இந்தியாவுக்கு எதிரான டெஸ்ட் தொடரைக் கைப்பற்றுவோம்: ஸ்டீவ் ஸ்மித்

இந்தியாவுக்கு எதிரான டெஸ்ட் தொடரைக் கைப்பற்றுவோம் என்ற நம்பிக்கை இருப்பதாக ஆஸ்திரேலிய அணியின் ஸ்டீவ் ஸ்மித் தெரிவித்துள்ளார்.

இந்திய அணி ஆஸ்திரேலியாவில் சுற்றுப்பயணம் மேற்கொண்டு 5 போட்டிகள் கொண்ட பார்டர் கவாஸ்கர் டெஸ்ட் தொடரில் விளையாடவுள்ளது. இரு அணிகளுக்கும் இடையிலான இந்த டெஸ்ட் தொடர் வருகிற நவம்பர் 22 ஆம் தேதி முதல் தொடங்கவுள்ளது.

இந்த நிலையில், இந்தியாவுக்கு எதிரான டெஸ்ட் தொடரைக் கைப்பற்றுவோம் என்ற நம்பிக்கை இருப்பதாக ஆஸ்திரேலிய அணியின் ஸ்டீவ் ஸ்மித் தெரிவித்துள்ளது முக்கியத்துவம் பெறுகிறது.

இது தொடர்பாக அவர் பேசியதாவது: இந்தியா மற்றும் ஆஸ்திரேலிய அணிகள் டெஸ்ட் கிரிக்கெட்டில் தற்போது சிறந்த இரண்டு அணிகளாக விளங்குகின்றன. கடந்த ஆண்டு உலக டெஸ்ட் சாம்பியன்ஷிப் இறுதிப்போட்டியில் ஆஸ்திரேலிய அணி இந்தியாவை எதிர்த்து விளையாடியது. இந்திய அணியை வீழ்த்தி சாம்பியன் பட்டமும் வென்றது. கடந்த இரண்டு முறையாக ஆஸ்திரேலியாவுக்கு சுற்றுப்பயணம் மேற்கொண்டபோது, இந்திய அணி மிகவும் சிறப்பாக செயல்பட்டது. அவர்கள் மிகவும் நன்றாக கிரிக்கெட் விளையாடினார்கள்.

இந்த முறை இந்தியாவை வீழ்த்தி டெஸ்ட் தொடரைக் கைப்பற்றும் முனைப்பில் ஆஸ்திரேலிய அணி உள்ளது. பார்டர் கவாஸ்கர் தொடரை ஆஸ்திரேலிய அணி கைப்பற்றி 10 ஆண்டுகள் ஆகின்றன. இந்த முறை பார்டர் கவாஸ்கர் தொடரைக் கைப்பற்றுவோம் என்ற நம்பிக்கை உள்ளது என்றார்.