மியாமி மாஸ்டர்ஸ்: இறுதிச்சுற்றில் ஃபெடரர், நடால்!

மியாமி மாஸ்டர்ஸ் டென்னிஸ் போட்டியில் ஸ்விட்சர்லாந்தின் ரோஜர் ஃபெடரர், ஆஸ்திரேலியாவின் நிக் கிர்ஜியோஸைத் தோற்கடித்து இறுதிச்சுற்றுக்கு முன்னேறியுள்ளார். 

அமெரிக்காவின் மியாமி நகரில் நடைபெற்று வரும் இந்தப் போட்டியில் நடைபெற்ற ஆடவர் ஒற்றையர் அரையிறுதியில் போட்டித் தரவரிசையில் 4-ஆவது இடத்தில் இருக்கும் ஃபெடரர் 7-6 (11/9), 6-7 (9/11), 7-6 (7/5) என்ற செட் கணக்கில் ஆஸ்திரேலியாவின் நிக் கிர்ஜியோஸைக் கடும் போராட்டத்துக்குப் பிறகு தோற்கடித்து இறுதிச்சுற்றுக்கு முன்னேறினார். இந்த சீசனில் இதுவரை 19 ஆட்டங்களில் விளையாடி, அதில் 18-ல் வெற்றி கண்டுள்ளார்.

இதேபோல அரையிறுதியில் நடால் 6-1, 7-5 என்ற நேர் செட்களில் இத்தாலியின் ஃபாபியோ ஃபாக்னினியைத் தோற்கடித்து இறுதிச்சுற்றில் ஃபெடரருடன் மோதவுள்ளார். நடாலும், ஃபாக்னினியும் இதுவரை 11 முறை நேருக்கு நேர் மோதியுள்ளனர். அதில் நடால் 8 முறையும், ஃபாக்னினி 3 முறையும் வெற்றி கண்டுள்ளனர்.

மியாமி மாஸ்டர்ஸ் போட்டியில் 5-ஆவது முறையாக பங்கேற்றுள்ள நடால், இதுவரை ஒரு முறைகூட இங்கு பட்டம் வென்றதில்லை. அந்த குறையை இந்த முறை தீர்ப்பதில் தீவிரமாக இருக்கிறார்.