டி20 போட்டிகளில் ஆஸ்திரேலிய வீரர் புதிய சாதனை!

டி20 போட்டிகளில் ஆஸ்திரேலிய அணியின் சுழற்பந்துவீச்சாளர் ஆடம் ஸாம்பா புதிய சாதனை ஒன்றை படைத்துள்ளார்.

டி20 உலகக் கோப்பைத் தொடரை ஆஸ்திரேலிய அணி வெற்றியுடன் தொடங்கியுள்ளது. ஓமனுக்கு எதிரான முதல் போட்டியில் ஆஸ்திரேலிய அணி 39 ரன்கள் வித்தியாசத்தில் வெற்றி பெற்றது. இந்தப் போட்டியில் ஆஸ்திரேலிய அணியின் நட்சத்திர சுழற்பந்துவீச்சாளர்களில் ஒருவரான ஆடம் ஸாம்பா 2 விக்கெட்டுகளைக் கைப்பற்றினார்.

ஓமனுக்கு எதிரான போட்டியில் 2 விக்கெட்டுகளைக் கைப்பற்றியதன் மூலம் டி20 போட்டிகளில் ஆடம் ஸாம்பா புதிய சாதனை ஒன்றை படைத்துள்ளார். டி20 போட்டிகளில் 300 விக்கெட்டுகளைக் கைப்பற்றிய இரண்டாவது ஆஸ்திரேலிய வீரர் என்ற சாதனையை அவர் படைத்துள்ளார். 332 விக்கெட்டுகளுடன் இந்தப் பட்டியலில் ஆஸ்திரேலிய அணியின் வேகப் பந்துவீச்சாளர் ஆண்ட்ரூ டை முதலிடத்தில் உள்ளார்.

டி20 போட்டிகளில் அதிக விக்கெட்டுகளைக் கைப்பற்றியவர்கள் வரிசையில் மேற்கிந்தியத் தீவுகள் அணியின் முன்னாள் வீரர் டுவைன் பிராவோ (573 போட்டிகள், 625 விக்கெட்டுகள்), ஆப்கானிஸ்தான் அணியின் ரஷித் கான் (426 போட்டிகள், 576 விக்கெட்டுகள்) மற்றும் முன்னாள் மேற்கிந்தியத் தீவுகள் வீரர் சுனில் நரைன் (513 போட்டிகள், 552 விக்கெட்டுகள்) முதல் மூன்று இடங்களில் உள்ளனர்.

இதுவரை 258 டி20 போட்டிகளில் விளையாடியுள்ள ஆடம் ஸாம்பா 301 விக்கெட்டுகளைக் கைப்பற்றியுள்ளது குறிப்பிடத்தக்கது.