாவின் 68வது பிறந்தநாள்: பிரதமர் மோடி வாழ்த்து

தமிழக முதல்வரும், அதிமுக பொதுச் செயலாளருமான ஜெயலலிதாவின் 68வது பிறந்த தினம் இன்று கொண்டாடப்பட்டு வரும் நிலையில், பிரதமர் நரேந்திர மோடி, பிறந்தநாள் வாழ்த்துத் தெரிவித்துள்ளார்.

தொலைபேசி மூலமாக தொடர்பு கொண்டு பேசிய பிரதமர் நரேந்திர மோடி, முதல்வர் ஜெயலலிதாவுக்கு பிறந்த நாள் வாழ்த்துக்களை தெரிவித்துள்ளார்.

பிரதமர் நரேந்திர மோடி இது குறித்து தனது டிவிட்டர் பக்கத்தில் கூறியிருப்பதாவது, ஜெயலலிதாவுக்கு எனது பிறந்தநாள் வாழ்த்துகள். நீண்ட ஆயுளுடன், நல்ல உடல் நலத்துடன் வாழ அவரை வாழ்த்துகிறேன் என்று பதிவு செய்துள்ளார்.

ஜெயலலிதாவின் பிறந்தநாளை முன்னிட்டு அதிமுக தொண்டர்கள் தமிழகம் முழுவதும் பல்வேறு கொண்டாட்டங்களில் ஈடுபட்டுள்ளனர்.

பல்வேறு நலத்திட்டப் பணிகளை வழங்கியும், கேக் வெட்டியும், கோயில்களில் சிறப்பு பூஜைகள் செய்தும் இன்று ஜெயலலிதாவின் பிறந்த நாள் வெகு சிறப்பாக அதிமுக தொண்டர்களால் கொண்டாடப்பட்டு வருகிறது.