சர்வதேச வாள்வீச்சு போட்டியில் தங்கம் வென்ற தமிழ்ப்பெண்ணுக்கு சேவாக் வாழ்த்து!

ஐஸ்லாந்தில் நடைபெற்ற சர்வதேச வாள்வீச்சு சாம்பியன்ஷிப் போட்டியில் இந்திய வீராங்கனை பவானி தேவி தங்கப் பதக்கம் வென்றார். இதுதொடர்பாக வெளியிடப்பட்டுள்ள செய்திக் குறிப்பில், "பவானி தேவி தனது அரையிறுதியில் பிரிட்டன் வீராங்கனை ஜெஸிகா கார்பியை 15-11 என்ற கணக்கில் வென்ற நிலையில், இறுதிச் சுற்றில் அதே நாட்டைச் சேர்ந்த சாரா ஜேன் ஹாம்சனை 15-13 என்ற செட் கணக்கில் வீழ்த்தினார். சர்வதேச வாள்வீச்சு போட்டியில் தங்கப் பதக்கம் வென்ற முதல் இந்திய வீராங்கனை பவானி தேவி ஆவார்' என்று தெரிவிக்கப்பட்டுள்ளது.

இந்நிலையில், தனது வெற்றி குறித்து பவானி தேவி கூறுகையில், "இந்த சர்வதேச சாம்பியன்ஷிப் போட்டியில் 3-ஆவது முறையாக பங்கேற்றுள்ளேன். முந்தைய சீசன்களில் காலிறுதி வரை முன்னேறி தோல்வி அடைந்தேன். ஏற்கெனவே ஆசிய சாம்பியன்ஷிப் மற்றும் காமன்வெல்த் போட்டிகளில் பதக்கம் வென்றுள்ள நிலையில், உலக அளவிலான போட்டியில் பதக்கம் வெல்வது இது முதல் முறையாகும். இந்தப் போட்டியின் காலிறுதி முதலே ஆட்டம் கடினமாகத் தொடங்கியது. அரையிறுதி மற்றும் இறுதிச் சுற்றில் மிகவும் கடுமையாகப் போராடி வெற்றி பெற வேண்டியிருந்தது' என்றார்.

தங்கம் வென்ற பவானி தேவிக்கு பலதரப்பிலிருந்தும் வாழ்த்துகள் குவிகின்றன. கிரிக்கெட் வீரர் வீரேந்திர சேவாக் தன்னுடைய ட்விட்டர் பக்கத்தில் பவானி தேவியை வாழ்த்தி ட்வீட் வெளியிட்டுள்ளார். அவர் கூறியதாவது: சர்வதேச வாள்வீச்சு போட்டியில் தங்கப் பதக்கம் வென்ற முதல் இந்திய வீராங்கனைக்கு வாழ்த்துகள். ஜெய் பவானி என்று கூறியுள்ளார்.