இன்று வரை முறியடிக்க முடியாத கேப்டன் தோனியின் சாதனைகள்!

இந்திய அணியின் முன்னாள் கேப்டன் தோனி, சர்வதேச கிரிக்கெட்டிலிருந்து ஓய்வு பெறுவதாகக் கடந்த சனிக்கிழமையன்று அறிவித்தார்.

2017 ஜனவரி 4 அன்று இந்திய ஒருநாள் மற்றும் டி20 அணிகளின் கேப்டன் பொறுப்பிலிருந்து தோனி விலகினார். 2014-ல் டெஸ்ட் போட்டியிலிருந்து ஓய்வு பெற்றார் தோனி. 2007 முதல் இந்திய அணியின் கேப்டனாக இருந்த தோனியின் இந்த திடீர் முடிவு ரசிகர்களை அதிர்ச்சிக்கு ஆளாக்கியது.

ஒரு கேப்டனாக இன்றைக்கும் தோனி வசம் உள்ள சாதனைகள்:

* டி20 உலகக் கோப்பை, ஒருநாள் உலகக் கோப்பை, சாம்பியன்ஸ் கோப்பை என மூன்று ஐசிசி கோப்பைகளையும் வென்ற ஒரே கேப்டன், தோனி மட்டுமே.

* சர்வதேச கிரிக்கெட்டில் அதிக ஆட்டங்களுக்கு கேப்டனாக இருந்தவர் தோனி. 332 ஆட்டங்கள் (2-வது இடத்தில் பாண்டிங் - 324 ஆட்டங்கள்). 200 ஒருநாள் ஆட்டங்களிலும் 72 டி20 ஆட்டங்களிலும் 60 டெஸ்டுகளிலும் கேப்டனாக இருந்துள்ளார் தோனி. 

* ஒருநாள் ஆட்டங்களில் 110 வெற்றிகளும் 74 தோல்விகளும் டி20 ஆட்டங்களில் 41 வெற்றிகளும் 28 தோல்விகளும் டெஸ்டுகளில் 27 வெற்றிகளும் 18 தோல்விகளும் பெற்றுள்ளார். 

* ஒரு கேப்டனாக அதிக டி20 ஆட்டங்களில் (41) வென்றவர் - தோனி. இன்றுவரை அந்தச் சாதனையை யாராலும் முறியடிக்க முடியவில்லை. அடுத்த இடத்தில் 39 வெற்றிகளுடன் உள்ளவர் - ஆப்கானிஸ்தானைச் சேர்ந்த அஸ்கார் ஆஃப்கன்.

* ஒருநாள் ஆட்டங்கள் இன்றுவரை அதிக வெற்றிகள் கண்ட கேப்டன்களில் தோனிக்கு 2-ம் இடம். பாண்டிங் 165 வெற்றிகளுடன் முதலிடத்தில் உள்ளார். தோனிக்கு 110 வெற்றிகள். இந்திய அளவில் அதிக ஒருநாள் ஆட்டங்களில் வெற்றி அடைந்தவர், தோனி.

* அதிக டி20 ஆட்டங்களுக்கு கேப்டனாக இருந்தவர் - தோனி. 72 ஆட்டங்கள். 2-ம் இடத்தில் அயர்லாந்தின் போர்டர்ஃபீல்ட் - 56 ஆட்டங்கள். 

* 200 ஒருநாள் ஆட்டங்களில் கேப்டனாக இருந்துள்ளார் தோனி. இந்திய அளவில் முதல் இடம், உலகளவில் தோனிக்கு 3-ம் இடம். 

* ஒருநாள் ஆட்டங்களின் வெற்றி விகிதத்தில் சிறந்த இந்திய கேப்டனாக உள்ளவர் கோலி. 89 ஆட்டங்களில் 62 வெற்றிகள், 24 தோல்விகளுடன் 2.583 விகிதம் கொண்டுள்ளார். அடுத்த இடத்தில் தோனி - 1.486.

* ஒரு கேப்டனாக உலகக் கோப்பை ஆட்டங்களில் இரு தோல்விகள் மட்டுமே பெற்றுள்ளார் தோனி. 2011-ல் தென் ஆப்பிரிக்காவுக்கு எதிராகவும் 2015-ல் அரையிறுதியில் ஆஸ்திரேலியாவுக்க்கு எதிராகவும் தோல்விகள் கிடைத்தன. உலகக் கோப்பைப் போட்டிகளில் பாண்டிங்கும் கிளைவ் லாயிடும் மட்டுமே அதிக வெற்றி விகிதங்களைக் கொண்டுள்ளார்கள். டி20 உலகக் கோப்பையில் 20 வெற்றிகளும் 11 தோல்விகளும் அடைந்துள்ளார்.