ஹோம் சீஸனில் அசத்திய இந்தியா! சாதனைப் புள்ளிவிவரங்கள்

ஆஸ்திரேலியாவுக்கு எதிரான 4-வது டெஸ்ட் கிரிக்கெட் போட்டியில் இந்தியா அணி 8 விக்கெட் வித்தியாத்தில் வெற்றி பெற்று டெஸ்ட் தொடரை 2-1 என்கிற கணக்கில் வென்றுள்ளது.

* இந்த ஹோம் சீஸனில் விளையாடிய 13 டெஸ்டுகளில் 10-1 என்கிற கணக்கில் வென்றுள்ளது இந்திய அணி. இரண்டு போட்டிகள் டிரா ஆயின. 

* இந்த ஹோம் சீஸனில் இந்தியா விளையாடிய 13 டெஸ்டுகளின் புள்ளிவிவரம்: 28,705 பந்துகள், 14,862 ரன்கள், 428 விக்கெட்டுகள்.

* இந்த சீஸனில் உமேஷ் யாதவ் அற்புதமாகப் பந்துவீசியுள்ளார். 17 விக்கெட்டுகளை வீழ்த்தியுள்ளார். இதுதான் ஒரு தொடரில் அவர் எடுத்த அதிகபட்ச விக்கெட்டுகள். முன்னதாக 2011-12-இல் இதே ஆஸ்திரேலியாவுக்கு எதிரான டெஸ்ட் தொடரில் 14 விக்கெட்டுகளை வீழ்த்தியதே அவருடைய அதிகபட்ச விக்கெட் சாதனையாக இருந்தது.

* ராகுல் இந்தத் தொடரில் 6 அரை சதங்கள் எடுத்துள்ளார். 1993-ல் கிரஹாம் கூச் இதுபோல ஆஸி. அணிக்கு எதிராக 6 அரை சதங்கள் எடுத்தார். அதன்பிறகு ஆஸி. அணிக்கு எதிராக ஒரே தொடரில் 6 அரை சதங்கள் எடுத்த வீரர் ராகுல் தான். 

ஒரு டெஸ்ட் தொடரில் 6 அரை சதங்கள் எடுத்த இரண்டாவது இந்திய வீரர், ராகுல். இதற்கு முன்பு மொஹிந்தர் அமர்நாத் 1982-83-ல் பாகிஸ்தானுக்கு எதிராக 6 அரை சதங்கள் எடுத்தார்.  

* இந்த சீஸனில் 6 அரை சதங்களை விளாசியுள்ளார் ரவீந்திர ஜடேஜா. சர்வதேச அளவில் ஒரு சீஸனில் 50 விக்கெட் மற்றும் 500 ரன்கள் எடுத்த மூன்றாவது வீரர் என்ற பெருமையைப் பெற்றுள்ளார் ஜடேஜா. கபில்தேவ் (1979-80), மிட்செல் ஜான்சன் (2008-09) ஆகியோர் மற்ற இருவர். இந்த சீசனில் 13 போட்டிகளில் விளையாடியுள்ள ஜடேஜா 556 ரன்களையும், 71 விக்கெட்டுகளையும் எடுத்துள்ளார்.

* அனைத்து டெஸ்ட் நாடுகளுடனான கடைசி டெஸ்ட் தொடர்களில் இந்தியா:

ஆஸ்திரேலியா - வெற்றி 
வங்கதேசம் - வெற்றி 
இங்கிலாந்து - வெற்றி 
நியூசிலாந்து - வெற்றி
பாகிஸ்தான் - வெற்றி
இலங்கை - வெற்றி
தென் ஆப்பிரிக்கா - வெற்றி
மேற்கிந்தியத் தீவுகள் - வெற்றி
ஜிம்பாப்வே - வெற்றி

இதுபோல இதற்கு முன்பு சாதித்த அணிகள் - ஆஸ்திரேலியா மற்றும் தென் ஆப்பிரிக்கா ஆகிய அணிகள் மட்டுமே. 

* முதல் டெஸ்டை இழந்தபிறகு இந்தியா வென்ற தொடர்கள்:

v இங்கிலாந்து, 1972-73
v ஆஸ்திரேலியா, 2000-01
v இலங்கை, 2015
v ஆஸ்திரேலியா, 2016-17

எல்லாவற்றிலும் 2-1 தான் முடிவுகள்