வெற்றிக்கான சில யோசனைகளை கோலி, சாஸ்திரியிடம் தெரிவிப்பேன்: செளரவ் கங்குலி

இந்தியாவில் மே.இ.தீவுகள் அணி சுற்றுப்பயணம் செய்து தலா 3 ஆட்டங்கள் கொண்ட டி20, ஒரு நாள் தொடா்களில் பங்கேற்கிறது. இன்று முதல் டி20 தொடர் தொடங்கவுள்ளது. ஹைதராபாத்தில் இன்று இரவு 7 மணிக்கு முதல் டி20 ஆட்டம் நடைபெறுகிறது. 

இந்நிலையில் ஒரு விழாவில் கலந்துகொண்ட பிசிசிஐ தலைவர் செளரவ் கங்குலி கூறியதாவது:

டி20 கிரிக்கெட்டில் நாம் நன்றாக இலக்குகளை விரட்டுகிறோம் எனும்போது முதலில் பேட்டிங் செய்கிற போதும் நன்கு விளையாட வேண்டும். வெற்றிக்கான சில யோசனைகள் என்னிடம் உள்ளன. அதை கோலி, சாஸ்திரியிடம் பகிர்ந்துகொள்வேன். நாம் நிறைய டி20 ஆட்டங்களை விளையாடவில்லை. உலகக் கோப்பை ஆரம்பிக்கும் சமயத்தில் அதிக ஆட்டங்களில் விளையாடி, போட்டிக்குத் தயாராக இருப்போம். 

டெஸ்ட் கிரிக்கெட்டில் நன்கு விளையாடுவது தான் நம் லட்சியம். கடந்த வருடம் ஆஸ்திரேலியாவில் நன்றாக விளையாடினோம். நியூஸிலாந்தில் நன்கு விளையாடக் கூடிய அணி நம்மிடம் உண்டு. உலகின் சிறந்த டெஸ்ட் அணியாக உள்ள நம்முடைய இலக்கு எல்லா இடங்களிலும் நன்கு விளையாடும் அணியாக இருப்பதுதான் என்று கூறியுள்ளார்.